گرمی میں پیدا ہونے والی بیماریاں اور ان کا علاج٬ ڈاکٹر بلقیس شیخ

موسمِ گرما کا آغاز ہوچکا ہے جبکہ گرمیاں تنہا نہیں آتیں بلکہ اپنے ساتھ کئی اقسام کی بیماریاں بھی لے کر آتی ہیں اور اکثر افراد ان بیماریوں کا شکار بن جاتے ہیں- لیکن حقیقت یہ ہے کہ گرمی میں پیدا ہونے والی ان بیماریوں سے بچاؤ یا ان کا علاج کوئی زیادہ مشکل نہیں ہے- ضرورت صرف اس بات کی ہے کہ ہمیں اس حوالے سے درست معلومات حاصل ہونی چاہیے اور اسی معلومات کے حصول کے لیے ہماری ویب کی ٹیم نے معروف ہربلسٹ ڈاکٹر بلقیس ڈاکٹر شیخ سے خصوصی ملاقات کی- ڈاکٹر بلقیس شیخ کے مطابق چند احتیاطی تدابیر اور آسان ٹوٹکوں کی مدد سے ہم ہاآسانی موسمِ گرما کی تکلیف دہ بیماریوں سے محفوظ رہ سکتے ہیں- ڈاکٹر بلقیس گرمیوں کی بیماریوں٬ ان سے بچاؤ اور علاج کے حوالے سے مزید کیا بتاتی ہیں؟ آئیے جانتے ہیں!
 

Contact Details of Dr Bilquis Sheikh

ڈاکٹر بلقیس کہتی ہیں کہ “ ہر موسم کی بیماریوں سے بچاں کے لیے اﷲ تعالیٰ کی جانب سے اس موسم میں کچھ پھل بھی عطا کیے جاتے ہیں جیسے کہ کیری- کیری کا شربت نہ صرف لُو لگنے سے بچاتا ہے بلکہ لُو لگ جانے کے بعد بھی آپ کو اس سے نجات دلاتا ہے“-

“ کیری کا شربت بنانے کے لیے سب سے پہلے کیری کو ملتانی مٹی سے اچھی طرح لیپ کرنے کے بعد اس حد تک گرم کریں کہ کیری کی جلد نہ پھٹے٬ ملتانی مٹی صاف کر کے کیری نچوڑ لیں اور اس کے رس کو ایک گلاس ٹھنڈے پانی میں شامل کریں اور اس پانی میں ایک بڑا چمچ چینی اور ایک چٹکی لاہوری نمک شامل کریں- یہ شربت پینے سے آپ لُو لگنے محفوظ رہ سکتے ہیں“-

“ ایک اور چیز جس کے بارے میں بہت کم لوگ جانتے ہیں وہ ہے کہ خس کا شربت- خس کا شربت بہت بہترین چیز ہے اور یہ گرمی کو مارتا ہے- ویسے تو خس کا شربت مارکیٹ میں دستیاب ہے لیکن اگر آپ خود یہ شربت تیار کرنا چاہتے ہیں تو خس آپ کو پنساری کی دکان سے مل سکتی ہے- تاہم خس خریدنے کے بعد اسے دھوئیں ضرور اور اس کے بعد چھان لیں“-