’خواب میں بشارت‘: ہزار ٹن خزانے کی تلاش

ماہرین آثار قدیمہ کی طرف سے بھارت میں انیسوی صدی کے ایک قلعے کے کھنڈرات میں کھدائی شروع کر دی گئی ہے۔ ایک مشہور ہندو سوامی کے مطابق ان کے خواب میں ایک بادشاہ نے خود آ کر پچاس ارب ڈالر مالیت کے خزانے کی نشاندہی کی ہے۔

اس خزانے کو تلاش کرنے کا فیصلہ اس وقت کیا گیا، جب ہندو سوامی شبھان سرکار نے اپنا خواب ایک بھارتی وزیر کو سنایا۔ اس حکومتی وزیر نے گزشتہ ماہ اس سوامی کے آشرم کا دورہ کیا تھا۔ شبھان سرکار کا کہنا ہے کہ ان کے خواب میں سابق بادشاہ راؤ رام بخش سنگھ کی روح آئی اور انہیں 1000 ٹن وزنی خزانے کی حفاظت کی ذمہ داری سونپی گئی ہے۔ سوامی کے مطابق انہیں یہ بھی بتایا گیا ہے کہ یہ خزانہ شمالی ریاست اترپردیش میں راؤ رام بخش سنگھ کے قلعے کے نیچے چھپا ہوا ہے۔
 

یاد رہے کہ راؤ رام بخش سنگھ کو برطانوی نوآبادیاتی افواج کے خلاف بغاوت کے الزام میں سن 1858ء میں پھانسی پر لٹکا دیا گیا تھا۔

ڈسٹرکٹ مجسٹریٹ وجے آنند کے مطابق بھارتی جیولوجیکل اور آثار قدیمہ کے حکام نے اتوار کے روز اس علاقے کا سروے کیا تھا اور انہیں 200 میٹر گہرائی میں بھاری مقدار میں کسی دھات کے پائے جانے کے ثبوت ملے تھے۔ وجے آنند کے مطابق اب یہ کھدائی ہی ثابت کر سکتی ہے کہ یہ کس قسم کی دھات ہے، آیا لوہا ہے یا سونا۔

بھارتی آثار قدیمہ کے حکام کے مطابق پرانے قلعے کے کھنڈرات میں کھدائی کا کام شروع کر دیا گیا ہے۔ تاہم کھدائی سے پہلے ہی اس خزانے کے حصہ دار بھی لائن میں لگ گئے ہیں۔ بادشاہ کی اولاد میں سے ایک شخص نوچندی ویر پرتاب سنگھ کا کہنا ہے، ’’ اگر واقعی سونا ملتا ہے تو اس میں ہمارا بھی حصہ ہوگا۔‘‘

اترپردیش کے ریاستی اور مقامی حکام نے بھی کہا ہے کہ دولت میں سے اس خاندان کو حصہ ملنا چاہیے۔ مقامی قانون ساز کلدیپ سینگر کا کہنا ہے، ’’اس خزانے کو ریاستی فلاح و بہبود کے لیے استعمال کیا جانا چاہیے۔‘‘

غریب گاؤں ’ڈھنڈیا کھیڑا‘ کے رہائشیوں کا نیوز ایجنسی اے پی سے گفتگو کرتے ہوئے کہنا تھا کہ وہ اس خزانے کے بارے میں ایک طویل عرصے سے جانتے ہیں اور ان کے بزرگ بھی اس بارے میں کہانیاں سناتے تھے۔