|
پاکستان کے صوبہ بلوچستان کے ساحلی علاقے گوادر میں زلزلے
کے بعد ایک پہاڑ نما جزیرہ نمودار ہوا ہے۔
گودار میں صحافی بہرام بلوچ کے مطابق منگل کو زلزلے کے بعد گوادر شہر سے
مغرب کی جانب تقریباً دس کلومیٹر کے فاصلے پر سمندر میں یہ جزیزہ نمودار
ہوا ہے۔
|
|
|
|
انہوں نے بتایا کہ یہ جزیرہ پدریز کے ساحل سے ایک کلومیٹر سے بھی کم فاصلے
پر نمودار ہوا ہے اور اس کی اونچائی ایک سو فٹ اور لمبائی دو سو پچاس فٹ کے
قریب ہے۔
جزیرہ نمودار ہونے کی خبر کے ساتھ گودار سے شہریوں کی ایک بڑی تعداد جزیرے
کو دیکھنے کے لیے ساحلِ سمندر پر پہنچی۔
مقامی ماہری گیروں کے مطابق اس طرح کا جزیرہ سنہ انیس سو پینتالیس، چھیالیس
میں بھی زلزلے کے بعد نمودار ہوا تھا اور تقریباً ایک سال کے بعد غائب ہو
گیا تھا اور اس وقت اسے زلزلے کا پہاڑ کہا جاتا تھا۔ اس کے علاوہ تقریباً
ڈیڑھ سال پہلے بھی مٹی کا چھوٹا سا پہاڑ کچھ عرصے کے لیے نمودار ہوا تھا۔
سمندری علوم کے ماہر عبدالرحیم کے مطابق مکران کی ساحلی پٹی میں مڈ والکینو
یعنی مٹی کے آتش فشاں موجود ہیں اور جب زلزلے کے بعد میتھین گیس کا دباؤ
بڑھتا ہے تو اس طرح کے جزیرے نمودار ہوتے ہیں۔
|
|
|
پاکستان میں منگل کی سہ پہر کو آنے والے شدید زلزلے سے بلوچستان میں آواران،
بیلہ، خاران اور اتھل کے علاقوں میں وسیع پیمانے پر تباہی ہوئی ہے۔ |