بلوچستان ریکوڈک: سونا اگلتی کانیں٬ اب کس کا انتظار؟

بلوچستان کے ضلع چاغی میں ریکوڈک ایک چھوٹے سے قصبے کا نام ہے۔ تاریخی اعتبار سے ریکوڈک ایک قدیم اّتش فشاں کا نام تھا۔ مقامی زبان میں ریکوڈک ایک صحرائی چوٹی کو بھی کہا جاتا ہے۔ ایک تخمینے کے مطابق ریکوڈک میں سونے اور تانبے کے ذخائر کی مالیت 260 بلین ڈالر سے زائد ہے۔

بلوچستان کے سنگلاخ اور بنجر پہاڑوں کو اللہ تعالیٰ نے معدنی دولت سے مالا مال کر رکھا ہے۔ لیکن بدقسمتی سے پاکستان میں سیاسی استحکام کی کمی، طالع آزما حکمرانوں کی آمدو رفت اور قومی مفاد کی جگہ ذاتی مفاد کو ترجیح دینے کے عمل نے بلوچستان کی معدنی دولت سے نہ تو قومی اور نہ ہی صوبائی سطح پر فائدہ اٹھانے کا موقع دیا ہے۔
 

ریکوڈک سے سونا اور تانبے کے ذحائر دریافت کرنے کے لیے حکومتِ پاکستان اور چلی اور کینیڈا کی مشترکہ کمپنی ٹیتھن کاپر کمپنی (ٹی سی سی) کے ایک معاہدہ طے پایا تھا- اس معاہدے کے تحت چلی اور کینیڈا میں سے ہر ایک کا حصہ 37.5 فیصد تھا اور پاکستان جس سرزمین سے یہ ذخائر نکالے جارہے تھے اس کا حصہ صرف 25 فیصد تھا جو کہ پاکستانیوں کے ساتھ ایک کھلی ناانصافی تھی- تاہم بلوچستان میں ریکوڈک کی ان سونے اور تانبوں کی کانوں کی کوڑیوں کے دام فروخت اور ان میں کرپشن کے متعلق خبریں شائع ہونے کے بعد یہ معاملہ عدالت تک جاپہنچا اور اس طرح یہ منصوبہ طویل تاخیر کا شکار ہوگیا-

حال ہی میں ریکوڈک کیس میں بلوچستان کی صوبائی حکومت کو ریکوڈک منصوبے کے حوالے سے کسی بھی ملکی یا غیر ملکی کمپنی کو ٹینڈر دینے کا حق حاصل ہوگیا ہے۔ بلوچستان حکومت کے وکیل احمر بلال کے مطابق ٹی سی سی کمپنی نے بلوچستان حکومت کے خلاف درخواست واپس لے لی ہے، جس کے بعد ریکوڈک منصوبے کے حوالے سے کوئی تنازع باقی نہیں رہا-

تاخیر اور تنازعہ کے کئی برسوں بعد، بلوچستان کی صوبائی حکومت ریکوڈک میں کان کنی کا دوبارہ آغاز کرنے کے لیے اب کسی شراکت دار کی تلاش میں ہے-