یورپی باشندے پہلے کیسے تھے؟

قریب سات ہزار سال قبل اسپین میں رہنے والے ایک شکاری کے ڈی این اے کے مطالعے سے پتہ چلا ہے کہ اب تک کے اندازوں کے برعکس موجودہ دور کے کافی قریبی عرصے تک یورپی باشندوں کی جلد کی رنگت گہری اور آنکھیں نیلی ہوتی تھیں۔

ڈوئچے ویلے کی شائع کردہ رپورٹ میں کہا گیا ہے کہ پیرس سے موصولہ رپورٹوں کے مطابق یہ بات یورپی باشندوں کی جینیاتی تاریخ پر تحقیق کرنے والے ماہرین کی طرف سے اتوار کے روز کہی گئی۔ سائنسی تحقیقی جریدے ’نیچر‘ میں شائع ہونے والی ایک نئی ریسرچ کے نتائج کے مطابق ماہرین کو 2006ء میں اسپین میں ایک قدیم لیکن بہت گہرے غار سے کھدائی کے دوران جد قدیم انسان کے جسمانی ڈھانچے کی باقیات ملی تھیں، اسے لا برانا ون La Brana 1 کا نام دیا گیا تھا۔
 

اب لا برانا ون کے ایک دانت سے حاصل کردہ جینیاتی مواد کے سائنسی مطالعے سے یہ انکشاف ہوا ہے کہ اس دور کے انسانوں میں گہری جسمانی رنگت اور نیلی آنکھوں کا بہت حیران کن امتزاج پایا جاتا تھا۔

لا برانا ون جس دور میں زندہ تھا، وہ آج سے پانچ ہزار سال سے لے کر دس ہزار سال تک پہلے کا وہ دور تھا جسے ماہرین Mesolithic Period کا نام دیتے ہیں۔ اب تک کی معلومات کے مطابق یہ کہا جاتا تھا کہ اس دور کے یورپی انسانوں کی جسمانی رنگت سفید ہو چکی تھی، جس کا سبب بہت اونچے علاقوں میں الٹرا وائلٹ شعاعوں کی بہت کم شرح بنی تھی۔

لیکن ’نیچر‘ میں شائع ہونے والی نئی ریسرچ کے شریک مصنف کارلیس لالوئزا فوکس کہتے ہیں، ’’اب تک یہ تصور کیا جاتا تھا کہ یورپ میں قدیم باشندوں کی جسمانی رنگت کا بہت ہلکا اور سفید ہونا ارتقائی عمل کے نتیجے میں بہت پہلے ہی عمل میں آ چکا تھا۔ لیکن لا برانا ون کے ڈی این اے کے مطالعے سے پتہ چلتا ہے کہ ایسا بالکل نہیں تھا۔‘‘