دنیا کا پہلا درجہ حرارت کنٹرول کرنے والا شہر

دبئی پہلے ہی اپنے دنیا کے بلند ترین ٹاور اور ریکارڈ یافتہ تعمیرات کی وجہ سے دنیا بھر میں مشہور ہے لیکن اب دبئی اس سے بھی بڑھ کر کچھ نیا اور انوکھا کرنے جارہا ہے-

جی ہاں مستقبلِ قریب میں دبئی میں ایک ایسا شہر تعمیر کیا جانے والا ہے جس میں درجہ حرارت کو کنٹرول کرنے کی صلاحیت موجود ہوگی- اور یہ اس انوکھے طرز کا دنیا کا پہلا شہر ہوگا-
 

درحقیقت یہ ایک بہت بڑا مال ہوگا جس میں درجہ حرارت کو کنٹرول کرنے والی سڑکیں٬ دنیا کا سب سے بڑا انڈور تھیم پارک٬ 100 ہوٹل اور اپارٹمنٹس موجود ہوں گے-

48 ملین اسکوائر فٹ پر پھیلے اس شہر میں دیگر جدید سہولیات کے علاوہ ہیلتھ ریزورٹ اور تھیٹر بھی موجود ہوں گے-

یہ پراجیکٹ سیاحوں کی ایک بڑی تعداد کو اپنی جانب متوجہ کرنے میں کامیاب رہے گا باوجود اس کے کہ موسم گرما میں دبئی کا درجہ حرارت 50 ڈگری سینٹی گریڈ تک جا پہنچتا ہے-

سیاحوں کے لیے اس پراجیکٹ میں کشش کی سب سے بڑی وجہ اس مال کا ٹمپریچر کنٹرول سسٹم ہی ہوگا-

مال میں واقع شاپنگ ایریا 8 ملین اسکوائر فٹ کے رقبے پر پھیلا ہے جو کہ مرکز میں موجود ہوگا- اور اس ایریے کا احاطہ شیشے کے بنے جدید گنبد کیے ہوئے ہوں گے-