طیب اردگان مسلم حکمرانوں کے لیے بہترین نمونہ

1996 سے قبل ترکی ہر طرح کی برائی میں لتھڑا ہوا تھا اور وہاں فحاشی٬ عریانی٬ چوری ڈکیتی٬ لوٹ مار٬ فراڈ اور منشیات عام تھی- اور یہی صورتحال ترکی کے شہر  استنبول کی بھی تھی جہاں کلبوں میں شراب اور رقص عروج پر تھے- اس کے علاوہ استنبول میں انسانی اسمگلنگ بھی بڑے پیمانے پر جاری تھی جبکہ شہر میں ہر قسم کا نشہ کھلے عام دستیاب تھا- صرف یہی نہیں بلکہ شہر کی تعمیری حالت بھی انتہائی خراب تھی٬ ہر طرف کچرے کے ڈھیر موجود ہوتے تھے اور سڑکیں گندگی سے بھری ہوتی تھی- غرض کہ شاید ہی کوئی ایسی برائی باقی رہ گئی جو ترکی یا استنبول سے اپنا رشتہ نہ جوڑ پائی ہو- لیکن پھر جون 1996 میں جب نجم الدین اربکان کے ترکی وزیراعظم نامزد ہوئے تو دنیا نے دیکھا کہ ترکی کا اسلامی تشخص ایک مرتبہ پھر بحال ہونا شروع ہوگیا- مساجد کھول دی گئیں٬ مدارس میں دینی تعلیم کی شروعات ہوئی٬ حجاب پر سے پابندی اٹھا لی گئی- نجم الدین اربکان نے استنبول میں اسلامی تشخص کی بحالی کے لیے اسے اپنے کارکن رجب طیب اردگان کے حوالے کردیا جو اس وقت وہاں کے مئیر تھے-
 

طیب اردگان اس وقت ترکی کے موجودہ صدر ہیں اور تین مرتبہ ترکی کے وزیراعظم بھی رہ چکے ہیں- طیب اردگان 26 فروری 1954 کو پیدا ہوئے اور ان کا بچپن غربت میں گزرا جبکہ یہ اپنے تعلیمی اخراجات کو پورا کرنے کے لیے استنبول میں ٹافیاں فروخت کیا کرتے تھے-

طیب اردگان 1994 سے لے کر 1998 تک استنبول کے مئیر رہے اور انہیں اپنے اس دور میں اپنے وزیراعظم نجم الدین اربکان کی بھرپور حمایت اور مدد حاصل رہی- اپنے چار سالہ دور میں انہوں نے شہر کو ہر طرح کی برائی سے پاک کر دیا- طیب اردگان نے تمام شراب خانوں کو بند کروادیا٬ ہر قسم کی مافیا کا خاتمہ کیا٬ عصمت فروشی اور جوئے کے اڈے بند کردیے گئے٬ منشیات فروشوں کے خلاف کاروائی کی گئی٬ بلا تفریق مجرموں کو پکڑ کر جیل کی سلاخوں کے پیچھے دھکیل دیا گیا اور انہیں سزائیں دلوائی گئیں-

معاشرتی برائیوں کے خاتمے کے بعد طیب اردگان نے استنبول شہر کو ایک مثالی خوبصورتی دینے کا تہیہ کیا- ابتدائی طور پر استنبول کو ماحولیاتی آلودگی سے پاک کیا گیا٬ ٹریفک کے نظام میں بہتری لائی گئی٬ سڑکوں اور گلیوں کو پکا کروایا گیا اور ساتھ ہی سیوریج کے نظام کو بھی بحال کیا گیا- پانی و بجلی کے نظام کے ساتھ ہوٹلوں کو بھی بہتر بنایا گیا- اس کے ساتھ ساتھ نںی صنعتیں بھی قائم کی جاتی رہیں جس سے معیشت میں بھی بہتری آئی- طیب اردگان کی یہ کاوشیں استنبول میں سیاحت کو فروغ دینے کا باعث بنی-