|
اس وقت چین میں تکنیکی ترقی کا عروج جاری ہے اور نت نئی
اختراعات کی بدولت چینی عوام کے لیے مسلسل سہولیات لائی جا رہی ہیں۔ تکنیکی
ترقی میں روبوٹکس کا شعبہ بھی نمایاں اہمیت اختیار کر چکا ہے اور مصنوعی
ذہانت سے لیس روبوٹس چین کے مختلف شعبوں میں تبدیلی لاتے ہوئے اب انسانی
جانیں بچانے میں بھی ایک اہم کردار ادا کر رہے ہیں۔ انتہائی پیچیدہ طبی
حالات اور سرجری کے طریقہ کار میں ان کی جدید صلاحیتیں اور درستگی انتہائی
اہم ثابت ہو رہی ہے۔
کہا جا سکتا ہے کہ تکنیکی ترقی کو تیز رفتاری سے اپنانے اور حکومتی تعاون
کی بدولت، چین مصنوعی ذہانت سے چلنے والے روبوٹکس کے لیے دنیا کا سب سے اہم
تجرباتی میدان بن گیا ہے، جہاں گزشتہ چند ماہ میں کئی قابل ذکر پیشرفتیں
دیکھی گئی ہیں۔
اگرچہ یہ روبوٹس چینی فیکٹریوں میں پیداواری صلاحیت بڑھانے جیسے وسیع
استعمال کے لیے پہلے سے ہی جانے جاتے ہیں، لیکن اب ان ترقی یافتہ روبوٹس کو
صحت اور طبی شعبے میں تعینات کیا جا رہا ہے، جہاں سرجن ان کی اعلیٰ درستگی
پر بھروسہ کرتے ہوئے مشکل آپریشن مکمل کرنے میں ان سے مدد لے رہے ہیں۔
چینی ماہرین کے مطابق ایک روبوٹ سرجن آرتھوپیڈک کی سرجری بہت تیزی سے اور
حیرت انگیز درستگی کے ساتھ انجام دے سکتا ہے۔ جو طریقہ کار کبھی پانچ گھنٹے
لیتا تھا، اب صرف 30 منٹ میں مکمل ہو سکتا ہے۔ان روبوٹس کے لحاظ سے بالکل
صحیح پیمانہ فٹ کیا جا سکتا ہے اور یہ کارآمد روبوٹک سرجن 0.1 ملی میٹر تک
درست ہیں۔
روبوٹک سرجن سے مستفید ہونے والوں میں ایسے مریض بھی شامل ہیں جن کی کسی
خطرناک حادثے میں، پیلوس (کمر کے نچلے حصے کی ہڈی) شدید متاثر ہوئی
تھی،لیکن اب وہ روبوٹ سے مدد یافتہ سرجری کی بدولت آپریشن کے صرف چند دن
بعد ہی گھر جا سکتے ہیں۔
یہ امر قابل ذکر ہے کہ سرجیکل روبوٹس کی عالمی منڈی تیزی سے پھیل رہی ہے
اور 2030 تک 60 ارب امریکی ڈالر تک پہنچنے کا تخمینہ ہے، جو ترقی کی وسیع
صلاحیت کو اجاگر کرتا ہے۔
اس صنعت کی ترقی چین کے صحت کے شعبے کے لیے خوش آئند خبر ہے، جہاں آبادی کے
حجم کو دیکھتے ہوئے آپریشنز کی مانگ بہت زیادہ ہے۔ لیکن ان روبوٹس کے مہنگے
ہونے کی وجہ سے، طویل مدت میں درآمد شدہ ماڈلز کی بجائے مقامی ماڈلز پر
منتقلی اخراجات کو کم کرنے میں بھی مدد کر رہی ہے۔
اس وقت،ملک میں تربیتی مراکز ڈاکٹروں کو اس نئی ٹیکنالوجی میں مہارت حاصل
کرنے میں مدد کر رہے ہیں۔ایسے کچھ مقامی اسپتال جہاں شاذ و نادر ہی پیچیدہ
سرجری کی جاتی تھی ، اب روبوٹک امداد سے، ان کے ڈاکٹر تجربہ کار ماہرین کی
طرح آپریشن کر سکتے ہیں۔
یوں کہا جا سکتا ہے کہ روبوٹک ٹیکنالوجی پہلے سے کہیں زیادہ جانیں بچا رہی
ہے، اور مستقبل میں ان کے مختلف اطلاق کے ذریعے یہ لوگوں کو مکمل طور پر
اسپتال جانے سے بھی بچا سکتی ہے۔مثلاً ، اگرچہ عام طور پر پہاڑوں پر کھڑی
سیڑھیاں چڑھنا انسان کو تھکا دیتا ہے، لیکن چہل قدمی میں مدد کرنے والا
ایکسوسکیلٹن (بیرونی ڈھانچہ) جوڑوں پر پڑنے والے دباؤ کو کم کر سکتا ہے۔ یہ
پہننے کے قابل آلات اب زیادہ ذہین اور ہلکے ہوتے جا رہے ہیں۔ایک اعلیٰ درجے
کا ایکسوسکیلٹن صرف دو کلوگرام وزنی ہوتا ہے اور، سب سے اہم بات یہ کہ یہ
اسمارٹ سینسرز سے لیس ہوتا ہے جو آپ کی ہر حرکت کو ٹریک کرتے ہیں اور رئیل
ٹائم میں سہارا فراہم کرتے ہیں۔
یہ ٹیکنالوجی چین کی بڑھتی ہوئی عمر رسیدہ آبادی کی مدد کے لیے ایک اور
قابلِ عمل طویل مدتی حل بھی پیش کرتی ہے۔ 2024 کے آخر تک، ملک میں 60 سال
اور اس سے زیادہ عمر کے 310 ملین سے زیادہ افراد تھے، جن میں سے تقریباً 35
ملین کو نقل و حرکت کے مسائل کا سامنا تھا، یہی وجہ ہے کہ حکومت بزرگوں کی
دیکھ بھال میں ایکسوسکیلٹن کے استعمال کی حوصلہ افزائی کر رہی ہے۔
دوسری جگہوں پر، ہیومنائڈ روبوٹس (انسان نما روبوٹس) کا اطلاق ایسے کاموں
میں انقلاب ثابت ہو سکتا ہے جو انسانوں کے لیے بہت خطرناک، بار بار دہرائے
جانے والے یا غیر متوقع سمجھے جاتے ہیں۔ کار سازی سے لے کر جانیں بچانے تک،
یہ روبوٹ صرف چین کو درپیش چیلنجوں کو حل نہیں کر رہے ، بلکہ ایسا تربیتی
ڈیٹا بھی جمع کر رہے ہیں جو دنیا بھر میں پیداواری صلاحیت کو بڑھا سکتا ہے۔
یہ روبوٹ کام کے دوران سیکھتے ہیں، اور ایک جدید مصنوعی ذہانت کے "برین نیٹ
ورک" کے ذریعے اپنے ساتھیوں سے بات چیت کرتے ہیں۔ان کی تیز رفتار ترقی کے
تناظر میں، بہت سے ماہرین توقع کرتے ہیں کہ یہ روبوٹ جلد ہی انسانوں کے ہم
پلہ ہو جائیں گے، اور کھانے یا سونے کی ضرورت نہ ہونے کی وجہ سے، یہ صرف
وقت کی بات ہے کہ وہ انسانوں سے آگے نکل جائیں۔
|