الیکشن سروے: مسلم لیگ - ن (اول)٬ پی ٹی آئی (دوئم) اور پی پی پی (سوئم)

11 مئی - آج پاکستان کے لیے ایک تاریخ ساز دن بننے جا رہا ہے٬ جہاں عوام نے فیصلہ کرنا ہے کہ مستقبل کے لیے وہ کس پارٹی پر زیادہ اعتبار کرتے ہیں- آج صرف الیکشن ہی کا دن نہیں بلکہ پاکستان کی تقدیر کا فیصلہ بھی ہونے جارہا ہے- مسلم لیگ (ن) اور پی ٹی آئی نے تو آج کے الیکشن دن کے لیے بھرپور جلسے اور سیاسی گہما گہمی کو جاری رکھا٬ لیکن پیپلز پارٹی اس روایتی جوش و جذبے سے عاری نظر آئی جو کبھی الیکشن کی اس گہما گہمی میں اس پارٹی کا “ مخصوص اسٹائل “ تھا- البتہ کسی پارٹی کی کم یا زیادہ سیاسی سرگرمیوں کو بنیاد بنا کر پہلے سے رائے قائم کر لینا مشکل ہے کہ کون اس الیکشن میں کتنی سیٹیں لے گا؟
 

بہرحال دنیا بھر کے کئی سروے اداروں نے اپنے اپنے تجربات اور سروے کی بنیاد پر اپنی اپنی پیشن گوئیاں کی ہیں- ہماری ویب کی جانب سے بھی ان تمام سیاسی سرگرمیوں کے دوران ایک سروے کا انعقاد کیا گیا- اس سروے میں لوگوں سے سوال کیا گیا کہ ان کے خیال میں وہ کونسی سیاسی جماعتیں ہیں جو الیکشن 2013 میں کامیاب پارٹیوں کی فہرست میں ٹاپ پر ہوں گی؟

اس سروے کے نتائج جو سامنے آئے وہ کچھ یوں تھے کہ سب سے پہلے نمبر پر پاکستان مسلم لیگ (ن) ہوگی٬ دوسرے نمبر پر پاکستان تحریک انصاف اور تیسرے نمبر پر پیپلز پارٹی رہے گی-

اس سروے میں تقریبا 3000 افراد نے حصہ لیا٬ جبکہ ان افراد نے ہماری ویب کو مختلف پارٹیوں کے حوالے سے اپنی آرا سے بھی آگاہ کیا جو کہ بلاشبہ اپنا ایک مقام رکھتی ہیں- دلچسپ بات یہ ہے کہ تبصرے کرنے والے افراد کا تعلق پاکستان کے ساتھ ساتھ پوری دنیا کے مختلف ممالک سے بھی تھا-