بھارت کی ’بیمار‘ فضائیہ کو تباہی کا خطرہ

بھارت اگر مغرب سے نئے جنگی طیارے نہیں خریدتا یا پھر مقامی دفاعی ٹھیکیدار اسے وقت پر ویسے ہی طیارے فراہم نہیں کرتے جیسے کہ فضائیہ چاہتی ہے تو بھارت کی پاکستان یا چین کا مقابلہ کرنے کی صلاحیت واضح طور پر کم ہو جائے گی۔

نیوز ایجنسی روئٹرز کے ایک جائزے کے مطابق بھارت نے سن دو ہزار بارہ میں فرانس سے 126 رافیل فائٹر طیارے خریدنے کا معاہدہ کیا تھا۔ یہ ڈیل اس تنازعے کی وجہ سے رکی ہوئی ہے کہ بھارت ان جہازوں کی اسمبلنگ اپنے ملک میں چاہتا ہے۔ بھارت کا مقامی سطح پر تیار کردہ ہلکا جنگی طیارہ ’تیجس‘ آئندہ ماہ فضائیہ کے حوالے کیا جائے گا۔ بھارت نے اس جنگی طیارے کی تیاری تیس برس پہلے شروع کی تھی۔ ایئر فورس کے سینیئر افسران کو نجی محفلوں میں یہ کہتے ہوئے سنا جا سکتا ہے کہ یہ طیارہ متاثر کن نہیں ہے۔ ایک سابق فائٹر پائلٹ کا کہنا تھا، ’’یہ طیارہ اتنی دیر سے تیار کیا گیا ہے کہ ٹیکنالوجی متروک ہونے کے قریب ہے۔‘‘
 

ڈوئچے ویلے نے جنگی طیاروں کے حوالے سے اپنی اس شائع کردہ رپورٹ میں لکھا ہے کہ بھارت آج کل اپنی بحریہ کو جدید تر بنانے کے عمل سے گزر رہا ہے لیکن ماہرین کی نظر میں بھارت کی فضائیہ کمزور ہو چکی ہے۔ اس کی وجہ یہ ہے کہ فضائیہ کا انحصار روسی ساختہ ایس یو تھرٹیز، مگ اور فرانسیسی میراج لڑاکا طیاروں پر ہے۔ ان میں سے نصف سے زائد طیارے رواں سال سے لے کر سن دو ہزار چوبیس تک ناکارہ ہو جائیں گے۔

گزشتہ برس بھارتی ایئر فورس کے ریٹائرڈ افسر اے کے سچدیو نے انڈین ڈیفنس ریویو جریدے میں لکھا تھا، ’’بھارت کی یہ کمزوری ہمسایہ ملکوں کے ہاتھوں ہماری ذلت کا باعث بن سکتی ہے۔‘‘ ان کا کہنا تھا کہ روایتی حریف پاکستان اور چین کا مربوط حملہ بھارتی فوج کو نقصان پہنچا سکتا ہے۔ نئی دہلی میں دفاعی حکمت عملی تیار کرنے والے پاکستان اور چین کے ممکنہ مشترکہ حملے کے مقابلے میں منصوبہ بندی پر زور دے رہے ہیں جبکہ ماہرین کے مطابق ایسے کسی حملے کے امکانات انتہائی کم ہیں۔

متعدد حادثے
سن دو ہزار بارہ میں بھارتی وزارت دفاع کا کہنا تھا کہ گزشتہ دہائیوں میں بھارت کے نصف سے زائد مگ طیارے گر کر تباہ ہو چکے ہیں۔ دوسری طرف چین مقامی سطح پر تیارہ کردہ جی ٹین فائٹرز کی چوتھی نسل استعمال کر رہا ہے جبکہ پانچویں نسل کے سٹیلتھ فائٹر جیٹ طیاروں کی آزمائشی پروازیں جاری ہیں۔ پاکستان اپنے لاک ہیڈ مارٹن F-16 کو اَپ گریڈ کر رہا ہے جبکہ چین کے تعاون سے تیار کردہ JF-17 لڑاکا طیارے بھی استعمال کر رہا ہے۔