کولمبیا: سب کچھ بھول جانے والوں کا گاؤں

اگر کسی کو یہ تو معلوم ہو کہ اس کے ہاتھ میں جو شے ہے اسے ’’قلم‘‘ کہتے ہیں لیکن وہ یہ بھول جائے کہ اس سے لکھا جاتا ہے تو اس کی کیا کیفیت ہوگی۔ یادداشت کی کم زوری اور پھر رفتہ رفتہ دماغ کو گُھن کی طرح کھا جانے والی بیماری الزائمر کے شکار افراد کو ایسی ہی اذیت ناک صورت حال سے گزرنا پڑتا ہے۔ الزائمر ایک دماغی مرض ہے۔ ابھی تک اس مرض کا علاج دریافت نہیں ہو سکا۔ یہ انسان کو آہستہ آہستہ موت کے منہ کی طرف دھکیل دیتا ہے۔ یہ مرض سب سے پہلے جرمن ماہر نفسیات اور عصبی ماہر امراضیات الوئیس الزائمر (Alois Alzheimer) نے 1906ء میں دریافت کیا اور اسی مناسبت سے اس مرض کا نام الزائمر مشہور ہو گیا۔اکثر اوقات، الزائمر 65 برس سے زائد عمر کے افراد پر حملہ آور ہوتی ہے۔ اگرچہ یہ بیماری اس عمر سے پہلے بھی ہو سکتی ہے۔ 2006 میں اس مرض میں 26.6 ملین افراد مبتلا تھے۔ ایک جائزے کے مطابق پوری دنیا میں 2050 تک ہر آٹھ افراد میں سے ایک فرد اس مرض میں مبتلا ہو سکتا ہے۔ یہ مردوں کے مقابلے میں خواتین میں زیادہ عام ہے۔
 

جنوبی امریکا کے ملک کولمبیا کے شمال مغرب میں ایک خوب صورت وادی انٹیوکیوا ہے۔ جنت ارضی کا منظر پیش کرنے والی اس وادی میں ایسے افراد کی غیر معمولی تعداد بستی ہے جو الزائمر کے مرض کا شکار ہیں اور ان میں ساٹھ سال سے کم افراد کی بڑی تعداد شامل ہے۔ انٹیوکیوا میں رہنے والوں کی اکثریت الزائمر کی مختلف اسٹیجز کا شکار ہیں جن میں ابتدائی علامات سے مکمل ڈیمنشیا شامل ہے۔

الزائمر کے اسباب کے بارے میں ایک بات پر سبھی ماہرین متفق ہیں کہ یہ زہریلے پروٹینز کی وجہ سے ہوتے ہیں جو رفتہ رفتہ دماغی خلیے کو تباہ کردیتے ہیں جس کے نتیجے میں یادداشت زائل ہونے لگتی ہے اور آخر کار مریض کی موت واقع ہوجاتی ہے۔ بعض افراد میں اس مرض کی علامات چالیس برس کی عمر سے بھی قبل ظاہر ہونے لگتی ہیں۔ اس کی ابتدا چھوٹی موٹی باتیں بھولنے سے ہوتی ہے اور رفتہ رفتہ یہ بیماری تخیل کی صلاحیت ہی ختم کردیتی ہے۔

دنیا میگزین اپنی شائع کردہ اس رپورٹ میں لکھتا ہے کہ انٹیوکیوا میں بسنے والے الزائمر کے شکار افراد میں زیادہ تر اس بیماری کے شدت 35 سے چالیس برس کے درمیان ہی ظاہر ہونے لگتی ہے۔ اس کی صرف ایک ہی وجہ بیان کی جاتی ہے ’’جین‘‘۔ گذشتہ تین سو سال سے اس علاقے میں رہنے والے اپنے خاندان اور علاقوں سے باہر شادیاں نہیں کرتے۔ اس کی وجہ سے متاثرہ جین دوسرے متاثرہ جین سے مل کر اس بیماری کے امکانات کو بڑھاتے رہے۔ مختلف رشتے ناتوں سے ایک ہی خاندان کے افراد شمار ہونے والے ایسے افراد کی تعداد 5ہزار تک جا پہنچی ہے۔ اسی وجہ سے انٹیوکیوا دنیا میں الزائمر سے متاثرہ افراد کی سب سے بڑی بستی بن چکا ہے۔