خود پر اعتماد کیوں نہیں؟

کیا آپ خود پر سے اعتماد کھو چکے ہیں؟ کیا آپ کو معاشرہ تسلیم نہیں کرتا؟ کیا آپ کو اپنی صلاحیتوں پر شک ہے؟ کیا آپ کو اپنی زندگی میں کسی قسم کی کمی محسوس ہوتی ؟ کیا آپ دوسروں سے ڈر ڈر کر زندگی گزار رہے ہیں؟ اگر ان تمام سوالات کا جواب ” ہاں “ ہے تو یقیناً آپ اس بے اعتمادی کی زندگی سے نجات حاصل کرنا چاہتے ہوںگے۔پُر وقار زندگی بسر کرنے کے لئے پُر اعتماد ہونا ضروری ہے ۔ ابھی دیر نہیں ہوئی صرف چند باتوں کی تصحیح کرنے سے آپ اپنی زندگی کو بدل سکتے ہیں۔ اپنی شخصیت کو بااعتماد بنائیے اور بہتر زندگی گزارئیے۔

دوسروں سے موازنہ کرنا :
انسان ہمیشہ اپنی شخصیت کو بہتر سے بہتر کرنے کی کوشش میں لگا رہتا ہے اور جب خود سے بہتر کسی کو دیکھ لیتا ہے تو موازنہ کرنے لگتا ہے ، خود کو بہتر بنانے کی کوشش میں خود اپنی ہی نظر میں اپنے آپ کو کمتر سمجھنے لگتا ہے۔ کبھی بھی اپنا موازنہ کسی دوسرے سے نہیں کرنا چاہئے کیونکہ وقت کب بدل جائے کیا معلوم کہ آپکی قسمت کیا لکھا ہے بھلا یا بُراکوئی نہیں جانتا ہو سکتا ہے کہ آپکو اس سے بہتر ملنے والا ہو ۔۔۔ دوسروں سے موازنہ صرف بے اعتماد افراد ہی کرتے ہیں کیونکہ اُنہیں خود پر بھروسہ نہیں ہوتا بہتر یہ ہوگا کہ آپ پہلے دوسروں سے اپنا موازنہ کرنا چھوڑیں اور اپنی شخصیت کو اور بہتر بنانے کی کوشش کریں۔

امید کے باوجود بھی ترقی کا نہ ملنا:
اکثر اوقعات آپ کو وہ مقام یا وہ درجہ نہیں ملتا جس کی آپ کو امید ہو، دفتر میں ترقی ، امتحان میں اعلیٰ درجہ، تو یہ سب آپ کی شخصیت کو ٹھیس پہنچاتا ہے اور آپ خود پر سے اپنا اعتماد کھو نے لگتے ہیں، آپ کا کام میں دل نہیں لگتا، وہ دلچسپی نہیں رہتی، آپ کو لگتا ہے کہ کہیں آپ کے ساتھ نا انصافی کی جا رہی ہے لیکن ہو سکتا ہے کہ آپ میں ہی کوئی کمی ہو، کوئی ایسی وجہ جسکی وجہ سے آپ ناکام ہوجاتے ہوں، شاید آپ مواقعوں کا بھر پور فائدہ نہ اُٹھا رہے ہوں، ایک نظر خود پر بھی ڈالئے کہ کہیں آپ غلط تو نہیں۔۔۔پھر شاید آپ کو اپنی غلطیوں کا اندازہ ہو جائے ، اپنی خامیوں کو ڈھونڈ کر ان کو دور کرنے کی کوشش کیجئے ۔ آپکی شخصیت بھی نکھرے گی اور خود پر اعتماد بھی بڑھے گا۔
 

بچپن میں ترجیح نہ ملنا:
بچپن میں اکثر ہمارے والدین ہمارے بھائی ، بہنوں کو ہم پر ترجیح دیتے ہیں ، ہمارے والدین کو اس بارے میں سوچنا چاہئے کہ اُنکے اس فعل سے اُن کے بچوں کی شخصیت پر کیا اثر پڑتا ہوگا، نا صرف بچپن میں بلکہ زندگی میں آگے جا کر بھی انکی شخصیت نہیں بن پاتی۔اگر آپ کے ساتھ ایسا ہوا ہے جس کی وجہ سے آپکی شخصیت پر منفی اثر ہوا ہے تو اب اُن باتوں سے آگے بڑھ کر سوچنے سے آپکی زندگی میں بدلاؤ لا سکتا ہے۔ اپنی قدرو قیمت کو پہچانیے ، معاشرے میں اپنا مقام بنائیں اُن کے ساتھ زیادہ سے زیادہ وقت گزارے جو آپ کو عزیز ہوں ، اپنی شخصیت کو مضبوط بنائیں اور ایک پُر اعتماد زندگی گزاریں۔

کسی کو نیچا دکھایا جانا:
اگر آپ کسی کو یا کوئی آپ کو نیچا دکھانے کی کوشش کرے تو یہ اس بات کا ثبوت ہے کہ وہ آپ کی وجہ سے خود سے کم تر محسوس کرتا ہے ، اُس کو آپ سے ڈر ہے، آپ کے نام اور شہرت سے جلن ہے ۔ آپ کسی کو نیچا دکھا کر کچھ حاصل نہیں کر سکتے سوائے بے اعتمادی کے ۔ اپنی زندگی کو مشکل نہ بنائیں کسی کو نیچا دکھانے سے پہلے اگر آپ اس بات کو جان کے کہ کوئی آپ کو بھی نیچا دیکھا سکتا ہے تو شاید آپ ضرور ایسا کرنا چھوڑ دیں گے۔
 

اپنی صلاحیتوں پر ر شک ہونا:
دفتر میں انتظامیہ کا بدلنا، کاروباری سرگرمیوں میں تبدیلیاں ہونا، پیشہ ورانہ اور نوکری کرنے والے افراد کےلئے کسی حد تک ضرور مشکلات لاتا ہے، اس میں آپ مجبور ہیں آپکو ہر حالت میں ان سب کا سامنا کرنا ہوتا ہے،ہو سکتا ہے کہ نئی انتطامیہ کو آپکی صلاحیتوں پر شک ہو یا ایسی صرف آپکی سوچ ہو، لیکن اگر اسکی بھی وجہ آپکے اعتماد میں کمی آرہی ہے تو چند اقدامات کے ذریعے آپ ان شکایات کو دور کر سکتے ہیں ، سب سے پہلے یہ بات ذہن نشین کر لیں کہ دفتر میں ایسا ہوتا رہتا ہے ، اگر آپ کو اپنی صلاحیتوں پر شک ہو تو آپ اپنی ٹیم یا ہیڈ سے اپنی کارکردگی کے بارے میں پوچھیں ، جو خامیاں ہوں ان کو دور کریں اور پُر اعتماد رہیں ۔

سماج میں توجہ یا اہمیت نہ ملنا:
سماج میں ، دفتر میں، دوستوں میں، اہل و عیال میں اگر آپ کو اہمیت نہیں دی جاتی تو اسکی وجہ ہو سکتا ہے کہ لوگ آپ کو پسند نہ کرتے ہوں ، یا آپکی باتوں میں اُنہیں کوئی مطلب نہیں ملتا ہو۔ اگر آپ لوگوں کی توجہ کا مرکز بننا چاہتے ہیں تو اس کے لئے عجیب و غریب حرکتیں کرنا یا زور زور سے چلنا ۔۔۔ ان سب کی ضرورت نہیں بلکہ کچھ وقت خاموشی میں اپنی شخصیت کا جائزہ لینے کی ضرورت ہے ۔ اپنے اخلاق کو بہتر بنائیں ، لوگوں سے نرمی سے پیش آئیں، اوروں کی بھلائی کے بارے میں سوچیں،لوگ آہستہ آہستہ آپکی جانب متوجہ ہونا شروع ہو جائیں گے اور آپکے دوست بن جائیں گے ، جہاں معاشرے میں عزت ملے گی وہیں خود اعتمادی بھی بڑے گی۔