چند لذیذ کھانے جو کسی زہر سے کم نہیں

عوام میں بے حد مقبول فاسٹ فوڈ اور دوسرے کھانے بے حد لذیذ معلوم ہوتے ہیں اور نوجوان نسل ایسے کھانوں اور ہوٹلنگ کی رسیا ہے لیکن ان غیر معیاری کھانوں کے باعث صحت کے مسائل میں تیزی سے اضافہ ہورہا ہے۔اس حوالے سے عوام میں شعور بیدار کرنے کی اشد ضرورت ہے کیوں کہ اس معاملے میں ذرا سی بد احتیاطی متعدد بیماریوں کو جنم دیتی ہے۔ کوشش یہی کرنی چاہیے کہ زیادہ تر گھر کے کھانوں پر انحصار کیا جائے جو حفظانِ صحت کے اصولوں کو مدِّنظر رکھ کر بنائے جاتے ہیں ۔اگر باہر کا کھانا کھانے کا دل چاہ رہا ہو تو چھپر ہوٹلوں کے بجائے معیاری ریستوران اور ہوٹلوں کا انتخاب کرنا چاہیے۔اور اس بات کی مکمل چھان بین کرلینی چاہیے کہ وہاں صفائی کی کیا صورت حال ہے اور وہاں استعمال کیے جانے والے تیل ،مصالحہ جات اور دیگر اجزائے ترکیبی صحت کے لیے نقصان دہ تو نہیں۔ ایسے ہوٹل جن کے بارے میں اکثر انکشافات سننے کو ملتے ہیں کہ وہاں غیر معیاری گوشت یا مردہ جانوروں کا گوشت استعمال کیا جاتا ہے ان سے حتی الامکان بچنے کی کوشش کرنی چاہیے۔
 

فریز سلاد
ریستوران میں صارفین کو جو سلاد پیش کیا جاتا ہے وہ اپنی پرکشش سجاوٹ کی وجہ سے دیکھنے میں بہت خوب صورت معلوم ہوتا ہے اس لیے لوگ اسے ذوق و شوق سے کھاتے ہیں۔بظاہر باریک نفاست سے کٹا ہوا،مایونیز سے مزین کچومر سلاد،صحت کے لیے بہت بڑی تباہی کا باعث بنتا ہے ۔اس قسم کے سلاد میں 98 فی صد پانی پایا جاتا ہے اور غذائیت تقریباً نا پید ہوتی ہے۔ اس میں موجود شگافوں اور کناروں پر جراثیم چپک جاتے ہیں جو سلاد کے ساتھ جسم کے اندر داخل ہو کر مختلف بیماریوں کا موجب بنتے ہیں۔

سب سے زیادہ فروخت ہونے والی اشیائے خورد نوش
فاسٹ فوڈ ریستوران اور دوسرے ہوٹل، صارفین کی دلچسپی کو مدِّنظر رکھتے ہوئے سب سے زیادہ پسند کیے جانے والے فوڈ آئٹمز کی طلب کو پورا کرنے کے لیے انہیں کافی تعداد میں تیار کروالیتے ہیں جو پیکنگ کی شکل میں مختلف اسٹوروں اور بیکریز پر بھی دستیاب ہوتے ہیں ۔جو بعض اوقات کئی دنوں اور کئی ہفتوں تک رکھے رہتے ہیں جس میں وقت گزرنے کے ساتھ ساتھ بہت سے جراثیم پیدا ہو جاتے ہیں جو مہلک بیماریوں کا باعث بنتے ہیں۔ اس کے علاوہ پیکنگ میں دست یاب کھانوں میں موجود مایونیز بھی صحت کے لیے نقصان دہ ثابت ہوتی ہے۔

پانی
اعلیٰ پائے کے ریستوران سے لے کر معمولی درجے کے ہوٹلوں میں میزوں پر پانی پہلے سے ہی موجود ہوتا ہے اور اکثر افراد میز سنبھالتے ہی پانی پی لیتے ہیں یہ سوچے بغیر کہ یہ پانی اُن کی صحت کے لیے کس قدر نقصان دہ ثابت ہوتا ہے۔ماہرین کے مطابق کوئی بھی چیز، ایک مختصر وقت کے بعد 40 ڈگری سے140 ڈگری کے درمیان رکھی جائے تو اس میں بیکٹیریا پیدا ہونے کی صلاحیت بڑھ جاتی ہے۔اس لیے اگر آپ کی میز پر پہلے سے پانی رکھا گیا ہو تو اُسے پھینک کر نیا پانی منگوائیں۔

مفت اسنیکس
اکثر ہوٹلوں اور ریستوران میں بسکٹ،اسنیکس اور مختلف میوہ جات بلا قیمت دست یاب ہوتے ہیں اس لیے نئے گاہگ کی آمد پر انہیں ہر بار تبدیل نہیں کیا جاتا۔دن کے اختتام پر یہ میزوں پر بچ جانے والے تمام میوہ جات ایک برتن میں واپس ڈال کر رکھ لیے جاتے ہیں اور اگلے دن انہیں دوبارہ استعمال کرلیا جاتا ہے۔ یہ صحت کے لیے خطرے کا باعث بنتے ہیں ۔

ہڈی والا گوشت
ریستوران میں دستیاب گوشت کے چھوٹے ٹکڑے جیسے کہ مرغی کے سینے کا گوشت ،اسے پوری طرح گلانا مشکل ہوتا ہے کیوں کہ یہ بیرونی سطح سے جلدی جل جاتا ہے۔یہ گوشت عموماً اندر سے کچا اور باہر سے خستہ ہوتا ہے اور ذوق وشوق سے کھایا جاتا ہے ۔عالمی ادارۂ صحت کے مطابق آدھا پکا ہوا یہ گوشت صحت کے لیے نہ صرف مضر ہے بلکہ خوراک کے باعث پیدا ہونے والی بیماریوں کی بڑی وجہ بھی ہے۔

انواع و اقسام کے سوس اور چٹنیوں سے مزین کھانے
کھانے کے اوقات میں صارفین کی بھیڑ کو مدّنظر رکھتے ہوئے، کھانا ختم ہونے سے بچنے کے لیے، ریستوران اکثر ضرورت سے زائد کھانے تیار کرتے ہیں ۔دن کے اختتام پر بچ جانے والے اضافی کھانے اگلے روز مختلف قسم کے ساسز اور چٹنیوں سے سجا کر صارفین کو پیش کردئیے جاتے ہیں۔ یہ طریقہ کھانے کے اصل ذائقے کو ختم کر کے انہیں پرکشش بنا کر مہنگے داموں فروخت کرنے کا آسان راستہ ہے۔ اس کا امکان عموماً دم پخت ،پاستا ،سٹوواور سوپ میں ڈالے گئے گوشت میں زیادہ پایا جاتا ہے۔اس لیے انہیں کھانے سے پہلے اطمینان کر لینا چاہیے۔

گرل کیے ہوئے کھانے
صارفین ایسے ہوٹلوں اور ریستوران کو بہت پسند کرتے ہیں جہاں گرل ڈائننگ ٹیبل رکھے جاتے ہیں ۔بھاپ والی میزوں پر بنے ہوئے کھانوں میں ،صارفین کے چھینکنے ،کھانسنے اور نامناسب انداز میں پکے ہونے کی وجہ سے جراثیم پیدا ہو جاتے ہیں۔اس لیے اس قسم کے کھانے بجائے جسم کو کوئی غذائیت اور فائدہ پہنچانے کے الٹا صحت کے لیے نقصان دہ ثابت ہو تے ہیں۔

فنگر چپس
آج کل مختلف انداز میں بنے ہوئے آلو کے چپس بے حد پسند کیے جاتے ہیں اور برگروں کے ساتھ علیحدہ سے مہنگے داموں فروخت کیے جاتے ہیں،جنہیں صارفین بالخصوص نوجوان ذوق و شوق سے کھاتے ہیں حالانکہ اس میں استعمال ہونے والے، انتہائی ناقص اور گلے سڑے آلو جو دکاندارعلیحدہ کردیتے ہیں۔ ریستوران انہیں انتہائی سستے داموں خرید کر استعمال کرتے ہیں اورانہیں غیر معیاری کیچپ کے ساتھ سجا کر صارفین کی خدمت میں پیش کردیا جاتا ہے جو صحت کے لیے سخت مضر ہے ۔اس کے علاوہ اس میں انتہائی خراب معیار کا تیل استعمال کیا جاتا ہے اور ایک ہی تیل میں بار بار چپس بنائے جاتے ہیں۔متعدد بار تیل کے گرم ہونے اور جلنے کے باعث اس میں خطرناک زہریلے کیمیائی مادے پیدا ہو جاتے ہیں جو متعدد بیماریوں کا باعث بنتے ہیں۔

سی فوڈز
ایسے ریستوران جہاں سی فوڈز دستیاب ہوتے ہیں وہاں اس بات کی کوئی گارنٹی نہیں ہوتی کہ ان ڈشز میں موجود سی فوڈ آپ کے ہاتھوں میں دئیے گئے مینیو کارڈ کے مطابق ہے بھی یا نہیں۔ ایسی بہت سی ڈشز جو جھینگے اور کیکڑے اور اعلی نسل کی مچھلیوں سے بنتی ہیں اُن میں بعض اوقات یہ چیزیں سرے سے موجود ہی نہیں ہوتیں۔اس کے علاوہ فنگر فش اور تلی ہوئی مچھلیوں میں اُن کی جو نسل بتائی جاتی ہے اُس کی جگہ سستے داموں ملنے والی مچھلی فروخت کر کے مہنگے دام وصول کرلیے جاتے ہیں ۔اس کاروبار میں ریستوران مالکوں کے ساتھ ڈسٹری بیوٹرز بھی شریک ہوتے ہیں جو باآسانی صارفین کو دھوکہ دینے میں کامیاب ہو جاتے ہیں۔

آئس کریم
آئس کریم چاہے گھر پر بنی ہو یا کسی ریستوران پر یہ پیسے اور وقت کا ضیاع ہے کیوں کہ یہ انسانی صحت کے لیے کسی طور فائدہ مند ثابت نہیں ہوتی بلکہ اس میں موجود بڑی مقدار میں فیٹس اور کیلوریز موٹاپے کا باعث بن کر متعدد بیماریاں پیدا کرتی ہیں۔ آئس کریم وقتی طور پر تو دماغ کو ٹھنڈک پہنچا کر سکون فراہم کرتی ہے لیکن اس کا زیادہ استعمال پیشانی کے قریب والا دماغ کا حصہ متاثر کرتا ہے۔اس کے علاوہ اس میں میٹھا بڑی مقدار میں موجود ہوتا ہے اس لیے اسے میٹھا زہر بھی کہا جاتا ہے۔

پیزا
پیزا کسی بھی ریستوران کے لیے سونے کی کان کی حیثیت رکھتا ہے کیوں کہ اس میں نہایت کم قیمت اشیاء استعمال ہوتی ہیں جبکہ پیزا کی قیمت کافی زیادہ ہوتی ہے۔اس لیے ریستوران سے پیزا خریدنا پیسے کا ضیاع ہے۔ ریسٹورنٹس اور کنسلٹنٹ مشترکہ عمل کے سینئر آپریشن کنسلٹنٹ لیڈسکی کا کہنا ہے کہ اک نیو یارک سٹی پیزا ہٹ کا اجزائے ترکیبی پر خرچ محض 3.64 ڈالر ہے لیکن وہ اسے 10 ڈالر میں فروخت کرتے ہیں۔یعنی تین گنا منافع وصول کیاجاتا ہے۔اس کے علاوہ ان میں استعمال ہونے والا تیل اور مایونیز وغیرہ صحت کے لیے نقصان دہ ثابت ہوتی ہے۔

باسکٹ بریڈ
عموماً کھانے کے اوقات کے علاوہ اگر آپ کو اچانک بھوک محسوس ہو تو آپ فوراً کسی ہوٹل کا رخ کرتے ہیں۔جہاں آپ کو بغیر انتظار کے فوری طور پر ڈبل روٹی کی باسکٹ پیش کردی جاتی ہے جو اکثر ریستوران متبادل کے طور پر تیار رکھتے ہیں ۔جو نہ صرف آپ کی بھوک ختم کرتی ہے بلکہ آپ کی جیب بھی ہلکی کر دیتی ہے۔چاہے یہ اعلیٰ معیار کی کیوں نہ ہو اسے کسی ریستوران سے کھانے سے گریز کرنا چاہیے کیوں کہ اس کی قیمت اصل قیمت سے کئی گنا زیادہ وصول کی جاتی ہے۔