جامعہ القرويين: دنیا کی قدیم ترین یونی ورسٹی

تو ذکر ہو رہا تھا مراکش کے تاریخی شہر فیض کی جامعہ القرويين کا، جو دنیا کی قدیم ترین ایسی یونی ورسٹی ہے جو آج تک قائم و دائم ہے۔اس کے مقابلے میں قاہرہ کی جامعہ الازہر 971ء میں قائم کی گئی تھی، گویا عمرمیں یہ القرویین سے 112 برس چھوٹی ہے۔

ابھی فیض نیا نیا آباد ہوا تھا کہ اس کے حکمران نے یہ دعا مانگی: ’اے خدا، اس شہر کوایسا علمی مرکز بنا دے جہاں قانون، سائنس اور تیری کتاب کی تعلیم دی جائے۔

اس حاکم کی دعا یوں قبول ہوئی کہ ایک متموّل سوداگر کی بیٹی فاطمہ الفہری نے اپنے باپ کے مرنے کے بعد ترکے میں ملنے والی دولت سے ایک عظیم الشان مسجد بنانے کا تہیا کرلیا۔ جب مسجد بنی تو اس زمانے کے رواج کے مطابق اس کے ساتھ ایک مدرسہ بھی قائم کیاگیا۔ یاد رہے کہ جامعہ الازہر کا آغاز بھی مسجد سے ملحق مدرسے کے طور پر ہواتھا۔

جب فاطمہ کا مدرسہ چل پڑااور اس میں دور دور سے طلبا علم کی پیاس بجھانے کے لیے آنے لگے تو اس عہد کے سلاطین بھی متوجہ ہوئے بغیر نہ رہ سکے اور انہوں نے اس مدرسے کو اپنی سرپرستی میں لے لیا۔ جلد ہی وہ وقت آیا کہ جب مدرسے میں پڑھنے والے طلبا کی تعداد آٹھ ہزار سے تجاوز کر گئی۔ آنے والی صدیوں میں مسجد اور مدرسے میں مسلسل توسیع ہوتی رہی اور مدرسہ جامعہ القرویین کہلانے لگا۔

جامعہ القرویین میں صرف دینی علوم ہی نہیں بلکہ دنیاوی علوم بھی پڑھائے جاتے تھے جن میں صرف و نحو، منطق، طب، ریاضی، فلکیات، کیمیا، تاریخ اور حتیٰ کہ موسیقی تک شامل تھے۔

جامعہ سے اسلامی تاریخ کی کئی بلند قامت شخصیات وابستہ رہی ہیں، ہم پہلے ہی عظیم صوفی شیخ الاکبر ابن العربی اور تاریخ دان ابنِ خلدون کا ذکر کر چکے ہیں۔