|
چین کی جانب سے ابھی حال ہی میں اعلان کیا گیا ہے کہ وہ
اپنے بے دو نیوی گیشن سیٹلائٹ سسٹم کے بڑے پیمانے پر اطلاق کی حمایت کے لیے
تیار ہے، جس میں بڑے پیمانے پر کھپت، مینوفیکچرنگ اور صنعتی انٹرنیٹ اور
مصنوعی ذہانت (اے آئی) جیسے ابھرتے ہوئے شعبوں میں بے دو کے اطلاق کا
مظاہرہ کرنے کے لیے متعدد پائلٹ شہر نامزد کرنے کا منصوبہ ہے۔
یہ امر قابل زکر ہے کہ چین ایک آزاد عالمی نیوی گیشن سیٹلائٹ سسٹم رکھنے
والا ملک کہلاتا ہے۔چین کے اسپیس حکام کی جانب سے 2023 میں بی ڈی ایس۔تھری
کے لئے تین سیٹلائٹ لانچ کیے گئے تھے۔ تینوں سیٹلائٹس کو بے دو سسٹم کے
علاقائی شارٹ میسجنگ فنکشن کی مواصلاتی صلاحیت کو بڑھانے ، پوزیشننگ کی
درستگی کو بڑھانے اور نیٹ ورک کی دستیابی اور استحکام کو فروغ دینے کے لئے
ڈیزائن کیا گیا ہے۔
بین الاقوامی سول ایوی ایشن آرگنائزیشن (آئی سی اے او) نے 2023 میں بے دو
کو مطلوبہ معیار کے طور پر تسلیم کیا تھا ، جس سے یہ بین الاقوامی شہری ہوا
بازی کے لئے عالمی طور پر تسلیم شدہ نیوی گیشن سسٹم بن چکا ہے۔اس نظام کے
تکنیکی معیارات اور سفارش کردہ اقدامات کو بین الاقوامی شہری ہوا بازی
کنونشن کے ضمیمہ 10 میں بین الاقوامی سول ایوی ایشن آرگنائزیشن کی موجودہ
معیاری دستاویزات میں شامل کیا گیا ہے۔اس آرگنائزیشن کی تکنیکی تصدیق دنیا
بھر میں مختلف صنعتوں کے لئے نیوی گیشن خدمات فراہم کرنے کی نظام کی صلاحیت
کا ثبوت ہے۔ حالیہ سالوں کے دوران بے دو نظام کی اعلی درستگی اور مختصر
پیغام سروس کی صلاحیتوں کی تصدیق کے ساتھ ، بے دو کو ایپلی کیشن منظرناموں
کی بڑھتی ہوئی تعداد میں ضم کیا جارہا ہے۔ ان میں پوزیشننگ ، نیوی گیشن ،
بین الاقوامی تلاش اور بچاؤ ، زراعت ، موسمیات ، اور شہری انتظام وغیرہ
شامل ہیں ، جس سے اہم سماجی اور معاشی فوائد حاصل ہوئے ہیں۔
چین کے حالیہ اعلان کے مطابق بے دو کا بڑے پیمانے پر اطلاق اب
مارکیٹائزیشن، صنعت کاری اور بین الاقوامیت کے ایک اہم مرحلے میں داخل ہو
چکا ہے۔بے دو کو مختلف صنعتوں کو بااختیار بنانے کے قابل بنانے کی کوشش
میں، چین معروف کاروباری اداروں کو فروغ دینے، مصنوعات کے معیار کو بہتر
بنانے، بے دو ایپلی کیشنز کو فروغ دینے اور ایک مضبوط صنعتی ماحولیاتی نظام
کی تعمیر کے لئے مدد فراہم کرے گا.
اس اعلان میں بتایا گیا ہے کہ پائلٹ پروجیکٹس تین شعبوں پر توجہ مرکوز کریں
گے، جن میں بڑے پیمانے پر کھپت، مینوفیکچرنگ اور مربوط جدت طرازی ، شامل
ہیں۔بڑے پیمانے پر کھپت کے شعبے میں پائلٹ شہر ،اسمارٹ فونز ، ویئر ایبل
آلات ، ٹیبلٹس ، شیئرڈ ٹریول ٹولز اور کم اونچائی پر بغیر پائلٹ والی ہوائی
گاڑیوں جیسے شعبوں پر توجہ مرکوز کریں گے۔ انٹرپرائزز کو بے دو مصنوعات
تیار کرنے کی ترغیب دی جائے گی ، اس طرح ان مصنوعات کی فراہمی کی صلاحیت
میں مسلسل بہتری آئے گی۔
صنعتی مینوفیکچرنگ کے میدان میں پائلٹ شہر ، آٹوموبائل ، بحری جہاز ، ہوائی
جہاز اور روبوٹس جیسے کلیدی شعبوں میں بے دو کے اطلاق کو تیز کریں گے۔مقامی
حکومتوں سے کہا گیا ہے کہ وہ انٹرنیٹ آف وہیکلز اور انٹیلی جنٹ نیٹ ورک سے
متعلق پلیٹ فارمز کی تعمیر کی حوصلہ افزائی کریں ، اور بے دو سسٹم سے لیس
تجارتی اور مسافر گاڑیوں کے تناسب کو بڑھائیں۔مربوط جدت طرازی کے میدان میں
، "بے دو پلس" ایپلی کیشنز کے لئے نئے منظرنامے تلاش کیے جائیں گے۔ ابھرتی
ہوئی صنعتوں جیسے انٹرنیٹ آف وہیکلز، انٹرنیٹ آف تھنگز، انڈسٹریل انٹرنیٹ
اور اے آئی میں بے دو سسٹم کی جدید ایپلی کیشنز کو فروغ دیا جائے گا۔اعلان
میں کہا گیا ہے کہ اس اقدام سے سمارٹ شہروں، ذہین نقل و حمل، اسمارٹ
لاجسٹکس، اسمارٹ میری ٹائم اور اعلیٰ درجے کی زراعت جیسے نئے منظرناموں کے
ساتھ بے دو ایپلی کیشنز کے گہرے انضمام میں مدد ملے گی۔
عالمی سطح پر اس نظام کی افادیت کی بات کی جائے تو بے دو تاحال 200 سے
زیادہ ممالک اور خطوں کو خدمات فراہم کر چکا ہے۔چین نے بے دو پر فعال بین
الاقوامی تعاون کیا ہے اور دنیا بھر میں اس کی ایپلی کیشنز کو مسلسل آگے
بڑھایا ہے ، جس سے مشترکہ مستقبل کی عالمی برادری کی تعمیر میں حصہ لیا گیا
ہے۔
|