شادی کی خوشی موت کے پیغام میں تبدیل ہوگئی، شادی والے گھر کے ایسے واقعات جو ہر کسی کو دکھی کر دیں

عام طور پر شادی کے موقع پر ہر گھرانے کی خواہش ہوتی ہے کہ وہ ان تقریبات کی تکمیل بخیر و عافیت کر لیں بڑے بوڑھے ایسے وقت میں بری نظر سے بچنے کے لیے بھی سو سو جتن کرتے نظر آتے ہیں کہیں دولہا دلہن کی نظریں اتاری جاتی ہیں اور کبھی ان کے صدقے اتارے جاتے ہیں تاکہ وہ اپنی زندگی کا نیا سفر بخیر و عافیت شروع کر سکیں- مگر بعض بدقسمت افراد ایسے بھی ہوتے ہیں جن کے نصیب میں شادی کی خوشی صرف چند لمحوں کے لیے ہی ہوتی ہے- ایسے ہی کچھ افسوسناک واقعات آج آپ کے ساتھ شئير کریں گے-

جلدی پہنچنے کی خواہش لے ڈوبی

یہ واقعہ افغانستان کے ہرات شہر کا ہے ذرائع کے مطابق یہ شادی بھی عام شادیوں کی طرح تھی جس میں دولہا بہت دھوم دھام سے بارات کی شکل میں لڑکی والوں کے گھر تک پہنچا اور نکاح اور باقی تمام رسومات کے بعد دلہن کو گاڑی میں بٹھا کر جب دولہا اپنے دیگر رشتے داروں کے ساتھ بارات کو لے کر واپس جا رہا تھا- جلدی گھر پہنچنے کا شوق تھا یا بارات سے آگے نکل جانے کی خواہش یا خوشی کی مستی مگر وجہ کچھ بھی ہو یہ وجہ ایک ایسے حادثے کا سبب بنی جس کی وجہ سے گاڑی تیز رفتاری کے سبب حادثے کا شکار ہو گئی- اس حادثے کے سبب دولہا اور اس کا ایک ساتھی موقع پر ہی ہلاک ہو گیا جبکہ دلہن اور اس کے پانچ دیگر رشتے دار شدید زخمی ہو گئے- اس طرح ذرا سے تیز رفتاری نے ایک گھر کو بسنے سے قبل ہی اجاڑ دیا -

شادی کی خوشی ہی لے ڈوبی

یہ واقعہ پاکستان کے علاقے بہاولپور کا ہے جہاں پر اچ شریف کے رہائشی محمد اکبر کی شادی خانہ آبادی بستی جنڈو والی کی ایک لڑکی کے ساتھ دھوم دھام سے ہوئی- محمد اکبر جب دلہن کو رخصت کروا کر واپس اچ شریف لے کر آیا تو گھر آتے ہی اس نے طبیعت خرابی کی شکایت کی- اس کے سینے میں درد تھا جس کی وجہ سے اس کے گھر والے اس کو فوری طور پر ہسپتال لے کر گئے جہاں پر ڈاکٹرز نے معائنے کے بعد محمد اکبر کی موت کی تصدیق کر دی- ڈاکٹری ذرائع کے مطابق محمد اکبر کو شدید دل کا دورہ پڑا جس سے وہ جانبر نہ ہو سکا۔

شادی کی دعوت موت کی دعوت بن گئی

یہ واقعہ خانیوال کے علاقے کبیر والہ کا ہے جہاں پر جنید احمد کا ولیمہ 18 دسمبر 2022 کو طے پایا تھا ۔ جنید احمد مقامی بنک میں بطور اکاؤنٹ آفیسر کے کام کر رہا تھا اپنے ولیمے کے دعوت نامے قریبی عزیزوں کو دینے کے لیے موٹر بائک پر گھر سے نکلا - جلد کام ختم کرنے کے خیال سے تیز رقتاری سے موٹر سائيکل چلاتے ہوئے جنید احمد ایک اور موٹر سائيکل سے ٹکرا کر سڑک پر گرے اور ان کے اوپر سے پیچھے سے آتا ہوا ایک ٹرالر گزر گیا جس سے جنید احمد کی موت موقع پر ہی واقع ہوگئی- جنید احمد کی لاش جب گھر پہنچی تو قیامت کا سمان تھا شادی کی تیاری والا گھر موت والے گھر میں تبدیل ہو گیا جس کو دیکھ کر ہر آنکھ اشکبار ہوگئی-

یہ تمام واقعات اس بات پر ہمارا یقین اور بھی بڑھا دیتے ہیں کہ زندگی اور موت اللہ تعالیٰ کے ہاتھ میں ہے اور انسان کے ارادے کچھ بھی ہوں اس کی تیاریاں اس کی خواہشات کچھ بھی ہوں مگر ہوتا وہی ہے جو اللہ کو منظور ہوتا ہے-

< Previous ہاتھ کیسے ملانا چاہیے؟ چند غلطیاں جنہیں 30 سال کی عمر تک پہنچنے سے قبل ضرور ترک کردیں NEXT > قیامت خود بتائے گی کہ وہ کیوں ضروری تھی، بچوں کو پیٹ بھر روٹی کھلانے کی خواہش جان لے گئی