سوغات گرما

قارئین!موسم گرما کا آغاز ہو چکا ہے لیکن ابھی بھی پاکستان کے پہاڑی علاقوں میں موسم خو شگوار ہے لیکن اس کے بر عکس میدانی اور سندھ کے علاقوں میں سخت گرمی پڑ رہی ہے اور درجہ حرارت بھی آگ اگل رہا ہے۔گرمیوں میں جب بھی باہر نکلیں چند احتیاطی تدابیر ضرور کر لیں۔بلا وجہ دھوپ میں نہ جائیں۔اگر جانا ضروری ہو تو چھتری اور سر کو ڈھانپ کر نکلیں تاکہ دھوپ سے بچا جا سکے اور لو لگنے کا خطرہ کم سے کم ہو جاتا ہے۔گرمیوں کے موسم میں گرمی کے ستائے لوگوں کو ٹھنڈے ٹھنڈے مشروبات پینے کو دل چاہتا ہے لیکن مہنگائی کی وجہ سے اب یہ بھی لوگوں کی پہنچ میں نہیں رہے۔

گرمیوں میں پانی ،پھلوں کے جوس اور مشروبات کا زیادہ استعمال کریں۔گرمی کے موسم میں لیموں پانی کا استعمال مفید ہوتا ہے اس کے علاوہ دہی اور دہی کی لسی بھی جسم کا درجہ حرارت کم کرنے میں مدد کرتی ہے۔لسی بھی پیشاب آور ہے اور بعض لوگ نہر یا دریا میں نہا کر گرمی کی شدت کو کم کرنے کی کوشش کرتے ہیں لیکن گرمی ہے کہ جانے کا نام نہیں لیتی۔
 

٭خربوزہ
قارئینً خربوزہ بھی اپنے ذائقے کے لئے پسند کیا جاتا ہے اس میں 90 فیصد پانی ہوتا ہے اس کے علاوہ خربوزے میں آئرن،پوٹاشیم،کیلشیم،سوڈیم ،زنک اور فاسفورس ہوتا ہے۔اس کے علاہ وٹامنز اے،بی،سی،ای اور کے موجود ہوتا ہے۔خربوزہ مارکیٹ میں عام مل جاتا ہے اور ہر ایک کی پہنچ میں بھی ہوتا ہے خربوزہ بھی گرمیوں کی سوغات میں سے ایک اہم سوغات ہے اس کے کھانے سے چہرے کا رنگ صاف ہوتا ہے اور چہرے سے داغ دھبے ختم ہو جاتے ہیں۔خربوزہ پیشاب کی تکالیف،یرقان اور قبض میں کھانا فائدہ مند ہوتا ہے ۔ہاضمے کو درست رکھتا ہے اور پٹھوں کی مضبوطی کے لئے بھی مفید ہے۔خون کی کمی کا شکار لوگ بھی اس کو ضرور استعمال کریں ۔بچوں کو یہ پھل ضرور استعمال کروائیں کیونکہ یہ ان کی نشو و نما کے لئے بے حد مفید ہے۔اس کے استعمال سے بچوں کی ہڈیاں مضبوط ہوتی ہیں۔

٭کھیرا
کھیرا بھی گرمیوں میں ہی ہر سبزی کی دکان پر نظر آتا ہے یہ ایک سبزی ہے اور اس میں کاربوہائیڈریٹس، کیلشیم اور پروٹین مناسب مقدار میں موجودہوتا ہے۔ہمارے ہاں دو قسم کے کھیرے پائے جاتے ہیں ایک دیسی کھیرا اور دوسرا ولائیتی کھیرا ہے۔اس میں 95 فیصد پانی موجود ہوتا ہے ۔موسم گرما میں اس کا استعمال ہمارے جسم سے پانی کی کمی کو دور کرتا ہے۔اس کے کھانے سے ہمارے جسم کو ٹھنڈک پہنچتی ہے اور گرمی دور ہوتی ہے۔ایسے مریض جن کو السر اور معدے کی تیزابیت ہو وہ کھیرے کا استعمال کریں۔موٹے افراد نہار منہ اس کا جوس نکال کر پئیں تاکہ ان کے موٹاپے میں کمی ہو سکے۔کھیرا دماغ کو ترو تازہ رکھتا ہے اور ذہنی تناؤ کو کم کرتا ہے۔کھیرا کولیسڑول،بلڈ پریشر اور جوڑوں کے دردوں میں فائدہ مند ہے۔ذیابیطس کے مریضوں کو بھی اس سے فائدہ پہنچتا ہے اس کے علاوہ کھیرا کھانے سے ہاضمہ درست رہتا ہے اور سردرد میں بھی آرام ملتا ہے۔