کیا آپ ’’ہیموفیلیا ‘‘ کے بارے میں کچھ جانتے ہیں؟

خون کیا چیز ہے اور انسان کے جسم میں اس کی کیا اہمیت ہے یہ تو تقریباً سب ہی جانتے ہیں اور جو لوگ نہیں جانتے انہیں اس کی قدروقیمت کا اندازہ اس وقت ہوتا ہے جب صرف اور صرف خون کی کمی کی وجہ سے ان کی اپنی یا پھر ان کے کسی عزیز کی جان خطرے میں ہو اور ایمرجنسی کی صورت میں فوراً اسکا بندوبست کرنا پڑ ے۔ خون کی قدرو قیمت صرف اس بنا ء پر اور بھی بڑھ جاتی ہے کہ خون اصل میں وہی ہوتا ہے جو قدرتی طور پر انسان کے جسم میں بن چکا ہوتا ہے کیونکہ خون کو مصنوعی طریقے سے نہیں بنایا جا سکتا ہے اور نہ ہی کوئی اور مادہ اس کا متبادل ہوتا ہے۔
 

آج کے سائنسی دور میں بہت سے مصنوعی اعضاء جیسے نقلی ٹانگیں ، ہاتھ پاؤں ،دل،گردے،مصنوعی بالوں کے علاوہ اگر کھانے پینے کی اشیاء پر نظر ڈالیں تو پاؤڈر والا دودھ اور بہت سے مصنوعی فلیور وغیرہ ایجاد کر لئے گئے ہیں جن کا استعمال بڑی کامیابی سے جاری بھی ہے لیکن انسان مصنوعی طور پر ایسا خون بنانے سے ابھی تک قاصر ہے جو انسانی جسم کے لئے کارآمد ثابت ہو۔ اس سے یہ بھی پتہ چلتا ہے کہ خون اپنی کیا حیثیت رکھتا ہے۔ اور پھر جب یہ ہی قیمتی خون زرا سی چوٹ وغیرہ لگنے سے یونہی بہنا شروع ہو جائے اور پھر کافی دیر تک بہتا ہی رہے بلکہ ضائع ہوتا رہے تو یہ کتنا تشویشناک امر ہے۔

معمولی سی چوٹ لگنے پر بھی خون کا زیادہ عرصے تک ضیاع ہونا اور قدرتی طور پر بہنے سے نہ رکنا ہی دراصل ’ ہیموفیلیا ‘ کا مرض کہلاتا ہے۔پاکستان میں تو زیادہ تر لوگ اس بیماری کے نام سے بھی واقف نہیں ہیں۔

ہیموفیلیا کا عالمی دن ہر سال 17 اپریل کو پاکستان سمیت پوری دنیا میں منایا جاتا ہے۔جس کا مقصد لوگوں میں اس ہیموفیلیا جیسی بیماری کے بارے آگاہی پیدا کرنا اور اس مرض کے علاج کے لئے آسانیاں اور سہولیات میں اضافہ کرنا شامل ہوتا ہے تاکہ اس مرض کے شکار افراد کی زندگیوں کو بہتر اور محفوظ بنایا جاسکے۔ ایک مشہور عالمی تنظیم (WFH)ورلڈ فیڈریشن آف ہیموفیلیا اس مقصد کو پورا کرنے میں اپنا ایک اہم کردار ادا کر رہی ہے۔

ہیموفیلیا ایک امراضِ طاریہ ہے یعنی یہ ایک خاندانی یا موروثی بیماری ہے جو والدین سے بچوں میں منتقل ہوتی ہے اور یہ کزن میرج کی وجہ سے زیادہ پھیلتی ہے اور اس کی علامات میں جسم پر نشان پڑنا، زخم آنے کی صورت میں خون کا نہ رکنا اور جوڑ کا سوجھ جانا شامل ہیں۔ اس بیماری کے مریض کو اگر جسم کے کسی حصے پر چوٹ لگ جائے اور پھر اس سے خون نکلنے لگے تو وہ خون رکتا نہیں بلکہ کافی دیر تک بہتا ہی رہتا ہے۔ ایک عام مشاہدہ ہے کہ بعض اوقات کہ کوئی چیز کاٹتے ہوئے انگلی پر چھری سے کٹ لگ جائے تو خون ایک خاص وقت تک بہتا ہے اور پھر اس پر ایک جِھلی سی بن جاتی ہے جسے انگریزی میں (کلوٹ) کہتے ہیں اور اس کلوٹ کی بدولت ہی خون قدرتی طور پر خود بخود ہی رک جاتا ہے یا پھر جم جاتا ہے لیکن ہیموفیلیا کے مریضوں کے ساتھ ایسا عمل بالکل بھی نہیں ہوتا کیونکہ ان کے خون میں (کلوٹ) بنانے کی صلاحیت نہیں ہوتی اور یہ کلوٹنگ ہی تو جسم کا خون ضائع ہونے سے بچاتی ہے۔ چونکہ خون پلازمہ(پروٹین ) ،سرخ خلیات ،سفید خلیات اور پلیٹلیٹس پر مشتمل ہوتا ہے اورکلوٹنگ بنانے میں سب سے اہم کردار پروٹین ادا کرتے ہیں لہذا خون میں موجود یہ پروٹین ،پلیٹلیٹس کے ساتھ مل کر کلوٹنگ کرنے میں مدد دیتے ہیں۔

اس بیماری میں خون جمانے والے ذرات کی کمی ہوتی ہے اور یہ بیماری ہونے کی سب سے اہم وجہ جین میں ہونے والی خرابی ہے جو کہ X کروموسوم میں ہوتی ہے اور اگر کلوٹنگ کرنے والے جین کو نقصان پہنچ جائے تو ہیموفیلیا جیسی خطرناک بیماری جنم لیتی ہے۔ ہیموفیلیا کے شکار زیادہ تر مرد حضرات ہی ہوتے ہیں یعنی یہ بیماری زیادہ تر مردوں میں ہی پائی جاتی ہے۔ ہیموفیلیا کی دو اقسام ہوتی ہیں۔ایک ہیموفیلیا A جبکہ دوسری ہیموفیلیا B۔لوگ زیادہ تر ہیموفیلیا Aہی کا شکار ہوتے ہیں جبکہ ہیموفیلیا Bکے مریض کی تعداد بہت ہی کم ہے ۔ یوں کہہ لیں کہ ہیموفیلیا کے مریضوں میں 80%ہیموفیلیا A اور 20% ہیموفیلیا B کا شکار ہوتے ہیں۔