شائقین کرکٹ کے لیے بڑا معرکہ٬ ورلڈ کپ سے متعلق وہ تمام حقائق جو آپ کو ضرور معلوم ہونی چاہئیں

آسٹریلیا میں کل سے آٹھویں ٹی ٹوئنٹی ورلڈ کپ کیلئے معرکہ آرائی شروع ہونے جارہی ہے، 16 اکتوبر سے 13 نومبر تک جاری رہنے والے اس میگا ایونٹ میں 16 ٹیمیں ایکشن میں دکھائی دیں گی اور آسٹریلیا کے سات شہروں میں 45 میچز کھیلے جائیں گے۔

گروپس-ایونٹ کا پہلا دور گروپس کی سطح پر ہوگا

گروپ اے میں نمیبیا، نیدرلینڈز، سری لنکا، متحدہ عرب امارات،گروپ بی میں آئرلینڈ، اسکاٹ لینڈ، ویسٹ انڈیز، زمبابوے، سپر 12کے گروپ 1میں افغانستان، آسٹریلیا، انگلینڈ، نیوزی لینڈ، گروپ اے کی فاتح، گروپ بی کی رنر اپ، گروپ 2میں بنگلہ دیش، بھارت، پاکستان، جنوبی افریقہ، گروپ بی کی فاتح، گروپ اے کی رنر اپ ٹیم شامل ہوگی۔

مقامات

ٹی 20 ورلڈ کپ میں آسٹریلیا کے سات مقامات کو مجموعی طور پر استعمال کیا جائے گا،میلبورن کرکٹ گراؤنڈ فائنل کی میزبانی کرے گا اور سیمی فائنل ایڈیلیڈ اوول اور سڈنی کرکٹ گراؤنڈ میں کھیلے جائیں گے۔ برسبین میں گابا، جیلونگ میں کارڈینیا پارک، ہوبارٹ میں بیلریو اوول اور پرتھ اسٹیڈیم دیگر میزبان مقامات ہیں۔

ایونٹ میں شامل ٹیمیں

آسٹریلیا

ٹی ٹوئنٹی ورلڈکپ میں میزبان آسٹریلیا اپنے ٹائٹل کا دفاع کرے گا اور آسٹریلیا ہوم کنڈیشنز کا زیادہ سے زیادہ فائدہ اٹھانے کی بھی کوشش کریگا، ایک طاقتور بیٹنگ لائن اپ اور شاندار باؤلنگ اٹیک انہیں کسی حد تک غیر متوقع جیت کے بعد فیورٹ میں سے ایک بنا دیتا ہے۔

افغانستان

آئی سی سی مینز ٹی ٹوئنٹی ورلڈ کپ 2022 کے تمام اسکواڈز جدید کرکٹ کے تقاضوں کو مدنظر رکھ کر ترتیب دیئے گئے ہیں، افغانستان کی ٹیم محمد نبی، راشد خان اور دیگر سینئر کھلاڑیوں پر مشتمل ہوگی جو ٹی ٹوئنٹی میں شاندار پرفارمنس دکھانے کی صلاحیت رکھتے ہیں۔

بنگلہ دیش

بنگلہ دیش ایشیا کپ اور نیوزی لینڈ میں سہ فریقی سیریز میں قابل ذکر کارکردگی دکھانے سے قاصر رہی لیکن نوجوان کھلاڑیوں پر مشتمل بنگلہ دیشی ٹیم کے کئی آل راؤنڈرز جارحانہ حکمت عملی سے میچ کو کسی بھی وقت اپنے حق میں کرسکتے ہیں ۔

انگلینڈ

انگلینڈ کی ٹیم اس وقت ٹی ٹوئنٹی کی عالمی رینکنگ میں دوسرے نمبر پر موجود ہے اور اس ایونٹ میں بھی انگلش ٹیم خطرناک ثابت ہوسکتی ہے تاہم زخمی جوفرا آرچر کی غیر موجودگی میں باؤلنگ اٹیک کچھ کمزور ہوسکتا ہے۔

بھارت

ٹی ٹوئنٹی میں ٹاپ پوزیشن پر موجود بھارتی کرکٹ ٹیم اس ٹائٹل کے حصول کیلئے ایڑی چوٹی کا زور لگائے گی تاہم ایونٹ کے آغاز سے قبل جسپریت بمراہ کا دستبردار ہونا بھارتی ٹیم کیلئے دھچکے کا سبب بنے گا۔

آئرلینڈ

آئرش ٹیم بھی باصلاحیت کھلاڑیوں پر مشتمل ہے، عام مقابلوں میں مخالفین کو سخت مقابلہ دینے والے آئرش جیت کے قریب آکر ہار جاتے ہیں تاہم اس ایونٹ میں آئرش ٹیم نئے جوش و ولولے کے ساتھ میدان میں اتررہی ہے۔

نمیبیا

نمیبیا کی بیٹنگ لائن اپ نے پچھلے سال سپر 12 مرحلے تک پہنچنے کیلئے بہت محنت کی اور پہلے راؤنڈ کی ایک اور کامیاب مہم میں ڈیوڈ ویز، روبن ٹرمپل مین اور گیرہارڈ ایراسمس کا نمایاں کردار رہا ہے۔

نیدرلینڈز

ڈچ کھلاڑیوں کو ٹی ٹوئنٹی کا کافی تجربہ ہے اور نیدر لینڈز کی ٹیم کافی زیادہ کرکٹ کھیلنے کی وجہ سے تیزی سے سینئر ٹیموں کیلئے خطرہ بنتی جارہی ہے اور اس ایونٹ میں بھی ڈچ ٹیم سے کوئی بھی سرپرائز ممکن ہے۔

نیوزی لینڈ

2021 کے ورلڈکپ کی فائنلسٹ نیوزی لینڈ ایک بار پھر ایونٹ میں آخر تک کامیابی کیلئے ایڑی چوٹی کا زور لگائے گی ۔ رینکنگ میں پانچویں نمبر پر موجود کیویز کے پاس فائنل میں جگہ بنانے کی پوری صلاحیت موجود ہے۔

اسکاٹ لینڈ

عالمی درجہ بندی میں 15 ویں نمبر پر موجود اسکاٹ لینڈ کی ٹیم گو کہ اس وقت بہت نیچے ہے لیکن اسکاٹس بلے باز کسی بھی وقت میچ کا نقشہ تبدیل کرسکتے ہیں۔

جنوبی افریقہ

جنوبی افریقہ کو اس ایونٹ میں بھی بہترین باؤلرز کا ساتھ حاصل ہے جبکہ پروٹیز بیٹرز بھی ایونٹ میں فتوحات سمیٹنے کا عزم لے کر میدان میں اتر رہے ہیں۔

سری لنکا

ایشیا کپ کی فاتح سری لنکن ٹیم کو ابتدائی راؤنڈ کھیل کر اگلے مرحلے میں آنا ہوگا جو لنکن ٹائیگرز کیلئے بہت مشکل مرحلہ ہے لیکن امید ہے کہ سری لنکن ٹیم راؤنڈ میچ کھیل کر مین لائن میں ضرور شامل ہوگی۔

متحدہ عرب امارات

متحدہ عرب امارات کی ٹیم کوالیفائرز راؤنڈ میں آئرلینڈ کو شکست دیکر ایونٹ میں شامل ہوئی ہے لیکن اب اسے سری لنکا، نمیبیا اور ہالینڈ کے خلاف ایک مشکل گروپ کا سامنا ہے ۔

ویسٹ انڈیز

ویسٹ انڈین ٹیم نوجوان اور سینئر کھلاڑیوں پر مشتمل ہے اور اس ایونٹ میں ایک بار پھر گراؤنڈ میں شاندار کھیل کے ساتھ خوبصورت رقص بھی دیکھنے کو مل سکتا ہے اور ویسٹ انڈین ٹیم ایونٹ میں بڑا سرپرائز بھی دے سکتی ہے۔

زمبابوے

ایک خطرناک باؤلنگ اٹیک زمبابوے کو کامیابی سے ہمکنار کرسکتا ہے ،سپر 12 مرحلے تک پہنچنے میں زمبابوین باؤلرز کا اہم کردار رہا اور مین ایونٹ میں بھی یہ باؤلرز اپنی ٹیم کو فائدہ پہنچاسکتے ہیں۔

پاکستان

ٹی ٹوئنٹی رینکنگ میں چوتھے نمبر پر موجود پاکستان ٹیم اس وقت بابر اعظم اور محمد رضوان کی جوڑی کی وجہ سے کامیابیوں کی منازل طے کررہی ہے اور اس میگا ایونٹ میں قومی ٹیم ٹائٹل کے حصول کیلئے میدان میں اتر رہی ہے۔کپتان بابر اعظم نے قوم کو ورلڈکپ کا تحفہ دینے کا وعدہ کیا ہے۔

ٹورنامنٹ کا فارمیٹ

ورلڈ کپ تین مرحلوں میں ہو رہا ہے۔ پہلے راؤنڈ میں چار ٹیموں کے دو گروپ بنائے گئے ہیں، ہر گروپ سے سرفہرست دو ٹیمیں سپر 12 مرحلے میں جائیں گی۔

پہلے راؤنڈ میں حصہ لینے والی آٹھ ٹیمیں نے کٹ آف پوائنٹ پر ٹورنامنٹ کے لیے خود بخود کوالیفائی کر لیا ہے جن میں نمیبیا، اسکاٹ لینڈ، سری لنکا اور ویسٹ انڈیز ہیں ۔

سپر 12 مرحلے میں چھ کے دو گروپ ایک راؤنڈ رابن کھیلتے ہیں جس میں ہر گروپ سے سرفہرست دو ٹیمیں ناک آؤٹ مرحلے تک جائیں گی۔ناک آؤٹ مرحلہ دو سیمی فائنلز پر مشتمل ہے اور فائنل 13 نومبر کو کھیلا جائیگا۔

< Previous فٹبال کی تاریخ کے 15 ہولناک حادثات جو سینکڑوں افراد کی جانیں لے گئے NEXT > کرکٹ میں بار بار ہارنے سے بہتر ہے انسان یہ کھیل کھیلے، دنیا کے کچھ عجیب و غریب کھیل