کرِس گیل٬ خاتون رپورٹر کی آنکھوں کی تعریف٬ جرمانہ عائد

ویسٹ انڈیز کرکٹ ٹیم کے معروف کھلاڑی کریس گیل کھیل میں اپنے جارحانہ انداز کی وجہ سے تو شہرت رکھتے ہی تھے لیکن گیل کو بیش لیگ کے دوران خاتون رپورٹر کو انٹرویو دیتے ہوئے ان کی آنکھوں کی تعریف کرنا مہنگا پڑ گیا ہے- اور گیل پر انٹرویو کے دوران نازیبا الفاظ استعمال کرنے پر دس ہزار ڈالرز جرمانہ عائد کردیا گیا ہے۔
 

بگ بیش لیگ کے دوران کرس گیل نے بہترین پرفارمنس کا مظاہرہ کیا اور صرف 15 گیندوں پر 41 رنز بنا ڈالے اور اس کارکردگی کو دیکھتے ہوئے ایک اسپورٹس چینل کی خاتون رپورٹر گیل کا انٹرویو لینے جا پہنچیں- تاہم گیل نے انٹرویو دینے کے بجائے لائیو ہی اسپورٹس چینل کی خاتون رپورٹر کے ساتھ فلرٹ شروع کردیا اور ان کی آنکھوں کی تعریف کرنے لگے-

کرِس گیل نے خاتون رپورٹر کو ڈیٹ پر چلنے کی دعوت بھی دے ڈالی اور ساتھ ہی یہ بھی کہہ دیا کہ آپ شرمائے نہیں٬ جس کے بعد خاتون رپورٹر نے کوئی جواب نہیں دیا-

لیکن کرِس گیل کے اس رویے اور ان الفاظ کو نازیبا قرار دیتے ہوئے کرکٹ آسٹریلیا اور ان کی ٹیم نے انٹرویو کا نوٹس لیا اور ان پر دس ہزار آسٹریلوی ڈالر کا جرمانہ عائد کردیا-
 

دوسری جانب مذکورہ اسپورٹس چینل نے کرِس گیل کی اس حرکت پر معافی کا مطالبہ کیا ہے اور ساتھ آئندہ کرِس گیل کا کسی بھی قسم کا انٹرویو نہ لینے کا فیصلہ کیا ہے-

سوشل میڈیا پر بھی کرِس گیل کے اس انٹرویو کو انتہائی نامناسب قرار دیا گیا ہے اور ساتھ ان پر شدید تنقید بھی کی جارہی ہے-