امیروں کے چونچلے 43 ہزار کی ایک پلیٹ بریانی، لاکھوں کروڑوں میں بکنے والی عام چیزوں کے بارے میں جانیں

انسان کو زندہ رہنے کے لیے تین ٹائم کھانا، پانی اور سر پر ایک سایہ چاہیے ہوتا ہے اگر ہر انسان ایک جیسی خواہشات اور ضروریات اپنا لے تو اس دنیا میں کوئی انسان بھوکا نہ سوئے اور نہ ہی کوئی انسان بغیر چھت کے ہو لیکن ایسا عام طور پر ہوتا نہیں ہے- بلکہ امیر افراد اپنی عام استعمال کی کچھ چیزوں کو اتنے مہنگے داموں خرید لیتے ہیں کہ ان کو دیکھ کر عام انسان احساس کمتری کا شکار ہو جاتے ہیں۔ ایسی ہی کچھ چیزوں کے بارے میں ہم آپ کو آج بتائيں گے -

43 ہزار روپے کی ایک پلیٹ بریانی

بریانی ہمارے ملک کے لوگوں کی پسندیدہ ترین خوراک ہے جس کی عام طور پر ایک پلیٹ ڈیڑھ سو روپے سے لے کر پانچ سو تک بازار میں دستیاب ہے۔ اس میں ایک پلیٹ بریانی میں چاول، چکن یا بیف یا مٹن اور آلو موجود ہوتا ہے بعض جگہوں پر اس کے ساتھ رائتہ اور سلاد بھی دی جاتی ہے۔ یہ ایک پلیٹ چاول ایک عام انسان کے ایک ٹائم کے لیے کافی ہوتی ہے جس سے پیٹ بھر جاتا ہے- مگر دبئی میں بمبئی بریانی کے نام سے ایک ایسا ریسٹورنٹ بھی ہے جہاں پر بریانی کی ایک پلیٹ کی قیمت 43 ہزار تک ہے اور اس کی وجہ اس کے اندر موجود 23 قیراط کھانے کے قابل سونے کی شمولیت ہے- یہ بریانی گولڈن رنگ کی ایک تھالی میں سرو کی جاتی ہے جس میں تقریباً 3 کلو تک کے چاول ہوتے ہیں جس میں آلو، ابلے انڈے بھنے ہوئے میوہ جات، انار پیاز اور پودینہ شامل ہوتا ہے- اس کے علاوہ زعفران کے رنگ میں رنگے ان چاولوں کے ساتھ بھنا ہوا گوشت بھی موجود ہوتا ہے جن کے علاوہ اس میں ریشمی کباب چکن کباب ،مغلئی کوفتے، اور ملائی چکن روسٹ بھی شامل ہوتا ہے- اس سب کے اوپر سونے کے ورق لگے ہوتے ہیں جو کہ اس کے ذائقے میں اور طاقت میں مزید اضافے کا باعث ہوتے ہیں-

بارہ کروڑ کا ٹوائلٹ پیپر

ٹوائلٹ پیپر وہ کم قیمت ہلکی کوالٹی کے کاغذ ہوتے ہیں جن کا استعمال انسان ٹوائلٹ میں رفع حاجت کے بعد کرتے ہیں اور اس کے بعد ان کو فلش کر دیا جاتا ہے- مگر امیروں کو جب پیسے کہیں خرچ کرنے کی جگہ نہیں ملتی تو وہ اس پیسے کو ایسے فلش میں بہاتے ہیں- ایسا ہی کچھ ایک آسٹریلوی کمپنی نے 24 قیراط سونے کے ٹوائلٹ پیپر بنا کر کیا جس کی مالیت ڈيڑھ ملین ڈالر جو پاکستانی بارہ کروڑ کے برابر ہے- اس کمپنی نے یہ سونے کے بنے ہوئے رول بیچنے کے لیے پیش کر دیے ہیں اور اس کے ساتھ ساتھ وہ یہ رول خریدنے والے کو ایک بوتل شیمپئين کی بھی مفت دیں گے-

دو لاکھ روپے کا موزوں کا جوڑا

عام طور پر جرابیں ہمارے کپڑوں کو وہ حصہ ہوتی ہیں جس کو بہت کم قیمت سمجھا جاتا ہے مگر جرمنی کی ایک کمپنی فلیک نے ایسے موزے بیچنے کے لیے مارکیٹ میں پیش کیے جو کہ خاص قسم کی اون ویکیونا سے تیار کیا گیا ہے اور یہ صرف دس جوڑے موزوں کے ہی بنائے گئے ہیں اور فی جوڑا دو لاکھ روپے کا فروخت کرنے کے لیے پیش کیا گیا ہے-

ساڑھے بائیس لاکھ کی پینسل

جرمنی کی کمپنی فیبر کیسل نے اپنی سالگرہ کے موقع پر یہ پینسل فروخت کے لیے پیش کی جس میں لکھنے کے لیے عام لیڈ کے سکے کا ہی استعمال کیا گیا ہے- مگر اس کے بنانے میں صندل کی لکڑی کا استعمال کیا گیا ہے جس کے ساتھ ساتھ وائٹ گولڈ سے اس کے ڈھکن کو بنایا گیا جس کی وجہ سے اس پنسل کی قیمت بائیس لاکھ روپے تک جا پہنچی ہے-