روزانہ استعمال ہونے والی عام اشیاﺀ کے حیرت انگیز کمالات، کئی مسائل کا حل

ہم روزانہ ہی گھر میں چھوٹے چھوٹے مسائل کا شکار ہوتے ہیں جن کا ہمیں اس وقت حل بھی سمجھ نہیں آرہا ہوتا- لیکن حقیقت میں ان مسائل کا حل ہمارے اپنے گھر میں ہی استعمال ہونے والی روزمرہ کی چند عام چیزوں میں موجود ہوتا ہے جس سے ہم لاعلم ہوتے ہیں- آج ہم آپ کو ایسے ہی چند گھریلو مسائل اور ان کے حل کے بارے میں بتائیں گے-

کی بورڈ کی صفائی

اگر آپ کے پاس کمپیوٹر ڈسٹر نہیں ہے تو کوئی مسئلہ نہیں- کان صاف کرنے والی کاٹن بڈ آپ کا یہ مسئلہ حل کرسکتی ہے- اس کے ذریعے آپ کی بورڈ کی کیز کے درمیان سے کچرا نکال سکتے ہیں- کاٹن بڈ معمولی مقدار میں ایک خاص الکوحل سے نم ہوتا ہے اور بہترین صفائی کرتا ہے-

جوتوں کے نیچے چیونگم

جوتوں کے نیچے چیونگم کا چپکنا الجھن کا باعث بنتا ہے- لیکن آپ چیونگم پر ڈبلیو ڈی 40 کا اسپرے کر کے باآسانی اس الجھن سے چھٹکارا پا سکتے ہیں-

ڈھیلا چشمہ

اگر آپ کو اپنے چشمے کے پیچ اکثر و بیشتر سخت کرنے کی ضرورت پڑتی ہے تو ان پر برش سے نیل پالش لگا دیں- یہ انہیں اس وقت تک سخت رکھے گی جب تک آپ چشمے کی باقاعدہ مرت نہیں کروا لیتے-

پانی کی بوتل کا چھڑکاؤ کے لیے استعمال

منرل واٹر کی بوتل استعمال کے بعد پھینکیے مت بلکہ اسے دوبارہ قابلِ استعمال بنائیں- اس بوتل کو آپ اپنے پودوں پر پانی کے چھڑکاؤ کے لیے استعمال کرسکتے ہیں- چھری کی مدد سے بوتل میں باریک باریک سوراخ کردیں اور پھر بوتل کو پانی کے پائپ یا نل کے آگے لگا کر استعمال کریں اور فائدہ اٹھائیں-

پرانی آئس کیوب ٹرے

پرانی آئس کیوب ٹرے کو پھینکیے مت یہ بھی کام آسکتی ہے- آپ اس میں گھر پر تیار کردہ مکھن کے کیوب بنا سکتے ہیں- یہ مکھن کے کیوب ذخیرہ کرلیں اور جب بھی کھانا تیار کرنے لگیں انہیں پہلے سے موجود مکھن کے کیوب کو کھانے میں شامل کرلیں-

جھمکے کا اسٹاپر

اکثر خواتین اس پریشانی کا شکار دکھائی دیتی ہیں کہ ان کے جھمکوں کے پیچھے لگنے والے اسٹاپر گم جاتے ہیں جن کے بغیر جھمکوں یا کانٹوں کا پہننا ناممکن ہوجاتا ہے- لیکن آپ ان کی جگہ مٹانے کے لیے استعمال ہونے والے ربڑ کے چھوٹے ٹکڑوں کا بھی استعمال کرسکتی ہیں-

کپڑوں میں مہک

صابن کی مدد سے آپ اپنے کپڑوں کو 24 گھنٹے مہکتا ہوا رکھ سکتے ہیں- الماری میں اپنے کپڑوں کے درمیان ایک صابن رکھ دیجیے اس کی خوشبو کپڑوں میں بھی برقرار رہے گی-

زپ کا پھنسنا

اکثر جب ہم جلدی میں ہوتے ہیں تو عین اس وقت ہماری کسی نہ کسی چیز کی زپ پھنس جاتی ہے جس کا حل بھی ہمیں سمجھ نہیں آرہا ہوتا- ایسی صورتحال میں اگر آپ زپ جہاں پھنسی ہے اس مقام پر موم لگائیں تو باآسانی اس پریشانی سے چھٹکارا حاصل کرسکتے ہیں-