چند چیزیں گاڑی میں کبھی نہ چھوڑیں ورنہ بھاری نقصان ہوسکتا ہے

ہم اپنی عام استعمال کی اکثر چیزیں یہ سوچ کر گاڑی میں ہی چھوڑ دیتے ہیں کہ بوقتِ ضرورت گاڑی سے نکال کر استعمال کرلیں گے- لیکن بعض مواقع پر یہ عادت ہماری بڑی غلطی ثابت ہوسکتی ہے کیونکہ کچھ چیزوں کو گاڑی میں چھوڑ دینا نقصان کا باعث بنتا ہے- آئیے ہم آپ کو ایسی ہی چیزوں کے بارے میں بتاتے ہیں-

دوائیں
نیشنل انسٹیٹیوٹ آف ہیلتھ مڈلائین کی ویب سائٹ کے مطابق گاڑی میں دوائیں چھوڑ دینا انتہائی خطرناک عمل ہے کیونکہ گاڑی کے اندر کا درجہ حرارت چاہے وہ گرم ہو یا سرد ہو یا پھر نمی والا دواؤں کو نقصان پہنچا سکتا ہے- متعدد دوائیں ایسی ہیں جنہیں کمرے کے عام درجہ حرارت میں رکھنا ضروری ہوتا ہے اور یہ گاڑی میں ممکن نہیں ہوتا-

خوراک
موسمِ گرما میں سپر مارکیٹ سے خرید کر لائی جانے والی کھانے پینے کی اشیاﺀ کو گاڑی میں کبھی نہ چھوڑیں کیونکہ گرم موسم میں جراثیموں میں بہت تیزی سے اضافہ ہوتا ہے- یقیناً دھوپ میں کھڑی گاڑی کے درجہ حرارت میں اضافہ ہوسکتا ہے جس کی وجہ سے گاڑی میں موجود سبزی یا گوشت وغیرہ میں جراثیموں کی تعداد بڑھ سکتی ہے-

اسپرے پینٹ اور ڈیوڈرینٹ
ان اشیاﺀ کو بھی کبھی گاڑی میں نہ چھوڑیں کیونکہ ان میں استعمال ہونے والے کیمیکل زیادہ گرمائش برداشت نہیں کرسکتے- بہت زیادہ درجہ حرارت کی وجہ سے ان پر دباؤ بڑھ سکتا ہے اور یہ پھٹ بھی سکتے ہیں-

موبائل فون
موبائل فون کو گاڑی میں نہ چھوڑنے کی ایک تو بڑی وجہ یہ ہے کہ اگر چور کو گاڑی میں دکھائی دیا تو وہ اسے حاصل کرنے کے لیے لازمی طور پر گاڑی کے شیشے اور دروازے کو توڑنے کی کوشش کرے گا اور اس طرح آپ کا دگنا نقصان ہوسکتا ہے- اس کے علاوہ انتہائی موسم میں موبائل فون کو نقصان بھی پہنچ سکتا ہے-

اہم کاغذات
گاڑی کی رجسٹریشن بک یا کاغذات کو گاڑی میں رکھنا اچھی بات ہے لیکن دیگر اہم کاغذات کو رکھنا بےوقوفی- یہ کاغذات چوری ہونے کی صورت میں آپ کو بھاری نقصان اٹھانا پڑ سکتا ہے-

لکڑی سے بنے موسیقی کے آلات
اگر موسم سرد ہے اور آپ اپنے لکڑی سے بنے موسیقی کے آلات مثلاً وائلن یا گٹار وغیرہ گاڑی میں ہی چھوڑ دیتے ہیں تو یہ آپ یہ غلط کر رہے رہے ہیں- سرد ہوا ان آلات کی لکڑی کو نقصان پہنچا سکتی ہے اور ان آلات کی مرمت پر کافی لاگت آتی ہے-