اَلْحَمْدُ لِلّٰہِ رَبِّ الْعَالَمِین،
وَالصَّلاۃُ وَالسَّلامُ عَلَی النَّبِیِّ الْکَرِیْم ِوَعَلٰی آلِہِ
وَاَصْحَابِہِ اَجْمَعِیْن۔
زکوٰۃ کے معنی: زکوٰۃ کے معنی پاکیزگی، بڑھوتری اور برکت کے ہیں۔ اﷲ تعالیٰ
نے ارشاد فرمایا: اُن کے مال سے زکوٰۃ لو تاکہ اُن کو پاک کرے اور بابرکت
کرے اُس کی وجہ سے، اور دعا دے اُن کو۔ (سورۃ التوبہ، ۱۰۳) شرعی اصطلاح میں
مال کے اُس خاص حصہ کو زکوٰۃ کہتے ہیں جس کو اﷲ تعالیٰ کے حکم کے مطابق
فقیروں، محتاجوں وغیرہ کو دے کر انہیں مالک بنا دیا جائے۔
زکوٰۃ کا حکم: زکوٰۃ دینا فرض ہے۔ قرآن کریم کی آیات اور حضور اکرم ﷺ کے
ارشادات سے اِس کی فرضیت ثابت ہے۔ قرآن وسنت کی روشنی میں امت مسلمہ کا
اجماع ہے کہ جوشخص زکوٰۃ کے فرض ہونے کا انکار کرے وہ کافر ہے، اور زکوٰۃ
کی ادائیگی نہ کرنے والا گناہ کبیرہ کا مرتکب ہے، جس پر آخرت میں سخت
سزائیں دی جائیں گی اگر اﷲ تعالیٰ نے اسے معاف نہیں فرمایا۔
زکوٰۃ کی فرضیت کب ہوئی: زکوٰۃ کی فرضیت ابتداء اسلام میں ہی مکہ مکرمہ کے
اندر نازل ہوچکی تھی، جیساکہ مفسر قرآن علامہ ابن کثیرؒنے سورۂ مزمل کی آیت
فَاقِےْمُوا الصَّلاۃَ وَآتُوا الزَّکَاۃَ سے استدلال فرمایا ہے، کیونکہ یہ
سورت مکی ہے اور بالکل ابتداء وحی کے زمانہ کی سورتوں میں سے ہے۔ البتہ
احادیث سے معلوم ہوتا ہے کہ ابتداء ِاسلام میں زکوٰۃ کے لئے کوئی خاص نصاب
یا خاص مقدار مقرر نہ تھی، بلکہ جو کچھ ایک مسلمان کی اپنی ضرورت سے بچ
جاتا، اُس کا ایک بڑا حصہ اﷲ کی راہ میں خرچ کیا جاتا تھا۔ نصاب کا تعین
اور مقدارِ زکوٰۃ کا بیان مدینہ منورہ میں ہجرت کے بعد ہوا۔
زکوٰۃ نہ نکالنے پر وعید: سورۃ التوبہ آیت نمبر ۳۴ ۔ ۳۵ میں اﷲ تعالیٰ نے
اُن لوگوں کے لئے بڑی سخت وعید بیان فرمائی ہے جو اپنے مال کی کما حقہ
زکوٰۃ نہیں نکالتے۔ اُن کے لئے بڑے سخت الفاظ میں خبر دی ہے، چنانچہ فرمایا
: جو لوگ سونا وچاندی جمع کرکے رکھتے ہیں اور ان کو اﷲ کی راہ میں خرچ نہیں
کرتے (یعنی زکوٰۃ نہیں نکالتے) تو (اے نبی ) آپ ان کو ایک بڑے دردناک عذاب
کی خبر سنادیجئے۔ دوسری آیت میں اُس دردناک عذاب کی تفصیل ذکر فرمائی کہ یہ
دردناک عذاب اُس دن ہوگا جس دن سونے اور چاندی کو آگ میں تپایا جائے گا اور
پھر اُس آدمی کی پیشانی ، اُس کے پہلو اور اُس کی پشت کو داغا جائے گااور
اس سے یہ کہا جائے گا کہ یہ ہے وہ خزانہ جو تم نے اپنے لئے جمع کیا تھا، آج
تم اس خزانے کا مزہ چکھو، جو تم اپنے لئے جمع کررہے تھے۔ اﷲ تعالیٰ ہم سب
کو اِس انجام بد سے محفوظ فرمائے ، آمین۔ آیت میں "کَنَزْتُمْ" سے مراد وہ
مال ہے جس کی زکوٰۃ ادا نہ کی گئی ہو۔حضور اکرم ﷺنے ارشاد فرمایا: جب مال
میں زکوٰۃ کی رقم شامل ہوجائے (یعنی زکوٰۃ کی ادائیگی نہیں کی گئی یا پوری
زکوٰۃ نہیں نکالی بلکہ کچھ زکوٰۃ نکالی اور کچھ رہ گئی) تو وہ مال انسان کے
لئے تباہی اور ہلاکت کا سبب ہے۔ (مجمع الزوائد) لہذا اس بات کا اہتمام کیا
جائے کہ ایک ایک روپئے کا صحیح حساب کرکے زکوٰۃ ادا کی جائے۔
زکوٰۃ کے فوائد: زکوٰۃ ایک عبادت ہے اور اﷲ کا حکم ہے۔ زکوٰۃ نکالنے سے
ہمیں کوئی فائدہ ملے یا نہ ملے، اﷲ کے حکم کی اطاعت بذات خود مقصود ہے۔
زکوٰۃ کی ادائیگی کا اصل مقصد اﷲ کی اطاعت ہے ، لیکن اﷲ کا کرم ہے کہ جب
کوئی بندہ زکوٰۃ نکالتا ہے تو اﷲ اُس کو دنیاوی فوائد بھی عطا فرماتا ہے،
اُن فوائد میں سے یہ بھی ہے کہ زکوٰۃ کی ادائیگی باقی مال میں برکت ،اضافہ
اور پاکیزگی کا سبب بنتی ہے۔ چنانچہ قرآن کریم (سورۃ البقرہ ۔ ۲۷۶) میں اﷲ
تعالیٰ نے ارشاد فرمایا :اﷲ سود کو مٹاتا ہے اور زکوٰۃ اور صدقات کو بڑھاتا
ہے۔ حضور اکرم ﷺ نے ارشاد فرمایا کہ جب کوئی بندہ خرچ کرتا ہے (زکوٰۃ
نکالتا ہے) تو فرشتے اُس کے حق میں دعا کرتے ہیں کہ اے اﷲ! جو شخص اﷲ کے
راستے میں خرچ کررہا ہے اس کو اور زیادہ عطا فرما، اور اے اﷲ جس شخص نے
اپنے مال کو روک کر رکھ رہا ہے (یعنی زکوٰۃ ادا نہیں کررہا ہے) تو اے اﷲ اس
کے مال پر ہلاکت ڈال دے۔ (صحیح بخاری وصحیح مسلم) اسی طرح حضور اکرم ﷺنے
ارشاد فرمایا : کوئی صدقہ کسی مال میں کمی نہیں کرتاہے۔ (صحیح مسلم)
زکوٰۃ کس پر فرض ہے: اُس مسلمان عاقل بالغ پر زکوٰۃ فرض ہے جو صاحب ِنصاب
ہو۔ نصاب کا اپنی ضرورتوں سے زیادہ اور قرض سے بچا ہوا ہونا شرط ہے ، نیز
مال پر ایک سال کا گزر نا بھی ضروری ہے۔ لہذا معلوم ہوا کہ جس کے پاس نصاب
سے کم مال ہے، یا مال تو نصاب کے برابر ہے لیکن وہ قرض دار بھی ہے یا مال
سال بھر تک باقی نہیں رہا ، تو ایسے شخص پر زکوٰۃ فرض نہیں ہے۔
زکوٰۃ کا نصاب: 52.5 تولہ چاندی یا 7.5 تولہ سونا یا زیور ، یا 52.5 تولہ
چاندی کی قیمت کا نقد روپیہ یا سامانِ تجارت وغیرہ جس شخص کے پاس موجود ہے
اور اُس پر ایک سال گزر گیا ہے تو اُس کو صاحب ِنصاب کہا جاتا ہے۔
سونے یا چاندی کے زیورات پر زکوٰۃ: جمہور علماء وفقہاء ومحدثین‘ قرآن وسنت
کی روشنی میں عورتوں کے سونے یا چاندی کے استعمالی زیور پر وجوب زکوٰۃ کے
قائل ہیں، اگر وہ زیور نصاب کے مساوی یا زائد ہو اور اس پر ایک سال بھی گزر
گیا ہو، جس کے لئے قرآن وحدیث کی روشنی میں تحریر کردہ میرا مضمون (زیورات
پر بھی زکوٰۃ واجب ہے) پڑھیں۔
زکوٰۃ کتنی ادا کرنی ہے: اوپر ذکر کئے گئے نصاب پر صرف ڈھائی فیصد(2.5% )
زکوٰۃ ادا کرنی ضروری ہے۔ شریعت اسلامیہ نے دنیا کے موجودہ نظام کی طرح
آمدنی پر ٹیکس نہیں لگایا یعنی اگر آپ کی لاکھوں روپئے کی آمدنی ہے لیکن وہ
خرچ ہوجاتے ہیں توکوئی زکوٰۃ واجب نہیں، بلکہ ضروریات زندگی سے بچنا، بچے
ہوئے مال کا نصاب کو پہنچنا ا ور اس پر ایک سال کا گزرنا وجوب زکوٰۃ کے لئے
ضروری ہے۔
سامان تجارت میں کیا کیا داخل ہے: مال تجارت میں ہر وہ چیز شامل ہے جس کو
آدمی نے بیچنے کی غرض سے خریدا ہو۔ لہذا جو لوگ Investment کی غرض سے پلاٹ
خریدلیتے ہیں اور شروع ہی سے یہ نیت ہوتی ہے کہ جب اچھے پیسے ملیں گے تو اس
کو فروخت کرکے اس سے نفع کمائیں گے، تو اس پلاٹ کی مالیت پر بھی زکوٰۃ واجب
ہے۔ لیکن پلاٹ اِس نیت سے خریدا کہ اگر موقع ہوا تو اس پر رہائش کے لئے
مکان بنوالیں گے یا موقع ہوگا تو اس کو کرائے پر چڑھادیں گے یا کبھی موقع
ہوگا تو اس کو فروخت کردیں گے یعنی کوئی واضح نیت نہیں ہے بلکہ ویسے ہی
خرید لیا ہے، تو اس صورت میں اس پلاٹ کی قیمت پر زکوٰۃ واجب نہیں ہے۔
کس دن کی مالیت معتبر ہوگی؟ زکوٰۃ کی ادائیگی کے لئے اُس دن کی قیمت کا
اعتبار ہوگا جس دن آپ زکوٰۃ کی ادائیگی کے لئے اپنے مال کا حساب لگا رہے
ہیں۔ یعنی زیورات کی زکوٰۃ میں زکوٰۃ کی ادائیگی کے وقت پرانے سونے کے
بیچنے کی قیمت کا اعتبار ہوگا۔ یعنی آپ کے پاس جو زیورات موجود ہیں اگر ان
کو مارکیٹ میں بیچیں تو وہ کتنے میں فروخت ہوں گے، اس قیمت کے اعتبار سے
زکوٰۃ ادا کرنی ہوگی۔
ہر ہر روپے پر سال کا گزرنا ضروری نہیں: ایک سال مال پر گزر جائے، اس کا
مطلب یہ نہیں کہ ہر سال ہر ہر روپے پر مستقل سال گزرے۔ یعنی گزشتہ سال
رمضان میں اگر آپ ۵ لاکھ روپے کے مالک تھے، جس پر ایک سال بھی گزر گیا تھا۔
زکوٰۃ ادا کردی گئی تھی۔ اِس سال رمضان تک جو رقم آتی جاتی رہی اُس کا کوئی
اعتبار نہیں، بس اِس رمضان میں دیکھ لیں کہ آپ کے پاس اب کتنی رقم ضروریات
سے بچ گئی ہے اور اُس رقم پر زکوٰۃ ادا کردیں۔ مثلاً اِس رمضان میں ۶ لاکھ
روپے آپ کے پاس ضروریات سے بچ گئے ہیں تو ۶ لاکھ کا 2.5% زکوٰۃ ادا کردیں۔
ہاں اگر کوئی قابل ذکر رقم روٹین کے علاوہ دستیاب ہوئی ہے تو اس کی زکوٰۃ
اس کے سال مکمل ہونے پر ہی ادا کرنی ہوگی۔
زکوٰۃ اور رمضان: زکوٰۃ کا رمضان میں ہی نکالنا ضروری نہیں ہے بلکہ اگر
ہمیں صاحب نصاب بننے کی تاریخ معلوم ہے تو ایک سال گزرنے پر فوراً زکوٰۃ کی
ادائیگی کردینی چاہئے خواہ کوئی سا بھی مہینہ ہو۔ مگر لوگ اپنے صاحب نصاب
بننے کی تاریخ سے عموماً ناواقف ہوتے ہیں اور رمضان میں ایک نیکی کا اجر
ستر گنا ملتا ہے تو اس لئے لوگ رمضان میں زکوٰۃ کی ادائیگی کا اہتمام کرتے
ہیں اور پھر ہر سال رمضان میں ہی زکوٰۃ ادا کرتے ہیں ۔ زکوٰۃ ایک سال مکمل
ہونے سے قبل بھی نکالی جاسکتی ہے اور اگر کسی وجہ سے کچھ تاخیر ہوجائے تو
بھی زکوٰۃ ادا ہوجائے گی، لیکن قصداً تاخیر کرنا صحیح نہیں ہے۔
مستحقین زکوٰۃ یعنی زکوٰۃ کس کو ادا کریں؟ اﷲ تعالیٰ نے سورۃ التوبہ آیت
نمبر ۶۰ میں ۸ مستحقین زکوٰۃ کا ذکر کیا ہے: (۱) فقیر یعنی وہ شخص جس کے
پاس کچھ تھوڑا مال واسباب ہے لیکن نصاب کے برابر نہیں۔ (۲) مسکین یعنی وہ
شخص جس کے پاس کچھ بھی نہ ہو۔ (۳) جو کارکن زکوٰۃ وصول کرنے پر متعین ہیں۔
(۴) جن کی دلجوئی کرنا منظور ہو۔ (۵) وہ غلام جس کی آزادی مطلوب ہو۔ (۶)
قرضدار یعنی وہ شخص جس کے ذمہ لوگوں کا قرض ہو اور اُس کے پاس قرض سے بچا
ہوا بقدر نصاب کوئی مال نہ ہو۔ (۷)اﷲ کے راستے میں جہاد کرنے والا۔ (۸)
مسافر جو حالت سفر میں تنگدست ہوگیا ہو۔
جن لوگوں کو زکوٰۃ دینا جائز نہیں ہے: ۱۔ اُس شخص کو جس کے پاس ضروریات
ِاصلیہ سے زائد بقدرِ نصاب مال موجود ہو۔ ۲۔ سےّد اور بنی ہاشم۔ بنی ہاشم
سے حضرت حارث ؓ بن عبدالمطلب،حضرت جعفرؓ، حضرت عقیلؓ، حضرت عباسؓ اور حضرت
علی ؓ کی اولادمراد ہیں۔ ۳۔ اپنے ماں، باپ، دادا ، دادی، نانا ، نانی کو
زکوٰۃ دینا جائز نہیں ہے۔ ۴۔ اپنے بیٹا، بیٹی، پوتا، پوتی، نواسہ، نواسی کو
زکوٰۃ دینا جائز نہیں ہے۔ ۵۔ کافرکو زکوٰۃ نہیں دی جاسکتی ہے۔۔۔ نوٹ: بھائی
، بہن، بھتیجا، بھتیجی، بھانجا، بھانجی، چچا، پھوپھی، خالہ، ماموں، ساس،
سسر، داماد وغیرہ میں سے جو حاجتمند اور مستحق زکوٰۃ ہوں، انہیں زکوٰۃ دینے
میں دوہرا ثواب ملتا ہے، ایک ثواب زکوٰۃ کا اور دوسرا صلہ رحمی کا۔
زکوٰۃ سے متعلق چند متفرق مسائل: ٭ اگر کسی شخص کے پاس سونے یا چاندی کے
علاوہ نقدی یا بینک بیلینس بھی ہے تو ان پر بھی زکوٰۃ ادا کرنی ہوگی، البتہ
دو بنیادی شرطیں ہیں: ۱۔ نصاب کے مساوی یا زائد ہو۔ ۲۔ ایک سال گزر گیا ہو۔
٭ زکوٰۃ جس کو دی جائے اُسے یہ بتانا کہ یہ مالِ زکوٰۃ ہے ضروری نہیں بلکہ
کسی غریب کے بچوں کو عیدی یا کسی اور نام سے دیدینا بھی کافی ہے۔ ٭ دینی
مدارس میں غریب طالب علموں کے لئے زکوٰۃ دینا جائز ہے۔ ٭ زکوٰۃ کی رقم کو
مساجد، مدارس، ہسپتال، یتیم خانے اور مسافر خانے کی تعمیر میں صرف کرنا
جائز نہیں ہے۔ ٭ اگر عورت بھی صاحب ِنصاب ہے تو اُس پر بھی زکوٰۃ فرض ہے،
البتہ اگر شوہر خود ہی عورت کی طرف سے بھی زکوٰۃ کی ادائیگی اپنے مال سے
کردے تو زکوٰۃ ادا ہوجائے گی۔ |