پیروں میں انگوٹھی اور درخت سے شادی۔۔۔ انڈیا کے ایسے انوکھے رواج جو دنیا میں کہیں نہیں پائے جاتے

مختلف رواجوں اور دنیا کی قدیم ترین ثقافتوں سے مزین بھارت آبادی کے لحاظ سے دنیا کا دوسرا بڑا ملک ہے۔ انڈیا میں چھوٹی بڑی کئی ریاستیں ہیں جہاں کچھ ایسے رواج پائے جاتے ہیں جو دنیا میں کہیں اور نہیں ہوتے۔ تو چلیے جانتے ہیں انڈیا کے ان عجیب و غریب رواجوں کے بارے میں

پیروں میں انگوٹھی

دنیا بھر میں شادی یا منگنی کے موقع پر دلہن کو ہاتھ میں انگوٹھی پہنائی جاتی ہے۔ لیکن انڈیا میں شادی شدہ خاتون کو پیروں میں انگوٹھی پہننی ضروری ہے جسے "بچھیا" کہا جاتا ہے۔ یہ چاندی کی انگوٹھی ہوتی ہے جس کا مقصد یہ ہوتا ہے کہ چاندی جسم کے تمام زہریلے مادے نکال کے باہر پھینک دیگی

سانپوں کا تہوار

انڈیا میں اکثریت کا تعلق ہندو مذہب سے ہے اور ہولی اور دیوالی جیسے تہوار بڑے پیمانے پر منائے جاتے ہیں۔ لیکن ایک تہوار "ناگ پنچھمی" کے نام سے منایا جاتا ہے جو دنیا میں اپنی نوعیت کا انوکھا تہوار اس لیے ہے کیونکہ اس تہوار میں سانپوں کی پوجا کی جاتی ہے اور لاکھوں سانپوں کو دودھ بھی پلایا جاتا ہے

بڑی مونچھوں والی پولیس

انڈیا میں پولیس کو کافی اہمیت حاصل ہے جس کی ایک وجہ یہ ہے کہ انڈیا کی پولیس شہریوں کو ڈسپلن کا پابند کرنے کے نت نئے طریقے اپناتی ہے۔ حال ہی میں کورونا وبا کے دوران شہریوں کا ماسک کا پابند کرنے کے لئے پولیس اہلکاروں نے سڑکوں پر کورونا وائرس کا ماسک پہن کر گھومنا شروع کردیا تھا۔ لیکن ایک اور انوکھی بات ہے جو انڈین پولیس کو دنیا بھر کی پولیس سے ممتاز کرتی ہے اور وہ یہ کہ انڈیا میں جس پولیس اہلکار کی مونچھیں بڑی ہوتی ہیں اسے زیادہ تنخواہ دی جاتی ہے۔ اس لئے پولیس اہلکار بڑی بڑی مونچھیں رکھتے ہیں۔ مونچھوں رکھنے کا رواج ڈالنے کا مقصد پولیس اہلکاروں کی شخصیت کو بارعب بنانا ہے

میکڈونلڈز اور سبزیاں

انڈیا میں تقریبا 40 آبادی کسی قسم کا گوشت نہیں کھاتی اس لیے عوام کی پسند کو مدنظر رکھتے ہوئے میکڈونلڈز نے خاص قسم کے سبزیوں والے برگر متعارف کروائے ہیں۔ جن میں چکن پیٹیز کی جگہ مٹر اور آلو سے بنے پیٹیز ڈالے جاتے ہیں

گائے کو انسانوں کی طرح اہم سمجھا جاتا ہے

ہندو مذہب کے مطابق گائے مقدس ہوتی ہے اس لیے انڈیا میں گائے سڑکوں پر آزادانہ گھوم پھر سکتی ہیں انھیں نہ کوئی چوری کرتا ہے نہ ہی ان کو تنگ کرسکتا ہے۔ یہاں تک کہ اگر گائے راستے میں آجائے تو پیچھے کتنا بھی ٹریفک جام ہوجائے جب تک گائے خود وہاں سے نہیں چلی جاتی کوئی اسے نہیں ہٹائے گا

درختوں سے شادی

منگل کو پیدا ہونے والے افراد کو بھارت کے دیہی علاقوں میں اچھا نہیں سمجھا جاتا اور انھیں "مانگلک" کہا جاتا ہے۔ ان کی شادی عام لوگوں کے بجائے درختوں سے کروائی جاتی ہے۔ یہ شادیاں قانونی درجہ نہیں رکھتیں اور سرکاری سطح پر ان رواجوں کی حوصلہ شکنی کی جاتی ہے