آپ کا کمپیوٹر ہیک کیا جاسکتا ہے٬ لیکن کیسے؟

دنیا کی بڑی سافٹ ویئر کمپنی مائیکروسافٹ نے متنبہ کیا ہے کہ ہیکرز اس کے آپریٹنگ سسٹم کے اندر ایک رخنے (vulnerability) کو استعمال کرتے ہوئے لوگوں کے متاثرہ کمپیوٹروں تک رسائی حاصل کر سکتے ہیں۔

بی بی سی کے مطابق مائیکروسافٹ کا کہنا ہے کہ ہیکرز کمپیوٹر استعمال کرنے والوں کو ایک خاص ای میل یا ویب کانٹینٹ بھیج کر اسے کھولنے کی درخواست کریں گے جس کا فائدہ اٹھا کر وہ صارفین کے کمپیوٹر تک رسائی حاصل کر لیں گے۔
 

مائیکرو سافٹ کے مطابق وہ اس حملے کے بارے میں جانتی ہے اور اس کی تفتیش کر رہی ہے۔

خیال رہے کہ اس مسئلے نے مائیکروسافٹ کے ونڈوز وسٹا، ونڈو سرور 2008، مائیکرو سافٹ آفس 2003، 2010 اور مائیکروسافٹ لنک کو متاثر کیا تھا۔

مائیکروسافٹ ونڈوز اور آفس کے حالیہ ورژن اس مسئلے سے متاثر نہیں ہوئے کیونکہ وہ گرافکس استعمال کرتے ہیں۔

مائیکروسافٹ کا کہنا ہے کہ وہ سکیورٹی اپ ڈیٹ کے ذریعے اس مسئلے کا حل پیش کرے گی۔

دریں اثنا مائیکروسافٹ نے اپنے صارفین کو ہدایت کی ہے کہ وہ اپنی سیٹنگز بدل کر اس کا عارضی حل تلاش کر سکتے ہیں تاہم یہ اس مسئلہ کا مستقل حل نہیں ہے لیکن سکیورٹی اپ ڈیٹ آنے تک اس سے ہیکرز کو بلاک کیا جا سکے گا۔