ڈینگی سے محفوظ رہنا ہے تو ان سستی اشیا کو خاص طریقے سے جسم پر لگائیں اور مچھر دور بھگائیں

ابھی ہمارا ملک کرونا کے نقصانات کو ہی پورا کر رہا تھا کہ اس وقت ملک بھر میں ڈینگی کی وبا نے شدت اختیار کر لی ہے- مچھروں کے کاٹنے سے پھیلنے والا ڈینگی وائرس بھی جان لیوا ثابت ہو سکتا ہے اور اس کی شرح میں بھی تیزی سے اضافہ دیکھنے میں آرہا ہے-

جس طرح کرونا وائرس کے پھیلاؤ کی صورت میں ماسک اور سینی ٹائزر مارکیٹ میں نایاب ہو گئے تھے اسی طرح ڈینگی کے پھیلاؤ کے بعد مچھر مارنے والے اور مچھر دور بھگانے والے کیمیکلز موپسل وغیرہ کی بلیک میں فروخت نے ان کی قیمتوں میں بھی اضافہ کر دیا ہے- اس کے علاوہ ان کے زہریلے اثرات بچوں کے لیے خطرناک بھی ثابت ہو سکتے ہیں-

اس حوالے سےآج ہم آپ کو گھر پر ہی انتہائي کم قیمت ایسے لوشن بنانے کی ترکیب بتائیں گے جن کو جلد پر لگانے سے مچھر آپ سے دور رہنے پر مجبور ہو جائیں گے اور آپ ڈينگی سے محفوظ رہ سکیں گے اس کے علاوہ ان کے زہریلے اثرات بھی نہیں ہوتے ہیں-

لیمن یوکلپٹس آئل

لیمن یوکلپٹس آئل میں ایسے کیمیکل پائے جاتے ہیں جو مچھروں کو دور بھگاتے ہیں اس کی تیاری کے لیے مارکیٹ میں آسانی سے لیمن یوکلپٹس آئل اور ناریل کا تیل مل سکتا ہے- اس کے لیے دس ملی لیٹر لیمن یوکلپٹس آئل لے لیں اور اس کو 90 ملی لیٹر ناریل کے تیل میں ملا لیں آمیزے کو اچھی طرح ہلا لیں اور جلد پر لگائیں- اس کی خوشبو متاثر کن ہوتی ہے اس کے علاوہ یہ جلد کے لیے بھی مفید ہونے کے ساتھ مچھروں کو دور بھگاتا ہے-

پودینے کا تیل اور ناریل کا تیل

اس لوشن کی تیاری کے لیے بارہ قطرے پودینے کا تیل لے لیں اور اس کو 30 ملی لیٹر ناریل کے تیل میں شامل کر لیں اور اس کو کسی اسپرے والی باتل میں ڈال ہیں اس کوجسم کے کھلے حصوں میں لگا لیں اور خود کو مچھروں سے محفوظ رکھیں-

نیم کا تیل اور ناریل کا تیل

نیم کا تیل جلد کے لیے کئی حوالوں سے بہت مفید ہوتا ہے مگر مچھروں کو دور بھگانے کے لیے دس قطرے نیم کے تیل کے 30 ملی لیٹر ناریل کے تیل میں شامل کر دیں اور اس کو جلد پر لگائیں اس سے ایک جانب تو جلد پر کسی قسم کا انفیکشن نہیں ہو گا اور مچھر بھی کاٹ نہیں سکیں گے-

لہسن کا اسپرے

لہسن ویسے تو کئی حوالوں سے صحت کے لیۓ مفید ہے مگر اس کا اسپرے مچھر دور بھگانے میں بھی بہت مددگار ثابت ہوتا ہے- اس کے لیے چھ سے سات لہسن کی پھانکیں لے لیں اور ان کو پیس کو ان پر زیتون کے تیل کی ایک چمچ شامل کر لیں اس کو رات بھر اسی حالت میں رہنے دیں اور صبح اٹھ کر لہسن کو نچوڑ لیں- اس کے بعد دو کپ پانی اور ایک چمچ لیموں کے رس میں لہسن کے اس رس کو شامل کر کے اس کو کسی اسپرے والی بوتل میں ڈال لیں بوقت ضرورت یہ اسپرے مچھر دور بھگانے میں بہت معاون ثابت ہو سکتا ہے-