پولیس افسر حیران رہ گیا: ہائے وے پر گاڑی پانچ سالہ لڑکا چلا رہا تھا

امریکا میں ایک ہائی وے پولیس افسر کا خیال تھا کہ ڈرائیور شاید کوئی بہت چھوٹے قد کا انسان یا کوئی معذور شہری تھا۔ لیکن ڈرائیونگ سیٹ پر ایک پانچ سالہ بچہ بیٹھا ہوا تھا جسے دیکھتے ہی پولیس افسر کا منہ کھلے کا کھلا رہ گیا۔

یہ واقعہ امریکی ریاست یوٹاہ کی ایک اسٹیٹ ہائی وے پر پیش آیا۔ ہائی وے پر اپنی سرکاری گاڑی میں معمول کے مطابق فرائض انجام دیتے ہوئے ایک پولیس افسر نے دیکھا کہ انٹراسٹیٹ فری وے نمبر پندرہ پر ایک گاڑی بار بار اپنی لین سے نکل کر اسی شاہراہ پر سامنے سے آنے والی ٹریفک کی لین کی طرف جا رہی تھی۔

پولیس افسر نے اپنی گاڑی کا سائرن بجانا شروع کیا، خطرناک ڈرائیونگ کرنے والے ڈرائیور کا پیچھا کیا اور اسے رکنے کا اشارہ کیا۔ اس پر ڈرائیور نے جیسے بڑی مہارت سے اپنی گاڑی روک کر ہائی وے کے کنارے کھڑی بھی کر دی۔

پولیس اہلکار ہکا بکا اس وقت رہ گیا، جب اس نے دیکھا کہ جس ڈرائیور کو اس نے پیچھا کرتے ہوئے بہت چھوٹے قد کا کوئی انسان یا شاید کوئی معذور شہری سمجھا تھا، وہ دراصل ایک بچہ تھا، جس کی عمر صرف پانچ چھ سال تھی۔
 

ویڈیو وائرل ہو گئی
اس واقعے کی پولیس اہلکار نے معمول کے مطابق ویڈیو بھی بنا لی تھی، جسے بعد میں یوٹیوب پر پوسٹ کر دیا گیا۔ پیر چار مئی کو پیش آنے والے اس واقعے کی ویڈیو یوٹیوب پر اب تک آٹھ لاکھ سے زائد مرتبہ دیکھی جا چکی ہے۔ اس ویڈیو میں دیکھا جا سکتا ہے کہ پولیس افسر نے ڈرائیور سے اس کی عمر پوچھی، تو جواب اور بھی حیران کن تھا۔ اس پر اس ہائی وے پولیس اہلکار نے بس اتنا ہی کہا، ''تمہاری عمر صرف پانچ سال ہے؟ ہیں؟‘‘

پولیس افسر نے اس لڑکے سے اس کے کوائف کے علاوہ یہ بھی پوچھا کہ اس نے ڈرائیونگ کہاں سے سیکھی تھی؟ اس پر بچے نے اپنا نام پتا بھی بتا دیا اور یہ بھی کہا کہ اس نے گاڑی چلانا کسی ڈرائیونگ اسکول سے تو نہیں سیکھا۔ پولیس نے اس بچے کے بہت کم عمر ہونے کی وجہ سے اس کے ذاتی کوائف ظاہر نہیں کیے۔
 

ارادہ ریاست کیلی فورنیا جانے کا تھا
دلچسپ بات اس پانچ سالہ لڑکے کا پولیس کو یہ بتانا بھی تھی کہ اس کی اپنی والدہ کے ساتھ اس بارے میں بحث ہو گئی تھی کہ ماں کو اپنے اس بیٹے کو ایک لیمبورگینی گاڑی لے کر دینا چاہیے۔ ماں نے انکار کیا، تو بچہ خود ہی گیراج سے گاڑی نکال کر اپنے لیے لیمبورگینی لینے نکل پڑا۔

اس واقعے کی پولیس کی طرف سے کی گئی ایک ٹویٹ کے مطابق، ''اس بچے نے بتایا کہ وہ ریاست کیلی فورنیا جانے کے لیے گھر سے نکلا تھا، جہاں سے وہ اپنے لیے ایک لیمبورگینی خریدنا چاہتا تھا۔‘‘

بٹوے میں صرف تین ڈالر
ساتھ ہی پولیس کی اس ٹویٹ میں یہ بھی کہا گیا، ''اپنی من پسند گاڑی خریدنے کے لیے شاید اس کے پاس موجود رقم ناکافی ہوتی۔ اس کے بٹوے میں صرف تین ڈالر تھے!‘‘

اس ٹویٹ اور ویڈیو کے شائع کیے جانے کے بعد پولیس کو مزید معلومات کے لیے کی جانے والی درخواستوں کی بھرمار ہو گئی، تاہم حکام نے اس بچے کے بارے میں مزید کچھ بھی بتانے سے انکار کر دیا۔ اس 'ڈرائیور‘ کو بعد ازاں اس کی گاڑی سمیت بحفاظت اس کے گھر پہنچا دیا گیا تھا۔

لیمبورگینی اٹلی کی بنی ہوئی ایک ایسی انتہائی تیز رفتار لگژری سپورٹس کار ہوتی ہے، جو انتہائی مہنگی ہوتی ہے۔