پاکستان: کون سے شعبے میں کس نمبر پر

آبادی کے لحاظ سے دنیا کے ساتویں اور پہلے اسلامی ایٹمی ملک پاکستان نے کئی شعبوں میں نمایاں کامیابیاں حاصل کی ہیں٬ پاکستان کا شمار دنیا کے ان ممالک میں ہوتا ہے جو ترقی کے ابتدائی مراحل میں شمار کیے جاتے ہیں- جبکہ بیروزگاری٬ غربت٬ معاشی کمزوری اور توانائی جیسے بحران بھی پاکستان کی قسمت میں لکھے ہوئے ہیں-
 

اقوام متحدہ، عالمی بینک، آئی ایم ایف، انٹرنیشنل ٹرانسپورٹ ایسوسی ایشن، انٹرنیشنل ٹیلی کمیونی کیشن یونین، ایفریقن ڈیولپمنٹ بینک، یورپین بینک فار ری کنسٹرکشن اینڈ ڈیولپمنٹ، انٹر امریکن ڈیولمپنٹ بینک، آرگنائزیشن فار اکنامک کارپوریشن اینڈ ڈیولپمنٹ، اکانومسٹ انٹیلی جنس یونٹ اور ملکی ذرائع سے حاصل شدہ اعداد و شمار اور حقائق کو مدنظر رکھ کر ایک رپورٹ مرتب کی گئی۔

اس رپورٹ کا تجزیہ کرنے کے بعد جو صورتحال سامنے آئی ہے اس کے مطابق پہلا ستون ”اداروں کی مضبوطی“ جانچنے کے لئے 21 پیمانے مقرر کئے گئے۔ ان میں سے اہم جائیداد کی خریدوفروخت کے حوالے سے پاکستان 107 ویں، تخلیقی کاوشوں کے تحفظ 86، سیاست دانوں پر عوامی اعتماد 91، ادائیگیوں میں عدم تسلسل اور رشوت 117، عدلیہ کی آزادی 74، پسندوناپسند کی بناء پر حکومتی فیصلے 87، حکومتی پیسے کا ضیاع 58، حکومتی پالیسیوں میں شفافیت 115 اور منظم جرائم کے حوالے سے پاکستان 127 نمبر پر ہے۔

دوسرے ستون ”مواصلاتی ڈھانچے“ کے حوالے سے مقرر کردہ 9 پیمانوں میں مواصلاتی ڈھانچے کا عمومی معیار 100 ویں، سڑکوں کا معیار 72، ریل کی پٹڑی کے ڈھانچے کا معیار 55، بندرگاہوں کے ڈھانچے 73، ہوائی ٹرانسپورٹ کے ڈھانچے کا معیار 81، فکس ٹیلی فون لائن 115 اور موبائل ٹیلی فون استعمال کرنے والوں کے حوالے سے پاکستان 107 ویں نمبر پر ہے۔

تیسرا ستون ”ملکی سطح پر معاشی ماحول“ کے 6 پیمانوں میں سے حکومتی بجٹ میں توازن کے حوالے سے پاکستان 91، قومی بچت کی شرح 89، افراط زر 137 اور حکومتی قرضوں کے حوالے سے پاکستان 82 ویں نمبر پر ہے۔

چوتھے ستون ”صحت اور پرائمری تعلیم“ کے 10 پیمانوں میں سے شیرخواروں کی شرح اموات 123، اوسط عمر 105 اور پرائمری کی سطح پر شرح داخلہ کے حوالے سے پاکستان 132 ویں نمبر پر ہے۔

پانچواں ستون ”اعلیٰ تعلیم و تربیت“ میں 8 پیمانوں میں سے سیکنڈری تعلیم میں شرح داخلہ کے حوالے سے ملک 125، تعلیمی نظام کا معیار 87، سائنس اور ریاضی کی تعلیم کا معیار 90 اور اسکولوں میں انٹرنیٹ تک رسائی کے لحاظ سے پاکستان 84 ویں نمبر پر ہے۔