ورلڈ کپ 2015: پاک بھارت میچ اور چند دلچسپ حقائق

اب سے چند گھنٹوں بعد ورلڈ کپ 2015 کے اس میچ کا آغاز ہونے جارہا ہے جس کا کرکٹ کے شائقین کو گزشتہ کئی ماہ سے انتظار ہے- جی ہاں ہم بات کر رہے ہیں پاک بھارت میچ کی جسے ہائی وولٹیج میچ کہا جائے تو غلط نہ ہوگا- ان دو ممالک کے کھلاڑیوں کے درمیان ہونے والے میچ پر صرف ان دو ممالک کے عوام ہی کی نظریں نہیں ہوتیں بلکہ پوری دنیا میں موجود کرکٹ کے شائقین اس میچ میں لچسپی لیتے ہیں- متعدد شائقین اسے ورلڈ کپ ٹورنامنٹ کا “ فائنل “ تک قرار دے دیتے ہیں- ہم یہاں پاک بھارت کے درمیان ہونے والے ورلڈ کپ میچوں سے متعلق چند ایسے دلچسپ حقائق بیان کرنے جارہے ہیں جن میں سے کچھ تاریخ کا حصہ ہیں جبکہ چند حقائق کا تعلق کل ہونے والے میچ سے ہے-

یہ انڈیا پاکستان کے درمیان ہونے والا پہلا ایسا ورلڈ کپ میچ ہوگا جس میں سچن ٹنڈولکر موجود نہیں کیونکہ وہ سال 2013 میں ہی انٹرنیشنل کرکٹ سے ریٹائرمنٹ لے چکے ہیں- اس سے قبل وہ گزشتہ 5 ورلڈکپ میں کھیل چکے ہیں-

اس وقت انڈیا کے پاس ورلڈ کپ کے میچوں میں پاکستان کا سامنا کرنے والے صرف 3 تجربہ کار کھلاڑی موجود ہیں جو کہ مہندرا سنگھ دھونی٬ ویرات کوہلی اور سریش رائنا ہیں- موہالی میں ہونے والے سال 2011 ورلڈ کپ کے سیمی فائنل میں یہ تینوں کھلاڑی شامل تھے-

دوسری جانب ورلڈ کپ 2015 کے پاک بھارت میچ میں پاکستان کے پاس ورلڈ کپ ٹورنامنٹ کے میچوں میں بھارت کا سامنا کرنے والے 5 تجربہ کار کھلاڑی موجود ہوں گے جن میں مصباح الحق (ورلڈ کپ 2011) ٬ شاہد آفریدی ( ورلڈ کپ 99 2003٬ 2011٬ )٬ یونس خان (ورلڈ کپ 2003 اور 2011)٬ عمر اکمل (ورلڈ کپ 2011) اور وہاب ریاض ( ورلڈ کپ 2011) شامل ہیں- شاہد آفریدی سب سے زیادہ تجربہ کار کھلاڑی ہیں اور اپنا چوتھا ورلڈ کپ کھیلنے جارہے ہیں-

ایک دلچسپ حقیقت یہ بھی ہے کہ ورلڈ کپ میچوں میں پاکستان بھارت کو کبھی شکست نہیں دے سکا لیکن ہم پھر بھی دعاگو ہیں اور امید کرتے ہیں کہ اس بار تاریخ بدل جائے گی اور فتح پاکستان کی ہوگی-

حیرت انگیز طور پر کوئی بھی بھارتی کھلاڑی آج تک ورلڈ کپ میچوں میں پاکستان کے خلاف سینچری اسکور نہیں کرسکا- سب سے بلند ترین اسکور بھی سچن ٹنڈولکر کا تھا جو 98 رنز تھے اور وہ انہوں نے 2003 کے ورلڈ کپ میں بنائے تھے-

ورلڈ کپ میچوں میں پاکستان کی جانب سے بھارت کے خلاف واحد سنچری سعید انور نے بنائی ہے- انہوں نے یہ سینچری 2003 کے ورلڈ کپ میں اسکور کی جو کہ 101 رنز تھے-

ورلڈ کپ کے میچوں میں پہلی بار پاک بھارت کا سامنا 1992 کے ورلڈ کپ میں ہوا اور یہ میچ سڈنی کرکٹ گراؤںڈ میں کھیلا گیا٬ دوسری بار 1996 کے ورلڈ کپ میں بنگلور کے اسٹیڈیم میں٬ تیسری مرتبہ 99 کے ورلڈ کپ میں مانچسٹر کے میدان میں٬ چوتھی مرتبہ 2003 میں سنچورین کے گراؤنڈ میں جبکہ پانچویں بار 2011 کے ورلڈ کپ میں موہالی کے گراؤنڈ میں سامنا ہوا تھا-

گزشتہ سال جب کل اتوار کے روز ہونے والے اس پاک بھارت میچ کے ٹکٹ کی فروخت کا اعلان کیا گیا تو صرف 20 منٹ میں تمام ٹکٹ فروخت ہوگئے- امید ظاہر کی جارہی ہے کہ اس میچ کے ناظرین کی تعداد پچھلے تمام ریکارڈ توڑ دے گی-

پاک بھارت ورلڈ کپ میچوں میں سب سے زیادہ رنز سچن ٹنڈولکر نے اسکور کیے- انہوں نے 5 اننگ میں 313 رنز بنائے- اس اسکور میں 3 نصف سینچریاں بھی شامل ہیں-

پاکستان کے وہاب ریاض اور بھارت کے Venkatesh Prasad کو ورلڈ کپ میچوں میں ایک دوسرے کے خلاف سب سے زیادہ وکٹیں لینے کا اعزاز حاصل ہے- Venkatesh Prasad نے ایک میچ کے دوران پاکستان کی 5 وکٹیں اپنے نام کیں تو پاکستان کی جانب سے وہاب ریاض بھی بھارت کی 5 وکٹیں اپنے نام کر چکے ہیں-

< Previous دنیا کے بہترین کپتان NEXT > ورلڈ کپ 2015: کون کتنا تجربہ کار؟