دنیا کے طاقتور ترین ممالک

دنیا میں 190 سے زائد ممالک ہیں اور ان سب میں سب سے زیادہ طاقتور بننے کی دوڑ لگی ہوئی ہے- آج اس آرٹیکل میں دنیا کے دس طاقتور ترین ممالک کا ذکر کیا جارہا ہے جو کہ مختلف سروے کی نتیجے میں سامنے آئے ہیں- ان سروے کی بنیاد ایٹمی طاقت٬ مضبوط معیشت٬ معدنی وسائل٬ جمہوری نظام٬ فوجی طاقت٬ اور بین الاقوامی تعلقات پر ہے-
 

امریکہ
سب سے بڑی معیشت کا حامل یہ ملک جمہوریت کے ساتھ ساتھ ایک طاقتور فوج بھی رکھتا ہے- اس ملک کا میڈیا بھی بہت بااثر سمجھا جاتا ہے- امریکہ بین الاقوامی تعلقات کو کنٹرول کرتا ہے اور دنیا کے متعدد بااثر اداروں میں بھی اپنے اثر و رسوخ قائم کیے ہوئے ہے-

روس
اس فہرست میں دوسرا نمبر روس کا ہے اور اس ملک کی فوج دنیا کی دوسری بڑی طاقتور فوج ہے جو کہ وسطی ایشیا کے علاقوں کی ایک بہت بڑی تعداد پر اپنا کنٹرول رکھتی ہے- ایک بہت بڑی آبادی کا حامل یہ ملک دنیا کے ایک وسع علاقے پر پھیلا ہوا ہے- یہی حقائق بیرونی افواج کو اس ملک کے اقتصادی٬ سیاسی اور مالی معاملات میں دخل اندازی سے باز رکھتے ہیں-

چین
چین مجموعی قومی مصنوعات کی پیداوار میں دنیا میں چوتھے نمبر پر ہے- اور حال ہی میں چین نے فرانس اور برطانیہ پر برتری حاصل کرلی ہے- اس ملک کی فوج بھی بہت بڑی ہے اور یہ ملک دنیا کا طاقتور ملک بننے کی صلاحیت بھی رکھتا ہے-

فرانس
فرانس اقوام متحدہ کی سلامتی کونسل کا ایک حصہ ہے اور اس کا شمار بھی دنیا کے طاقتور ممالک میں کیا جاتا ہے- یہ ایک ایٹمی طاقت کا حامل ملک ہے اور متعدد افریقی ممالک میں اپنا اثر و رسوخ رکھتا ہے- اس کی بہت بڑی فوج فرانس میں امن و امان کی صورتحال کو برقرار رکھتی ہے- یہ ملک جی 7 اور یورپی یونین کا بھی رکن ہے-

برطانیہ
برطانیہ بھی اقوام متحدہ کی سلامتی کونسل کا ایک رکن ہے- اور اس کے طاقتور جوہری ہتھیار اور جمہوری نظام اسے سب سے زیادہ مستحکم بناتے ہیں- اس کے اہم ترین شعبے میوزک انڈسٹری٬ فلم اور میڈیا ہیں- اس ملک کا عالمی سیاست میں بہت زیادہ اثر و رسوچ سمجھا جاتا ہے-

جاپان
جاپان ایک انتہائی بڑی معیشت اور جمہوری طاقت کا حامل ملک ہے- اس ملک کی آبادی بہت بڑی ہے لیکن اس کے باوجود اس کا مقابلہ دوسرے ممالک سے سخت ترین ہے کیونکہ اس کے مدمقابل امریکہ٬ چین٬ فرانس اور برطانیہ ہیں-

انڈیا
انڈیا ایک گنجان آباد ملک ہے اور اس کا تفصیلی آئین ہی اس کی طاقت ہے- جمہوری نظام کے حامل اس ملک کی معیشت حیرت انگیز شرح سے بڑھ رہی ہے- اور اس کے جوہری ہتھیار اسے مزید طاقتور بنارہے ہیں-

جرمنی
جرمنی دنیا کی تیسری بڑی معیشت رکھتا ہے اور سب سے زیادہ طاقتور یورپی یونین کا رکن بھی ہے- تاہم دو عالمی جنگوں نے اسے بہت زیادہ متاثر کیا جس سے اسے شدید نقصان کا سامنا بھی کرنا پڑا-

پاکستان
پاکستان ایک بہت بڑی مسلم آبادی کا حامل ملک ہے اور یہ ایک ایٹمی طاقت رکھنے والا ملک بھی ہے- اور اسی وجوہات کی بنا پر یہ ملک اپنی فوج پر بجٹ کا ایک بڑا حصہ صرف کرتا ہے- یہ ملک بہت اچھے معدنی وسائل کا ایک بہت بڑا ذخیرہ بھی رکھتا ہے-

برازیل
برازیل لاطینی امریکہ کا ایک حصہ ہے اور ایک بہت بڑا جموری ملک ہے- دنیا کے سب سے زیادہ پرتگالی زبان بولنے والے افراد اس ملک میں بستے ہیں- اس ملک کا ذرائع ابلاغ کافی مستحکم ہے اور دوسرے ممالک کے ساتھ اس کے تعلقات بھی کافی مضبوط ہیں-