فقیر کا انوکھا کارنامہ٬ شہرت اور دولت کی بارش

فقیر صرف پاکستانی معاشرے کا ہی حصہ نہیں بلکہ دنیا بھر میں پائے جاتے ہیں تاہم سب کا کام یکساں ہوتا ہے یعنی راہ چلتے راہگیروں سے پیسوں کی مانگ کرنا- مگر ایک فرانسیسی فقیر نے بھیک مانگنے کے ساتھ ایک ایسا انوکھا کام بھی کر ڈالا جس کی وجہ سے وہ نہ صرف شہرت کی بلندیوں تک جا پہنچا بلکہ اس پر دولت کی بارش بھی ہونے لگی-
 

ڈوئچے ویلے کے مطابق فرانسیسی دارالحکومت پیرس میں دربدر پھرنے والے ایک بھکاری نے اپنے معمولات پر کتاب لکھ کر شہرت حاصل کر لی ہے۔ خود نوشت کے انداز میں لکھے گئے اس ناول کو غیر معمولی مقبولیت حاصل ہوئی ہے۔

پیرس کی سڑکوں پر مانگ تانگ کر زندگی بسر کرنے والا ایک فقیر ژاں میری رُوگول (Jean-Marie Roughol) ایک کتاب تحریر کر کے حیران کن انداز میں فرانسیسی دارالحکومت کی نمایاں شخصیات میں شامل ہو گیا ہے۔ اِس کتاب کی مقبولیت کے بعد وہ پیرس کے کئی مقامی ٹیلی وژن چینلز پر انٹرویوز کے لیے مدعو کیا جا چکا ہے۔
 

اِس کتاب کو تحریر کرنے کے لیے وہ گھنٹوں پیرس کے مختلف پارکوں کے بینچوں پر بیٹھا کرتا تھا۔ کتاب کا نام ’’ My Life As A Panhandler ‘‘ ہے اور اِسے اردو میں ’فقیر کے طور پر میری زندگی’ کہا جا سکتا ہے۔

کتاب کی مقبولیت کے باوجود اِس فقیر کی زندگی میں کوئی تبدیلی واقع نہیں ہوئی ہے اور وہ بدستور سڑکوں پر مارا مارا پھرتا دکھائی دیتا ہے لیکن اُس کی خواہش ہے کہ وہ اپنے ناول سے حاصل ہونے والی آمدن سے ایک اپارٹمنٹ خریدے تاکہ اُس میں کمپیوٹر پر اپنی مزید کتب تحریر کر سکے۔

اُس نے آج کل اپنے سر پر سانتا کلاز کا ہیٹ پہننا شروع کر دیا ہے۔ کتاب کی اشاعت سے قبل جو رقم اُسے دی گئی، اُس سے وہ ایک سمارٹ فون خریدنے میں کامیاب ہو گیا ہے۔ وہ سمارٹ فون کے ذریعے فیس بک پر اپنے شائقین و قارئین کے ساتھ رابطے میں رہنا چاہتا ہے۔ اُس نے اپنے ایک انٹرویو میں بتایا کہ لوگ اُسے کہیں سے بھی پیغام بھیج سکتے ہیں۔ فیس بک پر اُس کی چند تصاویر موجود ہیں۔