گھر کو صاف رکھیں لیکن بچوں کے جذبات سے نا کھیلیں۔۔۔بچپن واپس نہیں آئے گا

ایک دن ایسا آئے گا جب گھر چمک رہا ہوگا۔۔۔ہر چیز قرینے سے اپنی جگہ پر ہوگی، دیواروں کا رنگ و روغن ہر داغ سے محفوظ ہوگا۔۔۔گھر میں کوئی شور نہیں ہوگا۔۔۔بار بار کچن سمیٹنا نہیں پڑے گا۔۔۔کیونکہ بچے بڑے ہوجائیں گے۔۔۔اور جب یہ بچے بڑے ہوجائیں گے تو کوئی اپنی تعلیم کی وجہ سے اور کوئی اپنی شادی کی وجہ سے دور ہوجائے گا۔۔۔پھر ان کا وہ بچپن ، اور ان کی وہ شرارتیں سب ایک خواب بن کر سوجائے گا۔۔۔

آج کل ہر کوئی اپنے بچوں کی شرارتوں سے پریشان ہے۔۔۔ہر وقت گھر پھیلا دیتے ہیں۔۔۔پینٹ دیوار پر کیسے لگ گیا، تیل کی شیشی کیسے گر گئی، صوفہ پر چاک کے نشانات کس نے ڈالے، یہ چیخ رہے ہو یا کھیل رہے ہو جیسے نعرے ہی سنائی دیتے ہیں۔۔۔لیکن یقین مانیں یہی وقت ہے بچوں کو کھل کر کھیلنے کی اور جینے کی آزادی دینے کا۔۔۔پھر آپ کو بھی یہ آسان وقت نہیں ملے گا۔۔۔نا تو گھر میں مہمان آنے ہیں اور نا ہی کوئی آپ کو آپ کی صفائی پر میڈل پہنائے گا۔۔۔بار بار گھر کو مت سمیٹیں۔۔۔جب بچے کھیل کر تھک جائیں تب ایک ہی بار ان کے کئے ہوئے پھیلاوے کو سمیٹ لیں۔۔۔
 

وہ وقت جو اس وقت اﷲ کی طرف سے آپ ماؤں کو ملا ہے ایک تحفہ کی طرح اسے قبول کریں۔۔۔کیونکہ آپ کے بچے اس وقت کی خواہش میں موبائل اور ٹیکنالوجی کے پیچھے بھاگ رہے تھے۔۔وہی کھیل جو آپ نے اپنے بچپن میں کھیلے اور آج آپ کے بچوں کو وہ مہیا نہیں انہیں دہرائیں ۔۔۔ہم بہت خوش قسمت تھے کہ گلیوں میں اور میدانوں میں کھیلے لیکن ان معصوموں کو مالز اور گھر کی کا لاؤنج ہی ملا ہے ۔۔۔اس لئے ان کی تفریح آپ بنائیں گے۔۔۔اپنے بچپن میں واپس لوٹ جائیں اور وہی پٹو گرم، آنکھ مچولی، کسوٹی، پکڑم پکڑائی، اونچ نیچ، برف پانی، نام چیز جگہ جیسے کھیل ان بچوں کے ساتھ کھیلیں۔۔۔

یوں سمجھ لیں کہ یہی وہ وقت ہے جب آپ اپنے بچوں کو دین اور دنیا کی سمجھ بہت محبت اور پیار سے دے سکتے ہیں۔۔۔ﷲ تعالیٰ نے دنیا کی سرگرمیوں کو ایک طرف رکھ کر آپ کے بچے آپ کو لوٹائے ہیں تربیت کے لئے۔۔۔اب یہ آپ والدین کا فرض ہے کہ اس تربیت کو کس طرح انجام دیتے ہیں۔۔۔
 

چیخ و پکار، ہر وقت کی روک ٹوک، صرف پڑھائی پر زور، موبائل میں مصروف کردینے کی کوشش، بچوں کے سامنے ہر وقت کے رونے اور برائیاں۔۔یہ سب انہیں ایک ایسا انسان بنائے گا جو اس معاشرے میں کسی نا کسی ذہنی بیماری کے ساتھ آگے بڑھے گا۔۔۔اور قصور صرف آپ کا ہوگا۔۔۔