یوٹیوب پر پابندی کی اصل وجہ توہین آمیز مواد نہیں

اس وقت دنیا یہ جانتی ہے کہ پاکستان میں یوٹیوب پر پابندی کی وجہ توہین آمیز مواد کا موجود ہونا ہے٬ لیکن گزشتہ روز ایک حیرت انگیز انکشاف سامنے آیا ہے- وزارت انفارمیشن ٹیکنالوجی کے ذرائع کے مطابق٬ یوٹیوب پر پابندی کی اصل وجہ توہین آمیز مواد کا موجود ہونا نہیں٬ بلکہ 3G اسپیکٹرم لائسنسنگ کے لیے منہ مانگی رشوت کا نہ دینا ہے-

امت کی شائع کردہ رپورٹ میں بتایا گیا ہے کہ ذرائع کے مطابق یہی سبب ہے کہ وزیر مملکت انفارمیشن ٹیکنالوجی انوشہ رحمان نے یوٹیوب کے بلاک ہونے اور 3G اسپیکٹرم لائسنسنگ کی تاخیر کا نوٹس لیا ہے- وزیر مملکت انوشہ رحمان نے نہ صرف 3G اور 4G لائسنسنگ کے لیے فریکوئنسی ایلوکیشن بورڈ سے تمام تفصیلات طلب کرلی ہیں٬ بلکہ اس بات کی تحقیقات بھی کی جارہی ہیں کہ پی ٹی اے٬ توہین آمیز مواد روکنے میں کیوں ناکام رہا-
 

ذرائع کا کہنا ہے کہ جب انوشہ رحمن نے وزارت انفارمیشن ٹیکنالوجی کا عہدہ سنبھالا تو وزارت میں سیکرٹری کا عہدہ خالی تھا٬ یعنی اس اہم وزارت میں سیکریٹری ہی موجود نہیں-

وزیر مملکت انفارمیشن ٹیکنالوجی نے اس بات کی بھی تردید کی کہ پاکستان نے گوگل کی ویب سائٹ کو بلاک کرنے کی دھمکی دی ہے- انہوں نے کہا کہ ہمارا گوگل ویب سائٹ بند کرنے کا کوئی ارادہ نہیں٬ بلکہ ہماری یوٹیوب کی انتظامیہ سے بات چیت چل رہی ہے- ہم نے یوٹیوب کو کہا ہے کہ وہ توہین آمیز مواد ہٹا دیں تو بہتر ہے٬ کیونکہ اس سے تمام مسلمانوں کی دل آزاری ہورہی ہے- اس کے علاوہ ہم توہین آمیز مواد کو روکنے کے لیے فلٹر لگانا چاہتے ہیں اور اس حوالے سے جلد یوٹیوب سے معاملات طے ہوجائیں گے- اور پاکستان میں یوٹیوب اسی صورت بحال کی جائیں گی جب ہم اس پر فلٹر لگانے میں کامیاب ہوجائیں گے-

واضح رہے کہ یوٹیوب کو گستاخانہ فلم نہ ہٹانے پر پاکستان میں 17 ستمبر 2012 کو بلاک کیا گیا- 29 دسمبر 2012 کو وزیراعظم کی اجازت کے بغیر چند گھنٹوں کے لیے اسے پھر کھولا گیا٬ لیکن توہین آمیز مواد موجود ہونے پر اسے دوبارہ بلاک کردیا گیا- تقریباً دس ماہ کا عرصہ گزر چکا ہے اور یوٹیوب پاکستان میں بحال نہیں ہوئی ہے- یوٹیوب مشہور سرچ انجن گوگل کا ذیلی شعبہ ہے-

اس وقت تک حکومت نے کہا تھا کہ گوگل نے توہین رسالت پر مبنی مواد ہٹانے سے انکار کیا٬ جس کے بعد راجہ پرویز اشرف نے اسے بلاک کرنے کا حکم دیا- یہ بات اس لیے قابل قبول نہیں کہ اسی مواد کو گوگل نے انڈونیشیا٬ بھارت٬ لیبیا اور مصر میں روک دیا ہے- جب وہاں توہین آمیز مواد یوٹیوب پر نہیں دیکھا جاسکتا تو پاکستان میں یہ مواد کیونکر بلاک نہیں ہوسکتا- پس پردہ کچھ تو کہانی ہوگی-