سب برا نہیں کچھ اچھا بھی ہے... پاکستان کی وہ 10 خصوصیات جو شائد بہت کم لوگ ہی جانتے ہوں گے؟

پاکستان کے حوالے سے اکثر لوگوں نے اپنے ذہن میں ایک منفی نقشہ قائم کر رکھا ہے اور جب آپ کی سوچ کسی منفی چیز سے شروع ہو تو اس کا اختتام بھی منفی ہی ہوتا ہے لیکن اگر آپ حقیقت کی نظر سے پاکستان کو دیکھیں گے تو آپ کو یقیناً صرف دس نہیں بلکہ لاتعداد خوبیاں نظر آئیں گی۔ تو آئیے آج ہم پاکستان کی وہ خصوصیات آپ سے شیئر کرتے ہیں جنہیں دنیا تو قدر کی نگاہ سے دیکھتی ہے لیکن شائد جن سے ہمارے اپنے خاص طو ر نوجوان پوری طرح آگاہ نہ ہوں۔

بہترین پائلٹ اور بڑی فوج

پاکستان کے پاس دنیا کے بہترین پائلٹ اور بڑی فوج موجود ہے جو اقوام متحدہ کے امن مشنز میں بھی سرگرم ہے۔ پاکستان نے اب تک اقوام متحدہ کے46امن مشنوں میں حصہ لیا اور دنیا بھر میں دو لاکھ سے زائد فوجی بھیجے۔

سب سے بڑی امدادی ایمبولینس سروس

پاکستان کے پاس دنیا کی سب سے بڑی امدادی ایمبولینس سروس ہے جو عالمی سطح پر ایک ریکارڈ ہے، ان امدادی ایمبولینس سروسز میں ایدھی کے ساتھ ساتھ درجنوں دیگر فلاحی ادارے بھی شامل ہیں۔

فٹبال کی تیاری کیلئے مشہور

پاکستان دنیا میں فٹ بال تیار کرنے والے بڑے ممالک میں سے ایک ہے۔ پاکستان کا شہر سیالکوٹ دنیا میں فٹبال کی تیاری کیلئے مشہور ہے جہاں دنیا کے 70 فیصد فٹ بال تیار کئے جاتے ہیں یعنی 4 کروڑ سالانہ فٹ بال اسی شہر میں بناکر پوری دنیا میں بھیجے جاتے ہیں۔

دنیا میں سب سے زیادہ گول

ہاکی میں دنیا میں سب سے زیادہ گول کرنے والا دوسرا کھلاڑی پاکستان کے پاس ہے۔ سہیل عباس 348 گولز کے ساتھ سب سے زیادہ گول کرنیوالوں میں دوسرے نمبر پر موجود ہیں۔

خوبصورت ترین دارالحکومت

اسلام آباد دنیا کے خوبصورت ترین دارالحکومتوں میں لندن کے بعد دوسرے نمبر پر ہے۔ کچھ سال اس قبل درجہ بندی کی بنیاد اسلام آباد کی ہریالی، فی مربع کلومیٹر آبادی، پلاننگ اور سہولیات کی وجوہات شامل ہیں۔

پاکستان کی سب سے بڑی مسجد

فیصل مسجد پاکستان کی سب سے بڑی مسجد اور دنیا میں چھٹے نمبر پر ہے جہاں3 لاکھ افراد کی گنجائش موجود ہے۔

واحد اسلامی ایٹمی ملک

پاکستان اسلامی دنیا کی دوسری سب سے بڑی آبادی والا اور واحد اسلامی ایٹمی ملک ہے، یہاں مسلمان اکثریت کے علاوہ مسیحی، ہندو، سکھ ودیگر مذاہب کے لوگ بھی قیام پذیر ہیں۔

قدیم ترین تہذیب

دنیا کی پانچ قدیم ترین تہذیبوں میں سے ایک پاکستان میں انڈس تہذیب کے نام سے موجود ہے جن میں ہڑپہ اور موہنجوداڑو کے نام نمایاں ہیں جو کہ 4 ہزار سال پرانی تہذیب کہلاتی ہے۔

چند اعلیٰ اعزاز

پاکستان کے نصرت فتح علی خان کو دنیا میں سب سے زیادہ قوالیوں کے البم، شعیب اختر کو کرکٹ میں تیز ترین باؤلنگ، ارفع کریم کو (2004 سے 2008تک)کم عمر ترین مائیکرو سافٹ سرٹیفائیڈ پروفیشنل کا اعزاز جبکہ ڈاکٹر عبدالسلام اور ملالہ یوسفزئی کو نوبل انعام مل چکا ہے۔

دنیا کا سب سے بڑا پہاڑی سلسلہ

گلگت بلتستان میں نانگا پربت دنیا کا سب سے بڑا پہاڑی سلسلہ جو دنیا کی 40 میں سے 9 بلند ترین چوٹیاں لئے ہوئے ہے اور پاکستان کی دوسری بلند ترین چوٹی کے ٹو بھی نانگا پربت کا حصہ ہے۔