ورلڈ کپ 2015: کون کتنا تجربہ کار؟

ورلڈ کپ ٹورنامنٹ 2015 کا آغاز ہوچکا ہے اور اس میگا ایونٹ میں شرکت کرنے والی ٹیموں کا اپنی کامیابی کے لیے سب سے زیادہ انحصار ایسے کھلاڑیوں پر ہوگا جو ورلڈ کپ ٹورنامنٹ کھیلنے کا وسیع تجربہ رکھتے ہیں اور بہترین کارکردگی کا مظاہرہ کرسکتے ہیں- ورلڈ کپ ٹورنامنٹ میں شریک یہ تجربہ کار کھلاڑی اپنی ٹیم میں موجود دوسرے نوجوان کرکٹرز کے اندر جوش اور انہیں آگے بڑھنے میں مدد بھی فراہم کرسکتے ہیں- لیکن اس میگا ایونٹ میں شریک تجربہ کھلاڑی کونسے ہیں اور وہ اب تک کتنے ورلڈ کپ میں شرکت کرچکے ہیں؟ آئیے جانتے ہیں-
 

کمار سنگا کارا
سری لنکن کھلاڑی کمار سنگارا کا یہ چوتھا ورلڈ کپ اور یہ گزشتہ تینوں ورلڈ کپ میں حصہ لے چکے ہیں- سنگاکارا کے کھیلے جانے تینوں ورلڈ کپ ٹورنامنٹ کے میچوں کی مجموعی تعداد 30 ہے- 2011 کے ورلڈ کپ میں سنگا کارا نے نیوزی لینڈ کے خلاف بہترین کارکردگی کا مظاہرہ کرتے ہوئے 111 رنز سکور کیے-

ڈینیئل ویٹوری
نیوزی لینڈ کرکٹ ٹیم کے لیفٹ آرم اسپنر ڈینیل ویٹوری کا یہ پانچواں ورلڈکپ ہے لیکن ان کے میچز کی تعداد صرف 23 ہے۔ ڈینیل ویٹوری نے اپنے کیریر کا آغاز 1997 میں کیا اور بالترتیب 1999، 2003، 2007 اور 2011 کے ورلڈ کپ ٹورنامنٹ میں شرکت کرچکے ہیں-

تلکارتنے دلشان
سری لنکا کے تلکارتنے دلشان کا یہ تیسرا ورلڈ کپ ہے اور اپنے گزشتہ دو ورلڈ کپ میں بیس میچز کا حصہ بن چکے ہیں- 2011 کے ورلڈ کپ انہوں نے بہترین کارکردگی کا مظاہرہ کرتے ہوئے 500 سے زائد رنز اسکور کیے-

شاہد آفریدی
پاکستان کے جارحانہ بلے باز شاہد آفریدی کا یہ پانچواں کرکٹ ورلڈ کپ ہے اور وہ دوسرے سب سے زیادہ ورلڈ کپ کھیلنے والے پاکستانی کھلاڑی ہیں- اس سے قبل جاوید میانداد نے 6 ورلڈ کپ ٹورنامنٹ کھیل رکھے ہیں- شاہد آفریری ایک بہترین باؤلر بھی ہیں اور انہوں نے 2011 کے ورلڈ کپ میں کینیا کے خلاف صرف 16 رنز کے عوض 5 وکٹیں حاصل کیں۔

مہیلا جے وردنے
سری لنکا کی کرکٹ ٹیم کے کھلاڑی مہیلا جے وردنے کرکٹ ورلڈ کپ 2015 کھیلنے والے ایسے تجربہ کار کھلاڑی ہیں جو اس سے قبل 4 ورلڈ کپ ٹورنامنٹ میں شرکت کر چکے ہیں اور یہ ان کا پانچواں ورلڈ کپ ہے-مہیلا جے وردنے نے اپنے کیریر کا آغاز 1997 میں کیا اور مجموعی طور پر ورلڈ کپ ٹورنامنٹ کے 33 میچوں میں حصہ لے چکے ہیں-

جیمز اینڈرسن
انگلینڈ کی کرکٹ ٹیم کے کھلاڑی جیمز اینڈرسن اپنا چوتھا ورلڈ کپ کھیل رہے ہیں- ورلڈ کپ کے 19 میجوں کے دوران وہ اب تک 22 وکٹیں اپنے نام کر چکے ہیں-

برینڈن میککلم
نیوزی لینڈ کے کپتان برینڈن میککلم چوتھی بار کرکٹ ورلڈ کپ میں شرکت کررہے ہیں اور وہ اس سے قبل کھیلے جانے والے ورلڈ کپ ٹورنامنٹ کے مجموعی طور پر 25 میچز کھیل چکے ہیں- ورلڈ کپ کی تیز ترین نصف سنچری بنانے کا ریکارڈ بھی میککلم کے پاس ہی ہے- یہ نصف سینچری 2007 میں کینیڈا کے خلاف صرف 20 گیندوں پر بنائی گئی۔