بدعنوان ممالک: پاکستان میں بہتری، بھارت جوں کا توں

ٹرانسپیرنسی انٹرنیشنل نے دنیا کے 177 ممالک میں بدعنوانی کے تصور سے منسلک اس سال کی فہرست جاری کی ہے جس کے مطابق پاکستان 28 پوائنٹس کے ساتھ 127 ویں مقام پر ہے جب کہ پڑوسی ملک بھارت 36 پوائنٹس کے ساتھ 94 ویں نمبر پر ہے۔

بی بی سی کی رپورٹ کے مطابق اس فہرست میں کہا گیا ہے کہ اقتدار کا غلط استعمال، خفیہ سودے اور رشوت خوری عالمی سطح پر معاشروں کو برباد کر رہے ہیں۔
 

جنوبی ایشیا میں افغانستان کی حالت سب سے خراب بتائی گئی ہے جسے ٹرانسپیرنسی انٹرنیشنل کی فہرست میں آٹھ پوائنٹس ملے ہیں اور وہ فہرست میں 175 ویں مقام پر ہے۔ گزشتہ سال بھی افغانستان کی یہی صورت حال تھی۔

بھارت کو مسلسل دوسرے سال یہی سکور ملا ہے جب کہ پاکستان میں گزشتہ سال کے مقابلے بدعنوانی میں ایک پوائنٹ کی کمی واقع ہوئی ہے۔

فہرست کے مطابق 100 پوائنٹس والے ملک کو تقریباً بدعنوانی سے پاک سمجھا جاتا ہے اور زیرو کا مطلب حالات ناگفتہ بہ ہیں۔

رپورٹ کے مطابق فہرست میں شامل 177 ممالک میں سے دو تہائی اب بھی 50 پوائنٹس سے نیچے ہیں۔

اس فہرست میں سری لنکا بھارت سے بہتر پوزیشن میں ہے جسے فہرست میں 37 پوائنٹس کے ساتھ 91 واں مقام حاصل ہے۔