یہ مجھے اپنی جان سے بھی زيادہ عزیز ہے، مگر کیا آپ جانتے ہیں کہ آپ اپنی مہنگی اور قیمتی چیزیں اپنے ہاتھوں سے برباد کرتے ہیں

ہر انسان کے کچھ خواب ہوتے ہیں کچھ خواہشات ہوتی ہیں جن کے حصول کے لیے وہ محنت کرتا ہے یہ خواب کچھ مادی اشیا کا حصول بھی ہو سکتا ہے۔ جیسے مہنگا فون، مہنگی گاڑی، لیپ ٹاپ وغیرہ وغیرہ ۔ ان اشیا کی جتنی قیمت زیادہ ہوتی ہے ان کی خریداری کے لیے اتنی ہی قربانی دی جاتی ہے- اس موقع پر آپ سے اگر کوئی یہ کہہ دے کہ آپ اپنے ہاتھوں سے ان چیزوں کو برباد کر رہے ہیں تو آپ حیران رہ جائيں گے- لیکن یہ حقیقت ہے کہ ہم لاشعوری طور پر اور اپنی کم علمی کے سبب کچھ ایسے کام کر رہے ہوتے ہیں جو ان اشیا کی عمر کو کم کرنے کا سبب بن رہی ہوتی ہیں-

قیمتی موبائل اور لیپ ٹاپ کی عمر کو کم کرنے والے اقدامات

چارجنگ پورٹ کو دھاتی پن سے صاف کرنا

چارجنگ پورٹ میں کسی بھی دھاتی چیز کو داخل کرنے کی صورت میں اس کی صفائی کے بجائے اس کی سطح پر اسکریچ پڑ جاتے ہیں جو مزید مسائل کا سبب بن سکتے ہیں- اور اس سے موبائل فون کے اور لیپ ٹاپ کے چارج کرنے کی صلاحیت میں بھی کمی واقع ہو سکتی ہے-

براہ راست سورج کی روشنی میں رکھنا

اگر زيادہ دیر تک موبائل فون کو دھوپ کی روشنی میں رکھا رہنے دیا جائے تو وہ اس پر مختلف قسم کے منفی اثرات مرتب کر سکتا ہے ۔ اس حوالے سے ممکن ہے کہ اگر چارجنگ کے دوران فون دھوپ میں پڑا ہو تو اس کا چارجنگ کا عمل سست ہو سکتا ہے- لیپ ٹاپ اور موبائل فون کی اسکرین دھوپ کو جزب کر کے اندر سے گرم ہو سکتا ہے جس کی وجہ سے آگ بھی لگ سکتی ہے یا بیٹری پھٹ کر ناکارہ بھی ہو سکتی ہے-

فون اور لیپ ٹاپ کو پانی میں لے جانا

آج کل اکثر کمپنیاں واٹر پروف فون بنانے کا دعویٰ کر رہی ہیں مگر ان کے دعویٰ کو جانچنے کے لیے اپنی ان قیمتی اشیا کو پانی میں لے کر جانا یا ان کو پانی ڈالنا ایک ہوشمندانہ عمل نہیں ہے- کیونکہ الیکٹرونکس اشیا کو پانی میں لے جانا ان کی عمر کم کرنے کا سبب بن سکتا ہے-

کمپیوٹر کے کی بورڈ کو گندہ رکھنا

کچھ لوگ کمپیوٹر کے اوپر جمع ہونے والی دھول مٹی کو صاف نہیں کرتے ہیں جس کی وجہ سے ان کے کی بورڈ کے بٹن کے اندر میل جمع ہو کر اس کو خراب کرنے کا سبب بھی بن جاتے ہیں اور صرف صفائی نہ کرنے کے سبب ‍قیمتی لیپ ٹاپ خراب بھی ہو سکتا ہے-

ٹوائلٹ میں موبائل فون کا استعمال

جو لوگ ٹوائلٹ جاتے ہوئے اپنا موبائل فون ساتھ لے کر جاتے ہیں درحقیقت وہ اپنے اس جان سے قیمتی ساتھی کی جان کو خطرے میں ڈال رہے ہوتے ہیں کیوں کہ ایک جانب تو اس کے پانی میں گرنے کا اندیشہ ہوتا ہے اور دوسری طرف اس میں نمی کے جانے کی وجہ سے اس کے اندر خرابی بھی ہو سکتی ہے-

لیپ ٹاپ کو اسکرین کی طرف سے اٹھانا

لیپ ٹاپ کو اگر اسکرین کی جانب سے اٹھایا جائے گا تو یاد رکھیں کہ اسکرین بہت نازک چیز ہے اور ذرا سے دباؤ سے اس کی خرابی کا اندیشہ ہوتا ہے اس وجہ سے اس کو اٹھانے میں اس بات کی خاص احتیاط ضروری ہے کہ اس کو اسکرین سے نہ اٹھایا جائے-

عام گھریلو صفائی کے سامان سے قیمتی اشیا کی صفائی

اسفنج کو پانی اور سرف میں بھگو کر اس سے اسکرین کو صاف کرنے سے بظاہر تو یہ چیزیں برتنوں کی طرح چمک جائيں گی- مگر یاد رکھیں یہ برتن نہیں ہیں بلکہ بہت نازک الیکٹرونکس ہیں اور جب ان کے اندر پانی یا سرف کی نمی پہنچتی ہے تو وہ اس کی خرابی کا سبب بن جاتی ہے-