میں نے اس کے مذہب کو تبدیل کرنے کی کبھی کوشش نہیں کی، مسلمان ماں نے ہندو بیٹی کو پال کر ایک مثال قائم کر دی

ہندوستان کے حوالے سے آئے دن یہ خبریں سننے میں آتی ہیں کہ وہاں مسلمانوں اور ہندو مذہب کے لوگوں کے درمیان کھنچاؤ کی کیفیت ہے اور اس حوالے سے اکثر کچھ علاقوں میں تو دنگا فساد کی خبریں بھی سننے میں ملتی ہیں- جس کی وجہ سے اکثر لوگوں کا یہ خیال ہے کہ جیسے اس ملک میں ہندو مسلم افراد کے درمیان ایک تناؤ کی کیفیت ہر جگہ اور ہر وقت موجود ہوتی ہے-

مگر حال ہی میں سوشل میڈیا کے ذریعے عرفانہ بانو نامی ایک خاتون کی جانب سے ایک ویڈیو سامنے آئی جس میں اس عورت نے بتایا کہ وہ بھارت کی جنوبی ریاست تلنگانہ کے ضلع کاماریڈی کے ایک اسکول میں بطور پرنسپل فرائض انجام دے رہی ہیں-

رجیتا ان کے اسکول کی طالبہ تھیں ان کا اسکول ایک ودھیالہ بھی تھا جہاں پر طالبات دن رات رہائش بھی رکھتی تھیں رجیتا کے والد اس کی کم عمری میں ہی اس کی والدہ کو چھوڑ کر لاپتہ ہو گئے تھے جب کہ رجیتا کی ماں کا انتقال اس وقت ہو گیا تھا جب کہ رجیتا کی عمر صرف آٹھ سال تھی-

رجیتا کو اس کی ماسی عرفانہ بانو کے پاس لے کر آئی تھیں کہ اس بچی کو اپنے شوہر کی مخالفت کے سبب وہ اپنے ساتھ نہیں رکھ سکتیں۔ حالات کو دیکھتے ہوئے عرفانہ بانو نے رجیتا کو گود لینے کا فیصلہ کر لیا اور انہوں نے اس ودھیالہ میں ہی رجیتا کی تعلیم کا سلسلہ جاری رکھا- چھٹی کے دنوں میں وہ ان کو اپنے گھر لے جاتی تھیں اور ان کو اپنے باقی بچوں کی طرح ہی اس کی دیکھ بھال بھی کرتی تھیں-

میٹرک کے بعد رجیتا مستقل طور پر ہی عرفانہ بانو کے گھر پر ہی رہنے لگی جہاں اس کو وہ تمام حقوق حاصل تھے جو کہ باقی بچوں کو تھے- مگر عرفانہ بانو نے کبھی اس کے مذہب کو تبدیل کروانے کی کوشش نہ کی۔ اس حوالے سے عرفانہ بانو کا یہ بھی کہنا تھا کہ وہ ایک باعمل مسلمان ہیں اور رمضان کے مہینے میں ان کی سحری اور افطاری کی تیاری رجیتا کی ہی ذمہ داری ہوتی تھی جس کو وہ بصد شوق اور اہتمام کے کرتی تھی-

کالج میں انٹرکی تعلیم کے بعد انہوں نے اس کو میڈیکل لیبارٹری ٹیکنالوجی کا کورس بھی کروایا تعلیم کی تکمیل کے بعد جب کہ وہ اپنی دو بیٹیوں کی شادی کر چکی تھیں- انہوں نے رجیتا کی شادی کا بھی سوچا اور اس کے مذہب کے مطابق اس کے لیے ایک ہندو گھرانے کے رشتے کا انتخاب کیا-

رجیتا کے لیے انہوں نے جس لڑکے کا انتخاب کیا وہ پڑوسی گاؤں کا تھا اس کا نام وینکٹ رام تھا اور وہ پیشے کے اعتبار سے الیکٹریشن تھا۔ رجیتا کے رشتے کے 20 دن کے اندر اندر چٹ منگنی اور پٹ بیاہ ہو گیا-

اس شادی میں رجیتا کا کنیا دان یا رخصتی ماں اور باپ بن کر عرفانہ بانو اور ان کے شوہر نے کی اس حوالے سے عرفانہ بانو اپنے شوہر کی تعریف کرتے ہوئے کہنا ہے کہ ان کے تعاون کے بغیر یہ سب کرنا ان کے لیے ممکن نہ تھا-

عرفانہ بانو کا یہ بھی کہنا تھا کہ انہوں نے کبھی بھی رجیتا کے مذہب کو تبدیل کروانے کی کوشش نہیں کی اور ان کا یہ ماننا تھا کہ مذہب ہر انسان کا ایک ذاتی معاملہ ہوتا ہے اور اس کے لیے وہ آزاد ہوتا ہے تاہم یہ واقعہ ایک مثال کے طور پر نہ صرف دیکھا جا رہا ہے بلکہ سوشل میڈیا صارفین اس کو بہت سراہا بھی رہے ہیں-

< Previous یورپ میں مسلمانوں کی تیزی سے بڑھتی تعداد --- جانیے 5 حیران کن حقائق NEXT > بھوک نے اتنا مجبور کر دیا کہ ہاتھ جوڑ کر سوشل میڈیا پر مدد مانگ لی، ان بچیوں کے ساتھ باپ اور بھائی نے ایسا کیا کر دیا کہ یہ اس عمل پر مجبور ہو گئیں