کیا آپ کسی بات سے پریشان ہیں۔۔۔ چند آسان ٹپس جو آپ کو اس کیفیت سے نکال سکتی ہیں

آپ گھر میں ہوں یا دفتر میں کبھی بھی باس کی جھاڑ یا کام کا انبار اکثر آپ کا موڈ خراب کردیتا ہے اور آپ اکثر کام کے دباؤ اور پریشانی کی وجہ سے اداسی کا شکار رہتے ہیں تو ہم آپ کو بتاتے ہیں چند ایسے طریقے جن کی مدد سے آپ اپنا موڈ بہتر بناسکتے ہیں۔ تناؤ کا درست انداز سے مقابلہ کرنے سے آپ کو نفسیاتی اور جسمانی طور پر بہتر محسوس کرنے میں مدد ملے گی اور آپ کی کارکردگی پر مثبت اثر پڑے گا۔ تناؤ سے نمٹنے کے مختلف طریقے ہوتے ہیں کچھ آپ کو وقتی طور پر ڈپریشن سے نکال سکتے ہیں لیکن مستقل مدد نہیں کرتے جبکہ بعض طریقوں کے منفی نتائج بھی سامنے آتے ہیں تو آئیے دیکھتے ہیں کہ کن چند آسان ٹپس سے آپ اپنی ڈیریشن کو دور بھگا سکتے ہیں۔

اپنے جسم کو آرام دیں

جسمانی سرگرمیوں کو کم کرنے سے بھی آپ کو ڈپریشن کم کرنے میں مدد مل سکتی ہے، ذہنی تناؤ کے دوران کوئی محنت طلب کام کرنے کے بجائے آرام کرنے کی کوشش کریں۔ مراقبہ کریں اس سے آپ کو تکلیف دینے والے احساسات کو ذہن سے مٹانے میں مدد ملے گی ۔

جذبات کا اظہار

تناؤ کی ایک بڑی وجہ یہ بھی ہوتی ہے کہ ڈپریشن کے دوران آپ اپنے آپ سے الجھ رہے ہوتے ہیں اور آپ کا ذہن بری طرح ماؤف ہونے لگتا ہے لیکن اگر آپ کسی دوست یا قریبی شخص سے اپنی پریشانی کا اظہار کریں گے تو آپ کو تناؤ کی کیفیت سے نکلنے میں بڑی حد تک مدد مل سکتی ہے۔

مزاح

تناؤ کا شکار افراد خود کو الگ تھلگ رکھنے کی کوشش کرتے ہیں اور بات بے بات بھڑک اٹھتے ہیں اور معمولی سی باتوں کو بھی بہت بڑا سمجھ لیتے ہیں لیکن اگر تناؤ کی کیفیت دور کرنا چاہتے ہیں تو ہنسی مذاق کی کوشش کریں اس سے آپ کے موڈ پر فرق پڑے گا جس سے رفتہ رفتہ آپ کا ڈپریشن کم ہوجائے گا۔

مسئلے کا حل تلاش کریں

مشکلات اور پریشانیاں ہر انسان کی زندگی میں آتی ہیں لیکن کچھ لوگ ان سے مقابلہ کرتے ہیں تو کچھ انہیں اپنے سر کا بوجھ بناکر ڈپریشن کا شکار ہوجاتے ہیں لیکن اگر آپ ان مسائل کا حل تلاش کرنے کی کوشش کریں گے تو کوئی نہ کوئی حل ضرور ملے گا اور آپ غیر ضروری تناؤ کی کیفیت سے بھی چھٹکارہ حاصل کرلیں گے۔

< Previous دنیا کے مختلف ممالک کی کرنسی کے ناموں کے پیچھے چھپے دلچسپ حقائق NEXT > ذہنی صلاحیتوں کو بڑھانا چاہتے ہیں ان سوالات کے جواب ڈھونڈیں اور اپنے بارے میں جانیں - جوابات