عید شاپنگ اور بلند و بالا قیمتیں - عوام مایوسی کا شکار

یہ ایک گرم دوپہر کا ذکر ہے کہ میں کراچی کی ایک مصروف شاہراہ پر ٹریفک جام میں پھنسا ہوا تھا- اس دوران میری نظر ایک کرولا گاڑی پر پڑی جس سے ایک درمیانی عمر کی خاتون نکل کر ایک پھل فروش کے پاس گئی لیکن کچھ دیر پھل فروش کے پاس کھڑے رہنے کے بعد وہ خاتون واپس آ کر گاڑی میں بیٹھ گئیں- ایسا کرنے والی وہ اکیلی خاتون نہیں تھیں بلکہ اس پھل فروش کے پاس کئی گاہک آئے لیکن بغیر کچھ خریدے ہی واپس چلے گئے- یہ کافی حیران کن لمحہ تھا کہ رمضان کے مہینے میں کوئی مسلمان پھل کیوں نہیں خرید رہا؟ لیکن کچھ دیر بعد ہی یہ حقیقت واضح ہوگئی کہ پھل فروش پھلوں کو اتنہائی مہنگے دام فروخت کر رہا ہے اور گاہک قیمت سن کر ہی پھل خریدنے سے گریزاں ہے -

افسوسناک امر ہے کہ مسلمان ملک ہونے کے باوجود ہماری عوام رمضان کے بابرکت مہینے میں بھی مہنگائی کے سبب بنیادی ضروریات کی اشیا بھی خریدنے سے قاصر دکھائی دی- اور اگر کوئی طبقہ خریدنے میں کامیاب بھی رہا تو وہ بھی مہنگائی کی شکایت کرتا ضرور نظر آیا-
 

عید ایک ایسا تہوار ہے جس کی تیاری کی شروعات ماہِ رمضان کے آغاز سے ہی ہوجاتی ہے لیکن بڑھتی ہوئی مہنگائی نے پاکستان میں مسلمانوں کے لیے اس تہوار کو بھی مشکل اور بےرونق بنا دیا ہے- شہریوں کے لیے عید کی شاپنگ کرنا کسی ڈراؤنے خواب سے کم نہیں-

پاکستانی عوام عید کے خریداری کے لیے بازاروں کا رخ تو کر رہی ہے لیکن اشیا کی بلند و بالا قیمتیں خریداروں کو مایوسی کا شکار بنا رہی ہیں- دلوں کو جھنجوڑنے والا مقام تو یہ ہے کہ مسلمانوں کے لیے اپنا خوشیوں سے بھرپور تہوار عیدالفطر منانا بھی ایک مسلم پاکستان میں خود مسلمانوں کے لیے مشکل بنتا جارہا ہے- لیکن ایک حقیقت یہ بھی ہے کہ اس سب کے باوجود پاکستانی عوام کسی نہ کسی طرح ان مشکلات سے نبرد آزما ہے اور اپنی حیثیت کے مطابق خوشیاں منانے میں مصروف ہے-