فٹبال ورلڈ کپ٬ پاکستان دہشت گرد ملک نہیں

پاکستان کی سڑکوں پر اسٹریٹ چلڈرن کی حیثیت سے زندگی گزارنے والے بچے اب 'اسٹریٹ چلڈرن ورلڈ کپ 2014' کھیلنے کے لیے تیار ہیں۔ پاکستانی ٹیم میں 9 اسٹریٹ چلڈرن شامل ہیں جن میں سے 8 بچوں کا تعلق کراچی شہر، جبکہ ایک کوئٹہ سے ہیں۔

وائس آف امریکہ کے مطابق 'اسٹریٹ چلڈرن فٹبال ورلڈ کپ 2014' کیلئے، کراچی سے برازیل روانہ ہونے والے ایک چائلڈ کھلاڑی، سلمان نے گفتگو میں بتایا کہ 'ہم اس کھیل سے پاکستان کا مثبت روپ دنیا کو دکھائیں گے۔ دنیا کو بتائیں گے کہ پاکستان دہشتگرد ملک نہیں، بلکہ دوستی کرنے والا ملک ہے'۔
 

ان کا مزید کہنا تھا کہ 'پاکستان کو دنیا میں پیش کرنے اور دوستی کے تعلقات استوار کرنے کا عزم رکھتے ہیں'۔ سلمان کا تعلق کراچی کے علاقے کورنگی سے ہے اور کئی برس کراچی کی سڑکوں پر کھیلتے رہے ہیں۔

ایک اور پاکستانی اسٹریٹ چلڈرن فٹبال ٹیم میں شامل کراچی ہی سے تعلق رکھنے والے اویس نامی کھلاڑی نے کہا کہ 'ہم پرامید ہیں کہ پاکستان کیلئے 'ورلڈ کپ' جیت کر لائیں، ہمیں امید اور محنت پر یقین ہے کہ جیتیں اور دوسرے ممالک کی ٹیموں کو پیچھے چھوڑ سکیں'۔

نوجوان کھلاڑی اویس کا تعلق کراچی کے علاقے یوپی موڑ سے ہے جو بچپن میں ماں باپ کے ڈر سے گھر سے بھاگ کر کئی سالوں تک اسٹریٹ چلڈرن کی زندگی گزار چکے ہیں۔

اویس کا کہنا ہے اس نے کبھی عالمی کھیل کے بارے میں نہیں سوچا تھا۔

ان کا کہنا ہے کہ سڑکوں اور گلیوں پر رہتے رہتے گلی محلوں میں کھیلتے تھے۔ 'ہماری سوچ یہ تھی کہ ہم کچھ نہیں کرسکتے۔ مگر، ہمارے کوچ نے بتایا کہ ہم بہت کچھ کرسکتے ہیں'۔

اسٹریٹ چلڈرن کیلئے کام کرنے والی غیر سرکاری تنظیم کے سربراہ کے مطابق، 'ہماری پاکستانی اسٹریٹ چلڈرن فٹبال ٹیم بہت حوصلہ مند اور عالمی سطح پر کھیل کیلئے پرعزم ہے'۔