نیند میں جنات کا حملہ، حرکت بند، جسم بے جان۔۔۔ کیا آپ بھی سوتے میں ایسی صورتحال سے دوچار ہوچکے ہیں؟

آپ اپنے بستر پر آرام کی نیند سورہے ہوں اور آپ کو یوں محسوس ہوتا ہے کہ آپ کے سینے پر کوئی بھاری مخلوق چڑھ کر دبوچ رہی ہے، گلا دبا کے مارنا چاہتی ہے، آپ خود کو چھڑانے کیلئے ہاتھ پاؤں چلاتے ہیں لیکن حرکت نہیں کرپاتے، اچانک آپ کو محسوس ہو کہ آپ کو فالج ہوگیا ہے، جاگتے ہیں لیکن حرکت، بول یا آنکھیں کھول نہیں سکتے جیسے کوئی آپ کے کمرے میں ہو۔ جیسے کوئی چیز آپ کو نیچے دھکیل رہی ہو۔ یہ احساسات کئی منٹ تک رہ سکتے ہیں اور اس کو سلیپ پیرالائز یعنی نیند کا فالج کہا جاتا ہے۔

نیند کے فالج کی وجوہات

نیند کا فالج اس وقت ہوتا ہے جب آپ جاگتے یا سوتے ہوئے اپنے پٹھوں کو حرکت نہیں دے سکتے۔ اس کی وجہ یہ ہے کہ آپ نیند کے موڈ میں ہیں لیکن آپ کا دماغ متحرک ہے۔ نیند کے اوقات میں زیادہ رد و بدل اور کام کی زیادتی کی وجہ سے آپ کی نیند پر گہرا اثر پڑتا ہے جو اکثر نیند کے فالج کا سبب بنتا ہے ۔

کیا یہ سنگین مسئلہ ہے

تاریخ میں تقریباً ہر ثقافت میں سایہ دار شیطانی مخلوق کی کہانیاں موجود ہیں جو رات کے وقت بے بس انسانوں کو خوفزدہ کرتی ہیں۔ لوگ طویل عرصے سے نیند کے فالج کے مسئلے سے دوچار ہیں۔ محققین کا کہنا ہے کہ زیادہ تر معاملات میں نیند کا فالج محض اس بات کی علامت ہے کہ آپ کا جسم نیند کے مراحل سے گزر رہا ہے۔ شاذ و نادر ہی نیند کا فالج گہرے بنیادی نفسیاتی مسائل سے منسلک ہوتا ہے۔ یہ کیفیت زیادہ تر 10 سے 25 سال تک کی عمر کے افراد میں پائی جاتی ہے، اس مسئلے کا کوئی مخصوص علاج نہیں ہے، مختلف طبی ماہرین ادویات اور تھراپی سے بھی اس کا علاج کرتے ہیں۔

نیند کا فالج روکنے کی تدابیر

روزانہ 6 سے 8 گھنٹے کی نیند لینے کی کوشش کریں۔ ہر رات تقریباً ایک ہی وقت پر بستر پر جائیں اور ہر صبح ایک ہی وقت پر اٹھیں۔ باقاعدگی سے ورزش کریں لیکن سونے سے 4 گھنٹے پہلے نہیں کسرت نہ کریں۔ سونے سے کچھ دیر پہلے بھاری کھانا نہ کھائیں، سگریٹ نوشی نہ کریں ،الکوحل اور کیفین کا استعمال ترک کردیں اور پیٹھ کے بل نہ سوئیں کیونکہ ان چیزوں کی وجہ سے نیند کا فالج ہونے کا امکان بڑھ سکتا ہے۔

خوف سے چھٹکارا

اگر آپ بھی اس مسئلے سے دو چار ہوچکے ہیں تو گھبرانے کی ضرورت نہیں ہے، آپ اپنے طرز زندگی میں تھوڑے سے بدلاؤ اور میٹھی نیند سے دوستی کرکے اس پریشانی سے چھٹکارا پاسکتے ہیں، اپنی ذہنی کیفیات پر قابو پائیں، کھانے میں اعتدال اور اپنے ذہن کو فکروں سے آزاد کرکے بستر پر جائیں تو شائد ان پراسرار حملوں کاسامنا کرنے کی نوبت نہیں پیش آئیگی۔

< Previous کیا آپ کسی بات سے پریشان ہیں۔۔۔ چند آسان ٹپس جو آپ کو اس کیفیت سے نکال سکتی ہیں NEXT > ذہنی صلاحیتوں کو بڑھانا چاہتے ہیں ان سوالات کے جواب ڈھونڈیں اور اپنے بارے میں جانیں - جوابات