دبئی میں حلال شراب متعارف٬ سونے کا پتہ بھی ساتھ

متحدہ عرب امارات کی ریاست دُبئی میں دنیا کی سب سے بلند عمارت موجود ہے، سیاحوں کا یہ ایک پسندیدہ مقام ہے، شاپنگ کے لیے بھی مشہور ہے، اب اِسی ریاست میں حلال وائن یا شراب بھی متعارف کروا دی گئی ہے۔
 

خلیجی دنیا میں دُبئی کو کئی قسم کی انفرادیت حاصل ہے۔ یہاں دنیا کی سب سے اونچی عمارت بُرج الخلیفہ موجود ہے۔ اسی ریاست میں ایک کاروباری مرکز ’مال آف ایمریٹس‘ ہے اور اِس میں مصنوعی انداز کا برفانی پہاڑ کھڑا کر کے اسکیینگ متعارف کروا دی گئی ہے۔ حکومت نے دُبئی پولیس کو دنیا کی مہنگی ترین گاڑیوں میں شمار ہونے والی کار لمبورگینی (Lamborghini) مہیا کر دی ہے اور اب الکوحل فری اسپارکلنگ شراب کو متعارف کروایا گیا ہے۔

ڈوئچے ویلے کی رپورٹ کے مطابق اس حلال اور الکوحل فری شراب کی قیمت 150 ڈالر رکھی گئی ہے۔ اِس شراب کو تقسیم کرنے والا ادارہ لُوتاہ پریمیئم فوڈز ہے، جو ناصر عبداللہ لُوتاہ گروپ کا حصہ ہے۔ شعبہ خوراک کے ہیڈ مینیجر ٹونی کولی کا کہنا ہے کہ دُبئی جو شاپنگ وسیاحت کا حسین امتزاج ہے، وہاں خوراک کے شعبے میں کی جانے والی یہ اختراع سمجھ میں آتی ہے۔ کولی کے مطابق الکوحل فری شراب کی بوتل خریدنا ایک پُرلُطف تجربہ بھی ہے کیونکہ اِس وائن کی خوبصورت بوتل کے اندر چوبیس قیراط کا سونے کا ایک پتہ بھی رکھا ہوا ہے اور ذائقے میں بھی شاندار ہے۔ یہ وائن سونے کے پتے کے بغیر بھی دستیاب ہے۔