دنیا کی چند بہترین اسپیشل فورسز٬ پاکستان بھی شامل

اسپیشل فورسز یا اسپیشل آپریشن فورسز ایسے ملٹری یونٹس ہوتے ہیں جو کہ انتہائی تربیت یافتہ ہوتے ہیں اور غیر روایتی اور غیر محفوظ مشن کے لیے اپنی خدمات سرانجام دیتے ہیں- ان فورسز کی یہ خدمات سیاسی٬ معاشی یا پھر فوجی مقاصد کے لیے ہوتی ہیں- دنیا کی بہترین اسپیشل فورسز کی درجہ بندی کرنا ایک انتہائی مشکل کام ہے- ہم یہاں دنیا کی چند سرفہرست بہترین اسپیشل فورسز کا ذکر کریں گے جو کہ اپنی بہترین منفرد صلاحیتوں کی وجہ سے دنیا بھر میں پہچانی جاتی ہیں-
 

SAS, United Kingdom
اسپیشل ائیر سروس نامی اس فورس کا شمار برطانیہ کی بہترین اسپیشل فورسز میں کیا جاتا ہے- یہ فورس 1941 میں دوسری جنگ عظیم کے دوران وجود میں آئی- اس اسپیشل فورس نے دنیا بھر اس وقت شہرت حاصل کی جب 1980 میں لندن میں ایرانی سفارت خانے پر حملہ ہوا اور اس فورس نے محاصرہ کر کے یرغمالیوں کی جانیں بچائیں-

Delta Force, United States
امریکہ کی اس اسپیشل فورس کو 1997 میں اس وقت سرکاری سطح پر منظور کیا گیا جب وہاں دہشت گردی کے بےشمار واقعات وقوع پذیر ہوئے- یہ امریکہ انتہائی خفیہ فورسز میں سے ایک بہترین فورس ہے- اس فورس کا بنیادی کام انسداد دہشت گردی اور براہ راست کاروائی کرنا ہے جبکہ یہ فورس کئی خفیہ مشن پر بھی کام کرتی ہے-

GSG 9, Germany
یہ فورس جرمنی کی فیڈرل پولیس کا انسداد دہشت گردی اور اسپیشل آپریشن کرنے والا یونٹ ہے- یہ فورس 1973 میں اس وقت وجود میں آئی جب جرمن پولیس میں بد انتظامی پائی گئی- یہ فورس بھتہ خوری٬ اغوا٬ دہشت گردی یا لوگوں کو یرغمال بنائے جانے والے واقعات میں اپنی خدمات سرانجام دیتی ہے-

JW GROM, Poland
پولینڈ کی یہ اسپیشل فورس سرکاری سطح پر 13 جولائی 1990 کو اس وقت فعال کی گئی جب وہاں دہشت گردی کے خطرات منڈلا رہے تھے- یہ فورس پولینڈ کی آرمی کے 5 اسپیشل فورسز کے یونٹ میں سے ایک ہے- اس فورس کو مختلف اقسام کے خطرات سے نمٹنے کے لیے تربیت دی گئی ہے- اس فورس میں دشمن کو پچھاڑنے کی بےپناہ صلاحیتیں موجود ہیں-

SSG, Pakistan
دنیا کی بہترین اسپیشل فورسز کی بات ہو اور پاکستان کا نام نہ ہو یہ ناممکن بات ہے- پاکستان کی ایس ایس جی نامی یہ اسپیشل آپریشن فورس پاکستان آرمی کا ہی ایک حصہ ہے- یہ فورس 1956 میں وجود میں آئی اور اسے “Black Storks” کے نام سے بھی جانا جاتا ہے- اس فورس کی بہادری کی وجہ سے اس کا شمار دنیا کی بہترین فورسز میں کیا جاتا ہے- اس فورس کی صلاحیتیں امریکہ اور برطانیہ کی اسپیشل فورسز سے بھی بڑھ کر ہیں- اس فورس کو اسپیشل آپریشنز٬ خصوصی تفتیش٬ داخلی دفاع اور دہشت گردی کے واقعات روک تھام کے لیے خصوصی تربیت حاصل ہے-

GIGN, France
یہ فورس فرانس کی مسلح افواج کا اسپیشل آپریشن یونٹ ہے- اس یونٹ کو انسداد دہشت گردی اور یرغمالیوں کی جانیں بچانے کے لیے خصوصی تربیت دی گئی ہے- اور یہ یونٹ اپنی خدمات نہ صرف فرانس بلکہ دنیا کے کسی بھی حصے میں سرانجام دے سکتا ہے- اس اسپیشل فورس کا قیام 1973 میں عمل میں آیا- یہ تربیت یافتہ اہلکاروں کی ایک مستقل فورس ہے جو مختلف قسم کے خطرات کا مقابلہ کرتی ہے-

EKO Cobra, Austria
یہ آسٹریا کا انسداد دہشت گردی کا اسپیشل آپریشن یونٹ ہے اور یہ فورس 1978 میں وجود میں آئی- دہشت گردی کے خلاف جنگ میں اس کا ایک اہم کردار ہے- اس اسپیشل فورس نے اب تک متعدد آپریشن میں کامیابیاں حاصل کی ہیں- یہ دنیا کے بہترین اسپیشل یونٹس میں سے ایک ہے-