’سعودی بیمار بچی‘ کی کہانی نقلی نکلی

اس بچی کی کہانی پر لوگ ہمدردی کے اظہار کے ساتھ ساتھ مالی امداد بھی کرتے رہے جب تک انھیں یہ معلوم نہیں تھا کہ یہ نقلی ہے۔

خون کے خلیوں کے سرطان میں مبتلا ایک سعودی لڑکی کے ٹویٹر اکاؤنٹ نے ہزاروں دلوں کو چھو لیا۔ اس اکاؤنٹ پر موجود تصاویر میں ایک نوجوان لڑکی سرطان کی مریضہ ہیں جن کا نام سارہ ابراہیم ہے اور وہ اپنے علاج کے دوران مسکرا رہی ہیں۔
 

اس ٹویٹر اکاؤنٹ کا آغاز گزشتہ فروری میں ہوا تھا اور اسے 75 ہزار سے زائد لوگوں نے فالو کیا۔ ہزاروں لوگوں نے ہیش ٹیگ’فرینڈ آف سارہ‘ پر ٹویٹس کیں اور ’سارہ آپ میری بہن اور بیٹی ہیں، میں امید کرتا ہوں کہ آپ کو دلہن بنتے اور خوش دیکھوں‘ جیسے پیغامات بھیجے۔

بہت سے لوگوں نے سارہ کے علاج کے لیے پیسے بھی دیے۔ یہ مالی امداد ٹویٹر پر موجود لوگوں کو پیغامات کے ذریعے دی جانی والی بینکوں کی تفصیل پر بھیجی جاتی تھیں۔

تاہم یہ کہنا مشکل ہے کہ کُل کتنی رقم عطیے کے طور پر دی گئی ہے۔

اس سب میں ایک مسئلہ ہے۔ یہ اکاؤنٹ نقلی تھا۔

بی بی سی کے مطابق اس دھوکے کو ٹویٹر استعمال کرنے والے ایک عام سے سعودی نے فاش کیا۔ اس سعودی شخص نے ایک جاسوس بن کر یہ پتہ لگایا کہ یہ تصاویر سماجی رابطوں کے اکاؤنٹس سے لی گئی ہیں اور اس میں دکھائی جانے والی لڑکی ہے تو سرطان کی مریضہ لیکن اس کا تعلق سعودی عرب سے نہیں بلکہ امریکہ سے ہے جس کا نام ایسمی ملر ہے۔

جب ایک ٹویٹر اکاؤنٹ @talal نے مزید تحقیق کی تو معلوم ہوا کے سارہ ابراہیم کے نام سے چلنے والا اکاؤنٹ نقلی تھا۔ انھوں نے ایک پیغام بھیجا جسے بعد میں ہزاروں مرتبہ ری ٹویٹ کیا گیا۔ ہیش ٹیگ ’سارہ ابراہیم کا جھوٹ‘ کو 50 ہزار سے زائد بار استعمال کیا گیا۔

جیسے ہی اس فریب کی خبر پھیلی تو ساری کہانی کھل کر سامنے آنے لگی۔

سعودی شہزادے خالد السعود نے ٹویٹر پر ایک موبائل فون نمبر ٹویٹ کیا اور کہا کہ یہ نمبر انھیں اس نقلی اکاؤنٹ کو چلانے والوں نے دیا تھا اور وہ خود کو ’سارہ‘ بتانے والی لڑکی سے بات بھی کیا کرتے تھے۔