پاکستان: قدرتی حسن سے مالا مال کیرتھر نیشنل پارک

کراچی کی ہنگامہ خیز مشینی زندگی، بھاگ دوڑ کا نہ ختم ہونے والا سلسلہ شب و روز کی مصروفیات نے یہاں کے لوگوں کو زندگی کے لطف سے تقریباً محروم کردیا ہے۔ ذہنی اور جسمانی تھکاوٹ نے لوگوں کے مزاج غیر محسوس طور پر بدل کر رکھ دئیے ہیں بعض اوقات ذہن معمولاتِ زندگی سے اس قدر اکتا جاتا ہے کہ سب کچھ چھوڑ چھاڑ کر کسی پرسکون اور خوبصورت مقام پر بھاگ جانے کو دل چاہتا ہے۔ یوں تو پاکستان فطرت کے حسین اور دلکش مناظر سے آراستہ ایک ایسی سرزمین ہے جہاں فلک بوس پہاڑی سلسلے بھی ہیں۔ وسیع و عریض ریگستان بھی سیاحوں کو اپنے حسن سے مسحور کرتی سرسبز وادیاں گنگناتے دریاؤں سے لے کر طویل سمندری ساحل سرسبز اور خشک پہاڑ گھنے جنگلات جو جڑی بوٹیوں سے لے کر نایاب جنگلی حیات سے پر ہیں۔ شمالی علاقہ جات کی تو بات ہی کچھ اور ہے مگر وہاں تک رسائی ہر کسی کے بس کی بات نہیں کبھی وقت اجازت نہیں دیتا اور کبھی معاشی وسائل خواہشات کا خون کردیتے ہیں لیکن پریشانی کی کوئی بات نہیں ہم آپ کو کراچی سے صرف 70 کلومیٹر کے فاصلے پر ایک خوبصورت جگہ لے چلتے ہیں جہاں پہاڑ بھی ہیں، ریتیلے میدان بھی، جنگل بھی اور مختلف النوع جانور اور پرندے بھی، جی ہاں یہ کیرتھر نیشنل پارک ہے۔
 

کیرتھر نیشنل پارک کراچی سے صرف 70 کلومیٹر کے فاصلے پر ہے۔ کیرتھرنیشنل پارک کا قیام 28 اکتوبر 1973 کو عمل میں آیا۔ ہوا یوں کہ 1970 کے عشرے میں ورلڈ وائلڈ لائف (W.W.F) کے جارج شیلر نے کیرتھر رینج میں اسٹڈی کے بعد اس وقت کے وزیر اعظم ذوالفقار علی بھٹو کو رپورٹ دی کہ اس علاقے میں بعض نایاب جانور موجود ہیں اگر انہیں بروقت تحفظ نہ دیا گیا تو ان کی نسل ختم ہوجائے گی۔ معاملے کی اہمیت کے پیش نظر اس پر سنجیدگی سے غور کیا گیا اور یوں 28 اکتوبر 1973 کو اس پارک کا قیام عمل میں آیا۔ ورلڈ وائلڈ لائف کے قوانین کے تحت اس نیشنل پارک کو کٹیگری پانچ میں شمار کیا گیا۔ اس کٹیگری میں شمار ہونے والے نیشنل پارک میں جنگلی حیات کے تحفظ کا مکمل اہتمام کیا جاتا ہے۔ یہاں ملک کا سربراہ بھی کسی جانور کا شکار نہیں کرسکتا۔ پارک کے قیام کے وقت اس میں 48 جنگلی بھیڑیں 12 سو کے قریب سندھ آئی بگس اور ایک دو چنکارہ ہرن کے علاوہ کچھ تعداد میں چیتے بھی موجود تھے۔ سندھ وائلڈ لائف منیجمنٹ بورڈ حکومت پاکستان اور چند عالمی اداروں کے تعاون سے یہاں جنگلی حیات کے تحفظ کے خاطر خواہ انتظامات کئے گئے۔ آج یہاں 15 سو کے قریب چنکارہ ہرن، 2 ہزار کے قریب جنگلی بھیڑیں اور تقریباً 4 ہزار کی تعداد میں سندھ آئی بگس موجود ہیں۔ ان تین کے علاوہ کیرتھر نیشنل پارک میں سیاہ گوش، صحرائی بلے، بھیڑیں، جنگلی چوہے، کانٹے دار چوہے، نیولے، چھپکلیوں، گرگٹ اور سانپوں کی کئی نایاب اقسام محفوظ اور قدرتی ماحول میں پروان چڑھ رہی ہیں۔ پرندوں کی بھی مختلف اقسام یہاں موجود ہیں جبکہ چڑیا سے لے کر راج ہنس تک تقریباً 700 اقسام کے پرندے سائبیریا، یورپ اور دیگر ممالک سے سرد موسم میں ہجرت کرکے اس طرف آتے ہیں۔ سرد موسم میں ہمالیہ کا سنہرا عقاب اور گرے ہپوکولیس جیسا خوبصورت پرندہ بھی یہاں دیکھا جاسکتا ہے۔ کسی زمانے میں یہاں گلدار (چیتے) بھی موجود تھے لیکن 1982 میں آخری چار چیتے ایک حادثے کی نذر ہوگئے۔

کیرتھر نیشنل پارک میں انتظامی حوالوں اور جنگلی حیات پر تحقیق کرنے والوں کی سہولت کے پیش نظر دو سینٹر، کار سینٹر اور کرچار سینٹر موجود ہیں جبکہ دو سب سینٹر بھی ہیں جن میں ایک تھانو احمد خان اور دوسرا بچانی سب سینٹر کے نام سے پہچانا جاتا ہے۔ جنگلی حیات پر تحقیق کرنے والوں کو حتی الامکان سہولیات فراہم کی جاتی ہیں۔ مطالعاتی دورے پر جانے کے لئے ان کے دفتر جو کہ کراچی پریس کلب اور YMCA کے قریب واقع ہے سے پیشگی اجازت لینی پڑتی ہے۔ گزشتہ دنوں کراچی ایڈونچر کلب نے اساتذہ کے لئے مطالعاتی دورے کا اہتمام کیا جس میں ڈی جے کالج، گورنمنٹ ڈگری کالج برائے طلباء نارتھ کراچی، جناح کالج، آدمجی سائنس کالج، گورنمنٹ کالج برائے طلباء ناظم آباد، شپ اونر کالج، پریمئر کالج، قائد ملت کالج، بفرزون کالج ، ایس ایم سائنس کالج اور کراچی یونیورسٹی کے اساتذہ شامل تھے۔