کھیلوں کی دنیا میں چین کی پہچان

پیرس اولمپکس میں شرکت کرنے والے ایتھلیٹس تیاری کے آخری مرحلے میں داخل ہو چکے ہیں کیونکہ اولمپک گیمز اب چند دن کی دوری پر ہیں۔ اولمپک اسٹیج پر ان ایتھلیٹس کے ساتھ کھیلوں کے سازوسامان بنانے والی چینی کمپنیوں کی ایک بڑی تعداد بھی شامل ہے جنہوں نے اولمپکس کے لیے خصوصی مصنوعات تیار کی ہیں ۔باربیلز سے لے کر سائیکلوں تک، اور پنگ پونگ ٹیبلز سے لے کر کورٹ فلورنگ تک، چینی ساختہ مصنوعات کا ایک مسلسل بڑھتا ہوا سلسلہ باوقار بین الاقوامی کھیلوں کے مقابلوں میں شاندار کارکردگی کا مظاہرہ کر رہا ہے۔

دو جولائی کو چین کی تائیشان اسپورٹس کی سروس ٹیم پیرس کے لیے روانہ ہوئی۔اس چینی کمپنی کو مسلسل سات مرتبہ اولمپک سپلائر کا اعزاز حاصل ہے۔ پیرس اولمپکس کے دوران یہ کمپنی ریسلنگ، باکسنگ، جوڈو، سائیکلنگ، تائیکوانڈو اور جمناسٹک سمیت متعدد مقابلوں کے لیے سازوسامان فراہم کرے گی۔اسی طرح پیرس اولمپکس کے لئے ویٹ لفٹنگ آلات کے خصوصی سپلائر کی حیثیت سے ، حہ بی چانگ کھونگ باربیل مینوفیکچرنگ کمپنی لمیٹڈ نے اس سال مئی کے اوائل میں پیرس کو اپنا ویٹ لفٹنگ سامان پہنچایا ہے۔ گزشتہ ایڈیشنز کے برعکس ، پیرس اولمپکس کے لئے ویٹ لفٹنگ ٹریننگ مقام اولمپک ولیج کے اندر واقع ہے ، اور حال ہی میں ہر قسم کے آلات نصب کیے گئے ہیں۔ چینی کمپنی نے ویٹ لفٹنگ پلیٹ فارمز کو زیادہ محفوظ بنانے کے لیے تربیتی مقام میں ان کے اسمبلی ڈھانچے کو بھی اپ ڈیٹ کیا ہے۔

اسی طرح چینی ساختہ مصنوعات پیرس اولمپکس کے ٹیبل ٹینس کے مقام پر ایک نمایاں خصوصیت ہوں گی۔ چینی سازوسامان فراہم کرنے والی کمپنی ڈی ایچ ایس کی جانب سے تیار کردہ پنگ پونگ ٹیبلز اور چینی مینوفیکچرر ڈبل فش کی جانب سے تیار کردہ پنگ پونگ گیندیں شنگھائی اور گوانگ جو سے پیرس بھیج دی گئی ہیں۔دیکھا جائے تو چینی مینوفیکچررز نے کئی بار اولمپک اسٹیج پر اپنی پہچان بنائی ہے۔ اس کے علاوہ، وہ اپنی مارکیٹ کو بڑھانے کے لئے دیگر بین الاقوامی کھیلوں کے مقابلوں میں بھی مواقع سے فائدہ اٹھا رہے ہیں. حالیہ برسوں میں ، چینی کمپنیوں نے اپنی مصنوعات کے تکنیکی مواد اور اضافی قدر کو بہتر بنانے کے لئے اپنی تحقیق اور ترقی کی کوششوں میں اضافہ کیا ہے ، جو "میڈ ان چائنا" سے "چین میں تخلیق" میں منتقلی کے لئے کوشاں ہیں۔

اولمپک سائیکلنگ کھیلوں میں نمودار ہونے والے پہلے چینی برانڈ کے طور پر ، تائیشان اسپورٹس کی تیار کردہ پارڈس بائیکس پیرس میں چینی سائیکلنگ ٹیم کی مدد کریں گی۔ اپنی آر اینڈ ڈی ٹیموں اور فیکٹریوں کے ساتھ ، پارڈس نے چینی ٹیم کے لئے روڈ بائیکس ، ٹریک بائیکس اور ٹائم ٹرائل بائیکس کو اپنی مرضی کے مطابق بنایا ہے ، جو کھلاڑیوں کو بہترین کارکردگی دکھانے میں مضبوط مدد فراہم کرتا ہے۔چینی کمپنی کے مطابق کھلاڑیوں کی مخصوص ضروریات کو پورا کرنے کے لئے مصنوعات ڈیزائن کی جاتی ہیں اور اُن کا فلسفہ بائیکس کو ایتھلیٹس کے مطابق ڈھالنا ہے، نہ کہ اس کے برعکس۔پیرس اولمپکس کے لئے چینی کمپنی ڈبل فش کی تیار کردہ پنگ پونگ گیندوں کو پیرس بھیجنے سے قبل سخت جانچ پڑتال کے15 معیارات سے گزارا گیا ہے۔ بین الاقوامی ٹیبل ٹینس فیڈریشن کے مقرر کردہ معیارات کی روشنی میں ان میں گول پن، سختی، وزن اور لچک کے تمام پہلووں کو ملحوظ خاطر رکھا گیا ہے۔

وسیع تناظر میں سال 2024 بڑے بین الاقوامی کھیلوں کے مقابلوں سے بھرا ہوا ہے ، جن میں یوئیفا یورپین چیمپیئن شپ ، کوپا امریکہ اور پیرس اولمپکس شامل ہیں۔ بہت سی چینی کمپنیاں مارکیٹ میں اپنی موجودگی کو بڑھانے اور بڑھتی ہوئی طلب کو پورا کرنے کے لئے ان ہائی پروفائل مقابلوں سے فائدہ اٹھا رہی ہیں۔چینی جدت طرازی کھیلوں کے عالمی اسٹیج پر اپنی شناخت بنا رہی ہے۔ یورپی پیشہ ورانہ فٹ بال کے میدانوں میں اب چینی مصنوعی ٹرف ٹیکنالوجی موجود ہے۔ فیبا حکام نے چینی سازوسامان بنانے والوں کو پروڈکٹ اسٹینڈرڈ سرٹیفکیشن میں شرکت کی دعوت دی ہے۔ چینی کمپنی ہائی سینس یوئیفا یورپین چیمپیئن شپ 2024 کے لیے آفیشل وی اے آر (ویڈیو اسسٹنٹ ریفری) ڈسپلے پارٹنر بن گئی ہے۔ یہ مثالیں چینی کمپنیوں کے عزائم اور صلاحیتوں کے ساتھ ساتھ عالمی اسپورٹس کمیونٹی کے اُن پر اعتماد کو واضح طور پر ظاہر کرتی ہیں۔