شیر…قدرت ِالٰہی کا شاہکار٬ دلچسپ معلومات

شیر کا شمار دنیا کے خطرناک ترین جانوروں میں کیا جاتا ہے لیکن حقیقت یہ ہے کہ ایک تحقیق کے نتائج میں “شیر“ ہی کو سب سے پسندیدہ حیوان بھی قرار دیا گیا ہے- اس طاقتور جانور کی کچھ خصوصیات ایسی بھی ہیں جن سے لوگوں کی ایک بڑی اکثریت ناواقف ہے- شیر کی چند منفرد خصوصیات پر مبنی ایک رپورٹ دنیا میگزین نے شائع کی ہے جو کہ ہماری ویب کے قارئین کی خدمت میں بھی پیش ہے-
 

٭نر شیروں کی ایک خوبی حیران کن ہے۔جب شکار کے گرد کئی شیر جمع ہو جائیں، تو نر ایک طرف ہٹ کر مادائوں اور بچوں کو پہلے کھانے کاموقع دیتے ہیں۔جبکہ کئی خود غرض انسانوں کے مانند ببر شیر پہلے اپنی پیٹ پوجا کرتے، پھر بچوں اور شیرنیوں کو شکار تک آنے دیتے ہیں۔

٭شیر گھات لگا کر شکار پہ حملہ کرنا پسند کرتا ہے۔اسی لیے حملے سے قبل انجان انسان شیر کو دیکھ لے،تو عموماً وہ رفوچکر ہو جاتا ہے اوردھاوا نہیں بولتا۔ بھارت کے جن علاقوں میں شیر بستے ہیں،وہاں آج بھی رواج ہے کہ دیہاتی سر کے پیچھے انسانی چہرے کا ماسک پہنتے ہیں…تاکہ شیر عقب سے حملہ نہ کر سکے۔

٭شیر بلی کی طرح خرخرا نہیں سکتا۔سو سکون یا خوشی ظاہر کرنے کے لیے وہ آنکھیں بند کر لیتا ہے۔ چونکہ آنکھیں بند کر لینے کا مطلب خود کو حالات کے رحم وکرم پہ چھوڑنا ہے،یوں شیر دکھاتا ہے کہ اسے آپ سے کوئی خطرہ نہیں اور وہ محفوظ و شانت ہے۔