سعودی عرب: دنیا کی بلند ترین زیر تعمیر عمارت، چند دلچسپ پہلو

دنیا کی بلند ترین عمارت کا ذکر سنتے ہی ذہن میں دبئی کے برج خلیفہ کا خیال آتا ہے، لیکن اب اس خیال کو دل و دماغ سے نکال دیجئے، کیونکہ سعودی عرب نے جدہ میں دنیا کی بلند ترین عمارت بنانے کی تیاری شروع کردی ہے۔

جس کے بعد دبئی دنیا کی بلند ترین عمارت کے اعزاز سے محروم ہوجائے گا- دنیا کی اس نئی بلند وبالا عمارت کے خدوخال دوسری عمارتوں سے مختلف ہوں گے-
 

بحیرہ احمر کے قریب تعمیر ہونے والے کنگ ڈم ٹاور کی بلندی ایک کلومیٹر ہوگی، جو کہ برج الخلیفہ سے پانچ سو چونسٹھ فٹ زیادہ ہے۔ دنیا کی بلند و بالا عمارت کی بنیاد دو سو فٹ گہری ہے، جس میں اسی ہزار ٹن اسٹیل استعمال کیا جائے گا۔ دو سو منزلہ عمارت کی تعمیر پر ایک ارب بيس کروڑ ڈالرز لاگت آئے گی۔

اس بلند و بالا عمارت کی تعمیر کی منصوبہ بندی 3 سال قبل کی گئی تھی- یہ پراجیکٹ کافی عرصے سے طوالت کا شکار ہوتا چلا آ رہا ہے تاہم اب اس پراجیکٹ پر زور و شور سے کام جاری ہے۔


کچھ عرصہ قبل وائس آف امریکہ نے اس بلند و بالا عمارت کے حوالے سے ایک رپورٹ شائع کی- اس رپورٹ میں عمارت سے جُڑے چند دلچسپ پہلوؤں پر روشنی ڈالی گئی- اس آرٹیکل میں ہم اس رپورٹ کے چند اقتسابات یہاں شائع کررہے ہیں-

آسمان سے باتیں کرتے کنگ ڈم ٹاور کی تعمیر اور اس کا دلفریب ڈیزائن بنانے کا ذمہ امریکی آرکیٹیکٹ ایڈری آن اسمتھ کو دیا گیا ہے۔ ان کا تعلق ریاست شکاگو سے ہے ۔ یہ وہی 67 سالہ انتہائی تجربہ کار اور ماہر آرکیٹیکٹ ہیں جنہوں نے دنیا کے اس وقت تک کے بلند ترین ٹاور" برج خلیفہ "کو ڈیزائن کیا تھا۔ شہزادہ ولید کی خواہش ہے" کنگ ڈم ٹاور" جیسی کوئی اور عمارت پورے مشرق وسطیٰ میں کوئی اورنہ ہو"

کنگ ڈم ٹاور میں برج خلیفہ سے 50 منزلیں زیادہ ہوں گی لہذا اس کی حیرت انگیز بلندی کا اندازہ لگانا کوئی مشکل نہیں۔

عمارت میں چار ہوٹل، مختلف اپارٹمنٹس، دفاتر اور اوپری منزلوں پر تین لابیز تعمیر ہوں گی ۔ اس کے ساتھ ساتھ 157ویں منزل پر ایک آبزوریشن ڈیسک بھی بنائی جائے گی جہاں سے سیاح شہر بھر کا نظارہ آسانی سے کرسکیں گے۔

ابھی تک دنیا میں کوئی بھی آبزرویشن ڈیسک اس قدر بلندی پر موجود نہیں۔ ڈیسک کی چوڑائی 80فٹ رکھی گئی ہے ۔ اس ڈیسک کو ڈیزائن کرتے وقت یہاں ایک ہیلی کاپٹر لینڈنگ پلیٹ فارم بھی تعمیر کرنے کا منصوبہ تھا لیکن چند ماہر پائلٹس نے رائے دی کہ اس جگہ لینڈنگ نہایت رسکی ہوسکتی ہے لہذا ڈیزائن کے آخری مرحلے میں ہیلی کاپٹر لینڈنگ پلیٹ فارم کا آئیڈیا ترک کردیا گیا۔